Hozia 9 - Edo Bible (E Baibol Ẹdo) Version 1996

E Hozia Taa Oya Ne A Ra Rri Ivbi Izrẹl Re

¹ Wa ne ivbi Izrẹl, wa dobọ ne uwa na ru emwi ukpo uwa zẹ vbe emwa ni ga ẹbọ yi, wa fi iyeke gbe Osanobua uwa nẹ, ekhọe uwa ma vbe lelẹe. Ehe ne otọe nii sẹe ehe ne ọ rhanmwẹ, ọ re uwa na khiẹnnẹ egbe uwa ne Baal zẹ vbe ebabotu, avbe ọka ne uwa ro ighe rẹn ọ re ọ ya ẹe ha uwa osa keghi yẹ uwa.

² Sokpan, vbe ọ ma he kpee wan, wa i ra gha mwẹ ọka sẹẹ ra ofigbọn oliv, ayọn i ra vbe gha rrọọ.

³ Ivbi Izrẹl i ra vbe gha rre otọe e Nọyaẹnmwa, sokpan, te iran ra werriegbe gha rrie Igipt, iran ghi vbe ya gha rri evbare awua vbe Asiria.

⁴ Iran i ra sẹtin gha ye ayọn ha oko gie Nọyaẹnmwa vbe ẹvbo ẹrrẹe, ra ne iran vbe gha zọ ese iran gie ẹe. Evbare iran gha si awua ye ọmwaikọmwa ne ọ rhirhi a rri ọe egbe, zẹ vbe evbare ne a re vbe irorinmwi. Te iran ra ya ẹe gbe ohanmwẹ kẹkan, ọkpa ne a ra rhie la Ọgua Osa e Nọyaẹnmwa zẹ vbe emwi imuohan, ẹ i rrọ.

⁵ Ẹghẹ ne a bu yọ ne a ya ru emwiukpo e Nọyaẹnmwa ghẹ ghi sẹ, vbe iran a ra ru hẹ?

⁶ Ọkhọ gha ghi rruan iran nẹ, ighe avbe emwa ni hia vbe zagha kua, ivbi Igipt gha si iran koko iran ghi si iran koko ne iran ya re iran vbe Mẹmfis! Emwi ẹfe esiliva ne iran mwẹ, kevbe ehe ne owa te gha ye vbe ẹghẹ ọkpa, irunmwu kevbe igban, ọ re ọ gha zọọ gue ehia.

⁷ Ẹghẹ ne a ya rri emwa oya rre nẹ, ẹghẹ ne a gha na ru emwa emwi ne ọ ma iran. Ọnii gha ghi sunu, Izrẹl gha vbe rẹn. Wa khare wẹẹ, “Akhasẹ na, akpa nọ, ọmwa ne a rhie ẹmwẹ ya giee ẹre uhunmwu na, te ọ mwẹmwẹ.” Wa na wa mu ohu mwẹ vberriọ, rhunmwuda, orukhọ uwa kpọlọ.

⁸ Te Osanobua gie mwẹ zẹ vbe akhasẹ ne I do tama ivbi Izrẹl yotọ khẹ ọ dee. Sevba, eheikehe ne I rhirhi a la, wa ghi gha ho ne uwa ya ifi mu mwẹ zẹ vbe ahianmwẹ. Emwa ọrọre oghian avbe akhasẹ vbe otọe Osanobua tobọ ẹre.

⁹ Emwi ne iran ru i zẹdẹ maa hiehiere, zẹ vbene iran gha ye vbe Gibea. Osanobua gha ye orukhọ iran rre, ọ ghi rri iran oya yọ.

Orukhọ Izrẹl Kevbe Emwi Ne A La Ẹe Miẹn

¹⁰ E Nọyaẹnmwa khare wẹẹ, “Ẹghẹ ne I na ka miẹn Izrẹl, ọ keghi ye vbe ne a miẹn erhan azara ne ọ zọ ye uwu ato. Ẹghẹ ne I na ka miẹn avbe erha uwa odede, ọ keghi yevbe ne a miẹn ọmọ ne ọ vbo ro ne erhan azara ka gha mọ vbe ẹghẹ ọre. Sokpan, iran ghi sẹ Oke Peọ, iran na suẹn gha gho e Baal, wanwanna, iran keghi do gha re emwi osọnnọ zẹ vbene ẹbọ ne iran ho ẹmwẹ ọnrẹn ye.

¹¹ Ukpọlọmwẹ Izrẹl gha tin fua zẹ vbe ahianmwẹ, iran i ghi ra vbe miẹn emọ biẹlẹ, a i ra ghi vbe miẹn ikhuo ohanmwẹ vbọ, a i ghi ra vbe hanmwa emọ vbọ.

¹² “Gia kha ighe iran te vbe miẹn emọ biẹlẹ, te I ra viọ iran kpao, I i ra vbe sẹ ọkpa rae ye agbọn vbọ, I gha fi iyeke gbe emwa na, ọkhọ dan ọ re ọ ra gha sunu vbe egbe iran.”

¹³ E Nọyaẹnmwa, mẹ bẹghe ẹre vbe a zọ uhio ivbi iran khian, a na vbe gha gbele iran an.

¹⁴ Demwi ne I ra wẹ ne u ru avbe emwa na re yi? Ye avbe amwẹ iran khian agan. Ru ẹe ne a miẹn wẹ iran ma ghi sẹtin koko ivbi iran.

Vbene Nọyaẹnmwa Buu Ohiẹn Ivbe Izrẹl Hẹ

¹⁵ E Nọyaẹnmwa khare wẹẹ, “E Gilgal ọre emwi dan hia ne iran ru na suẹn. Evba nii ọ re ohu iran keghi suẹn gha mu mwẹ. Rhunmwuda emwi dan ne iran ru, I gha khulo iran hin otọe mwẹ rre. Mẹ i ghi ra dọlegbe ho ẹmwẹ iran ọvbehe, avbe ọkaolotu iran hia wa sọtẹ mwẹ nẹ.

¹⁶ Ivbi Izrẹl ye vbe erhan ne inian rẹn kakaa nẹ, ne ẹ i ghi vbe sẹtin mọ. Iran i ra vbe mwẹ emọ sokpan, adeghẹ iran kue vbe miẹn biẹlẹ yi, te I ra gbele iran, nene emọ ne iran kakabọ ho ẹmwẹ ọnrẹn.”

Akhasẹ Ni Guan Vbekpa Izrẹl

¹⁷ E Nọyaẹnmwa ne imẹ ga gha he avbe emwa rẹn yotọ, rhunmwuda iran ma danmwehọ ẹre, iran gha khian emwa ni ghi ghogho yo ghogho rre vbe ẹvbo ọvbehe.