Hozia 7 - Edo Bible (E Baibol Ẹdo) Version 1996

¹ “Ẹghẹikẹghẹ ne I ya ho ne I sinmwi emwa mwẹ ighẹ ivbi Izrẹl kevbe ne I gie agbọn ma iran, emwi ne I miẹn vbe obọ iran ọrọre ekhọe dan, kevbe uyinmwẹ dan ne iran yin. Iran gha mu egbe ru. Iran gbe urho la owa ya gha rha, iran do emwa emwi hẹ vbe adesẹ ore.

² Ọ ma vbe la iran uhunmwu wẹ, I gha ye avbe emwi na rre, sokpan orukhọ iran gba ogba ga iran, ẹ i mwẹ mẹ ma bẹghe ẹre.”

Uma Dan Vbe Uwu Ẹguae

³ E Nọyaẹnmwa khare wẹẹ, “Emwa gha yo uma dan ne iran si ya rẹrẹ ọba kevbe ekhaẹmwẹ ọnrẹn.

⁴ Ekhọe ababe kevbe ni sọtẹ ọ re iran hia khin. Ikhuiwu iran gha yọn zẹvbe erhẹn vbe aroewu, ne a miẹn wẹ, ọmwa ne ọ le ebrẹd i si yọ ọ te do sẹ ẹghẹ ne ọ ra ya le ebrẹd.

⁵ Ẹdẹ ne ọba do ugie, iran ghi ye ayọn ne ọba kevbe ekhaẹmwẹ ọnrẹn da sẹrriọ wẹ iran ghi do gha zurọ.

⁶ “Uma dan ne iran si ghi gha yọn vbe aroewu. Vbe asọn hia ohu ne ọ mu iran ghigha gbe ighogho, ẹdẹ ghaghi gbe, ọ ghi mu vẹn.

⁷ Vbe uwu ohu ne ọ mu iran, iran ghi gbele iran ni khaemwisẹ yan iran an. Iran gbele avbe ọba iran na ọsegbe ọsegbe, sokpan, a ma miẹn ọmwa ne ọ na erhunmwu ghe mwẹ wẹ ne I yi rẹn obọ.”

Izrẹl Kevbe Avbe Uhunmwu Ẹvbo

⁸ E Nọyaẹnmwa khare wẹẹ, “Te ivbi Izrẹl ye vbe ebrẹd ne a le ghẹghẹ. Avbe uhunmwu ẹvbo ni lẹga iran, ọ re iran mu ẹtin yan.

⁹ Iran ma vbe rẹn wẹ, ne iran na mu ẹtin yan ọrriọvbe nọ, ighe te ọ ghi ye iran khian ne mitanmitan. Ẹdẹ agbọn iran rrie nẹ, sokpan iran ma rẹn.

¹⁰ Uhiomwẹ ivbi Izrẹl wa ba iran ifi ẹzọ. Vbene a rhe ru emwi ye iran aro sẹ, iran ma dọlegbe bu mwẹ gha dee, mẹ ne ọ re Nọyaẹnmwa ne Osanobua iran.

¹¹ Izrẹl gha bobo yo bobo rre zẹ vbe elikhukhu ne ọ kọẹn; vbe okaro, emwa ni lẹ bu Igipt gha khian ne ọ de yi iran obọ, iyekọni, iran vbe lẹ bu Asiria.

¹² “Sokpan, mẹ gha rhuẹ ọga ye odẹ, I gha munọ iran zẹ vbe ahianmwẹ vbe iran a gha khian. I gha rri iran oya ye emwi dan ne iran ru.

¹³ Ọghe iran fo vbotọ! Iran sẹ mwẹ rae, iran keghi sọtẹ ghe mwẹ. A gha fuẹn iran an. Te I ho ne I miẹn iran fan, sokpan ugamwẹ ohoghe ọ re iran ga mwẹ re.

¹⁴ Iran ma he ya ekhọe ẹmwata na erhunmwu ghe mwẹ ẹdẹ, ne iran gha na te ru vberriọ, iran keghi dele gbotọ, iran keghi gha go zẹ vbene iran ni ga ẹbọ ru ẹe. Iran gha na erhunmwu ye ẹmwẹ ọka kevbe ayọn, iran ghi gha giagia egbe iran, zẹ vbene iran ni ga ẹbọ ru. Erriọ avbe miẹn emwa ni sọtẹ ra!

¹⁵ “A gha rhe miẹn wẹ mẹ ọ re ọ koko iran wan, I na vbe ru ẹe ne iran wegbe, iran keghi ya gha si uma ọkhọ ghe mwẹ.

¹⁶ Iran keghi wa gha fi iyeke gbe mwẹ iran na gha lẹ bu ẹbọ ne ẹ i mwẹ ẹtin rhọkpa yo. Zẹ vbene uhanbọ ne ọ gọe ye, ne ẹ i na gia mu ẹtin yan, erriọ ọre iran ye. Rhunmwuda ẹmwẹ uhiomwẹ ne iran ta, avbe ọkaolotu iran gha wulo uwu dan, ivbi Igipt ghi vbe gha giẹ.”