II Jọn 1 - Edo Bible (E Baibol Ẹdo) Version 1996

¹ Ọmwa nii ne ọre Ediọn ọre ọ gbẹn ebe na gie okpokhuo nii, ke ẹe kevbe ivbi ẹre ne I ho ẹmwẹ ọnrẹn ẹsẹse. Ẹ i re mẹ ọkpa, sokpan emwa hia ne ọ ghi rẹn ẹmwata nẹ, ọre ọho ẹmwẹ ruẹn.

² Rhunmwuda wẹ, ẹmwata rre uwu ima nẹ, ọ gha vbe gu ima gha rrọọ rhinrin ẹdẹ.

³ Osanobua ne Erha, kevbe Jesu Kristi ne Ovbi Evbavba ne ọ rhie ẹsọhẹ itohan kevbe ọfumwegbe ne ima, ne ọ gele gha re ọghomwa vbe ẹmwata kevbe aho ẹmwẹ ọmwa.

Ẹmwata Kevbe Ahoẹmwọmwa

⁴ Umiẹn vbene ẹko rhiẹnrhiẹn mwẹ uan hẹ, vbe I miẹn wẹ eso vbe avbe ivbi uẹ rrọọ vbe uwu ẹmwata zẹ vbene Evbavba yi ẹre iyi ne ima.

⁵ Rhunmwuda ọnii, ọre I na nọ ruẹn nian okpokhuo ne ọ ghaan, wẹ, ne uwa gie ima hia gha ho ẹmwẹ egbe. Ẹ i zẹdẹ re iyi ọgbọn ọre I gbẹn ebe ẹre guẹ, iyi ne a mu ye ima otọ ke omuhẹn wa gha dee ọre nọ.

⁶ Aho ẹmwẹ ọmwa ne I ta ẹmwẹ ọnrẹn na ọrọre, wẹ ne ima gha ya avbe iyi ne Osanobua yi ru emwi. Nene iyi, zẹ vbene uwa họẹn ke omuhẹn gha dee ọrọre wẹ: wa hia gha rrọọ vbe uwu aho ẹmwẹ ọmwa.

⁷ Avbe ọrẹrẹ ọmwa ni bun vẹ ku agbọn hia, emwa ni ma tae wẹ Jesu Kristi gele khian ọmwa ne ọ sẹtin wu. Egbe ọmwa vberriọ, ọrẹrẹ ọmwa nọ. Rẹn ọrọre oghian Kristi.

⁸ Wa ghi khẹ yegbe nian khekherriọ, ne uwa ghẹ ya mu emwi ne uwa winna yi nẹ fua, sokpan ne ere ne ọ rrọọ sẹ uwa obọ vbe ne ọ vuọẹn.

⁹ Ọmwaikọmwa ne ọ ma rhie owẹ lele emwi ne Jesu ma emwa ẹre, sokpan ọ keghi fian yan rẹn, ẹ i mwẹ Osanobua. Sokpan ọmwa ne ọ rhie owẹ lele emwi ne ọ ma emwa ẹre, ọ mwẹ Erha kevbe Ọmọ.

¹⁰ Rhunmwuda ọnii, ọmwa gha bu ruẹ la owa vbe ne a na miẹn wẹ, ọ ma rhie iruẹmwi na rre, ghẹ giẹe la owa. Ghẹ kue zẹdẹ kha ma rẹn wẹ, “Ọfumwegbe nọ nuẹn.”

¹¹ Rhunmwuda, ọmwa ne ọ na erhunmwu ọfumwegbe ne ẹẹn ọ gu ẹe mwẹ obọ vbe iwinna dan ne ọ winna.

Ẹmwẹ Okiekie

¹² I wa mwẹ emwi ni bun ne I gha tama ruẹn, sokpan ẹ i re ebe vbe ẹmu ne a ya gbẹn ebe ọre I gha ya ta ẹe, sokpan, I mwẹ ọnrẹn vbe ekhọe ne I do miẹn uwẹ aro, ne I wa tobọ mwẹ guẹ guan, ne ọyẹnmwẹ miẹn ehe na sẹ mwa fo.

¹³ Avbe ivbi ọtuẹn ne okhuo ni ghaan giotuẹ uwa.