III Jọn 1 - Edo Bible (E Baibol Ẹdo) Version 1996

¹ Ọmwa ni ne ọre Ediọn, ọre ọ gbẹn ebe na gie Gaiọs mwẹ ne ọ ghaan, ọmwa ne I họ ẹmwẹ ọnrẹn vbe ẹmwata.

² Ọse mwẹ ne ọ ghan, I na erhunmwu ne agbọn gha ma ruẹn, kevbe ne egbe rran ruẹn ẹsẹse zẹ vbene I rẹnrẹn wẹ egbe rran ruẹn vbe uwu ekhọe.

³ Ẹko hia keghi rhiẹnrhiẹn mwẹ uan vbe etẹn eso rre, iran na do khama mwẹ vbene u rhie ekhọe lele ẹmwẹ ẹmwata ni hẹ zẹ vbene u gele ka wa ru dee vbe ẹmwata.

⁴ Emwi ọkpa i rrọọ ne ọ ghi ya ẹko mwẹ rhiẹnrhiẹn gberra ọnii vbe i họn wẹ ivbi mwẹ wa rrọọ vbe uwu ẹmwata nii.

A Tian Gaiọs

⁵ Ọse mwẹ ne ọ ghaan, u mobọ wa mu aro ye ẹmwẹ iwinna ne u winna ne avbe etẹn, uhin vbe a vbe miẹn wẹ, erriọvbe ọre iran khin.

⁶ Iran wa ta ẹmwẹ aho ẹmwẹ ọmwa ne u mwẹ ghe esọsi sẹ edinran, lahọ, u ghi ru iyobọ ne iran ne iran ya gha khian, zẹ vbe ne ọ gha yẹ Osanobua.

⁷ Rhunmwuda, okhian ne iran kpaegbe yo vbe ọghe iwinna Kristi, iran i miẹn avbe emwa ni ma yayi emwi rhọkpa.

⁸ Rhunmwuda ọnii, ọ kere ne ima ni re eniyayi gha ye avbe emwa na obọ, ne ima miẹn ehe na gha mwẹ oghae vbe iwinna ne iran winna ne ẹmwata.

Diotrẹfis Kevbe Demetriọs

⁹ I gbẹn ebe ne ọ ma tan gie esọsi, sokpan Diotrẹfis ne ọ ho ne irẹn gha re ọkaolotu iran, ma kue zẹ ye ẹmwẹ ne I tae hiehiere.

¹⁰ Rhunmwuda ọnii, ẹghẹ ne I gha ya rre, I gha mu ẹmwẹ emwi ne ọ ru hia tuorre, ẹmwẹ ihin ne ọ talọe vbe ekpa mwa, kevbe avbe ohoghe ne ọ ta, sokpan, ọ ni ma yevbe sẹ ọe, avbe etẹn gha rre, ẹ i vbe miẹn iran yi, ọ ghi gha de avbe emwa ni te ho ne iran rhan obọ miẹn iran obọ yi, ọ ghi gha hia ne ọ khulo iran hin esọsi rre.

¹¹ Wa ne avbe ọse mwẹ, wa ghẹ gha ya egbe ta emwi dan, wa gha ya egbe ta emwi esi. Ọmwaikọmwa ne ọ ru emwi ne ọ maa ọghe Osanobua nọ, ọmwaikọmwa ne ọ ru emwi dan, ọ ma he miẹn Osanobua.

¹² Emwa hia ọre ọ wa na iyẹn Demetriọs ne ọ maa, ẹmwata tobọ ẹre vbe ta ẹmwẹ ọnrẹn ne ọ maa. Ma keghi vbe rhie osẹe ima ba ẹre, wa tobọ uwa rẹnrẹn wẹ, ẹmwẹ ne I ma ta, ẹmwata nọ.

Otuẹ Okiekie

¹³ I wa mwẹ ẹmwẹ ni bun ne I gha ta ma ruẹn, sokpan I ma ho ne I ya ebe vbe ẹmu ne a ya gbẹn ebe ta ẹe.

¹⁴ I mwẹ ọnrẹn vbe ekhọe ne I do miẹn ọẹn aro vbe ọ ma he kpẹe ban, ne ima miẹn ehe na guan vbe ghe aro mwẹ ghe aro ruẹ.

¹⁵ Ọfumwegbe ne ọ gue uẹ gha rrọọ. Avbe esiọ hia wẹẹ do. Tobọ ruẹ ya we avbe ọse mwa hia do.