II Kọrinti 2 - Edo Bible (E Baibol Ẹdo) Version 1996

¹ Rhunmwuda ọnii ọre I na heko mwamwa ẹn vbe ekhọe mwẹ wẹ, I i khian dọlegbe bu uwa gha dee ne I do rhia uwa ekhọe rua.

² Rhunmwuda, mẹ gha ghi rhia uwa ekhọe rua nẹ, de ọmwa ne ọ gha ghi ya ẹko mwẹ rhiẹnrhiẹn? Iran nii te nọ ne imẹ rhia ẹre ekhọe rua.

³ Ọna ọre ọ si ẹe ne I na gbẹn ebe nii gie uwa. I ma ho ne I gha dee ne a miẹn wẹ ọmwa ne ọ gha ya ẹko mwẹ rhiẹnrhiẹn, ọre ọ ghi rhia mwẹ ekhọe rua. Rhunmwuda aro mwẹ dae wẹ ẹko gha rhiẹnrhiẹn mwẹ ọre ẹko na vbe rhiẹnrhiẹn uwa.

⁴ Ekhọe ne ọ vuọẹn ne akhiẹ ẹsẹse kevbe iro nọkhua ọre I ya gbẹn ebe gie uwa kẹe kevbe amẹ eve, ẹ i re te I ho ne I rhia uwa ekhọe rua, sokpan ne I rhie maa uwa vbene I kakabọ ho ẹmwẹ uwa hẹẹ.

Ayabọ Ne Enọrukhọ

⁵ A deghẹ ọmwaikọmwa rhia ọmwa ọkpa ekhọe rua, ẹ i re mẹ ọre ọ ru ẹre re, sokpan wa ọre ọ ru ẹre re, ra na kha wẹ eso vbe uwu uwa ọre ọ ru ẹre re, rhunmwuda I ma ho ne I ya obọ ne ọ tọn gbe mu uwa.

⁶ Oya ne uwa ni bun rri ọmwa ni re vberriọ, ọ sẹ nẹẹn.

⁷ Vbene ọ rhirhi gha ye hẹ, wa ya bọ ẹe, wa ghi vbe gha bu ẹre ude iwo vbe egbe ne ekhọe ẹre ghẹ ya rhia sẹrriọ ne ọ gha na ghi wa zobọ fẹẹrẹ.

⁸ Wa lahọ, wa rhie ma rẹn ighẹ, wa ye mobọ ho ẹmwẹ ọnrẹn.

⁹ Rhunmwuda, ọnii ọ zẹe ne I na gbẹn ebe ni gie uwa, te I gha ho ne I rẹn vbene uwa ghi ziengbe emwi hia sẹ hẹẹ, kevbe wẹ, deghẹ wa mu egbe ne uwa ya gha rhie ibude mwẹ vbe ẹghẹ hia.

¹⁰ Wa gha ya emwi ne ọmwa ọkpa baku ru bọ ẹe, mẹ vbe ya bọ ẹe. Rhunmwuda, I gha ya bọ ọmwa, adeghẹ abaku ru ọkpa gele rrọọ ne I ya bọ ọmwa, rhunmwuda uwa ọre I na ru ẹe vbe sirra Kristi.

¹¹ Ne a ghẹ miẹn ehe na rhie otọ ne obọ Setan ya ke odukhunmwu ne ọghe ima, rhunmwuda ma rẹn ehe ne ọ ghae yi.

Ekhọe Pọl Ma Sẹ Otọ Vbe Troas

¹² Ẹghẹ ne I na sẹ Troas ne I ya kpe orhu Iyẹn Ne ọ maa Kristi vbe evba, I keghi miẹn wẹ, Nọyaẹnmwa tobọ ẹre kie odẹ ye otọ ne nene iwinna nẹ vbe evba.

¹³ Sokpan, ekhọe mwẹ ma sẹ otọ hiehie, rhunmwuda ne I ma na miẹn Ọtẹn mwa ighẹ Taitọs. I keghi rhunmwuda ọnii gbe ọkhian ẹdẹ hia ne iran ni rre evba, I na gha rrie Masidonia.

Akhọnmiotọ Vbe Ekpa Kristi

¹⁴ Sokpan, ekpọnmwẹ nọ ne Osanobua, rhunmwuda, vbe a kugbe ba Kristi, Osanobua ghi gha viọ ima khian zẹ vbe oghunmwu vbe uwu emwa ne Kristi viọ rre vbe okuo ne ọ na khọn miotọ. Zẹ vbe ori ne ọ winhin ne ọ gba ehe hia, Osanobua lo ima ya ye Kristi khian ne emwa hia rẹnrẹn.

¹⁵ Rhunmwuda te ima ye vbe uwinhinmwẹ eturari ne Kristi giẹn ne Osanobua, ne ọ vbe sẹ egbe iran ne a ra miẹnfan, kevbe iran ne ọ ra wiri ua.

¹⁶ Vbe ọghe iran ni ra wiri ua, ẹwia dan ne ọ gbe ọmwa ran nọ, vbe ọghe iran ne a ra miẹnfan, emwi ne ọ winhin nọ rhie arrọọ ne ọmwa nọ. De ọmwa ne ẹtin ẹnrẹn gha sẹ egbe iwinna vberriọ khekherriọ?

¹⁷ Ma i ye vbe emwa ọvbehe ne ọ ye obọ mu ẹmwẹ Osanobua vbene a miẹn wẹ emwi ne ọ ro puẹkẹ nọ, sokpan rhunmwuda wẹ Osanobua gie ima nẹ, ma kegha ye ẹkoata ta ẹe vbe odaro ẹre zẹ vbe eguọmwadia Kristi.