Hozia 8 - Edo Bible (E Baibol Ẹdo) Version 1996

E Nọyaẹnmwa Guu Izrẹl Gui Ye Ẹmwẹ Ẹbọ Ne A Gho

¹ E Nọyaẹnmwa khare wẹẹ, “Wa kpe orhu okuo! Avbe eghian wa hẹ bu otọe mwẹ dee zẹvbe avbe oghohọn. Avbe emwa mwẹ rra ile ne imẹ vbe iran gba ta nẹ, iran keghi vbe sọtẹ ghe emwi ne I ma iran re.

² A gha rhe miẹn wẹ iran tie mwẹ Osanobua iran, iran khare ighe emwa mwẹ ọre iran khin, kevbe wẹ iran rẹn mwẹ,

³ iran he emwi ne ọ maa yotọ nẹ. Rhunmwuda emwi na, avbe eghian iran gha zẹ iran khu.

⁴ “Avbe emwa mwẹ zẹ ọba, sokpan, ọghe negbe iran ọ re iran ru, iran vbe zẹlẹ avbe ọkaolotu sokpan, ẹ i re ne imẹ kue yi. Iran viọ esiliva kevbe igoru iran, iran keghi mannọ ẹbọ ne iran ra ya fuan ne egbe iran.

⁵ Ẹkhuia ẹmila igoru ne emwa e Sameria gho wa sọnnọ mwẹ. Ohu iran wa kakabọ mu mwẹ vbe ọ ra kpee sẹ hẹ yi iran ke do mu ẹbọ ne iran gho fua?

⁶ Owinna ne ovbi Izrẹl ọ re ọ ma amazẹ nii, ẹ i vbe zẹdẹ re ẹbọ hiehiere. Iran gha rẹnkhẹn ọẹn ruan ighe ẹbọ igoru ne iran gho vbe Sameria.

⁷ Iran kọ ẹhoho iran gha rhọ okpẹhoho! Ugbo ọka ne ọma mọ ọka, ẹ i sẹtin rhie ebrẹd ladian. Sokpan, a deghẹ ọ sẹtin gha yerriọ, ẹrrẹe ọ re ọ ra rriọe rua.

⁸ Te Izrẹl ghi wa yevbe ẹvbo ọvbehe nekpa hia. Te ọ ghi wa khian ne ẹ i mwẹ emwi ne ọ gia ya ru, zẹ vbene akhe nọwu ye.

⁹ Te ọ ghi wa zevbudu zẹ vbe ẹsin oha, ọghe ne egbe iran ọ re ivbi Izrẹl ghi wa ru. Iran kpao gha rrie Asiria ne iran ya nọ iyobọ, iran ha osa ne ẹvbo ọvbehe wẹ ne iran tan obọ gue iran.

¹⁰ “Sokpan banbanna nian, mẹ ra si iran koko ne I rri iran oya. Vbe ọ ma he kpee wan, iran gha wunnu yo wunnu rre vbe uwu obalọ, vbe ọba Asiria a ra gha wọ iran uhunmwu.

¹¹ Vbene ivbi Izrẹl ya bọlọ ogiukpo ne a na khue orukhọ kua ne ọ gha bun yọ, erriọ ehe ne iran na ru orukhọ vbe ya bun yọ.

¹² A i sẹtin ka emwi ne a ya ma emwa emwi ne I gbẹnnẹ yotọ ne emwa na, sokpan, iran he ehia ye otọ zẹ vbe emwi ẹrrẹe ne a ma rẹn ehe ne ọ ke rre.

¹³ Iran zọ ese ghe mwẹ, iran ghi vbe rri emiowo nene emwi izọ ese nii. Sokpan, ẹko iran i rhiẹnrhiẹn imẹ ne Nọyaẹnmwa, wanwanna nian, I gha ya orukhọ iran rre ne I vbe rri iran oya yọ. I gha viọ iran werriegbe gha rrie Igipt.

¹⁴ “Avbe ivbi Izrẹl bọlọ ẹguae nibun, sokpan iran mianmian Ayi ne ọ yi iran. Ivbi e Juda bu ẹvbo nibun ne a gbe odin gaa, sokpan, I gha gie erhẹn ne ọ gha ya giẹn ẹguae iran kevbe ẹvbo iran an.”