Hozia 5 - Edo Bible (E Baibol Ẹdo) Version 1996

¹ “Wa danmwehọ wa ne avbe ohẹn, wa gbe ehọ kotọ wa ne ivbi Izrẹl, wa danmwehọ wa ni re ẹgbẹe ọba! Te a te wẹ ne uwa gha bu ohiẹn ẹmwata rhunmwuda ọnii, obọ ibuohiẹn gha vba uwa! Wa khian ifi ye Mizpa, kevbe ọga ne a rhuẹre ye Oke Tabọ,

² uye ne ọ dinmwi ye ore Akesia, erriọ nọ te I ra rri uwa hia oya.

³ I rẹn vbene Izrẹl ye hẹ, ẹ i sẹtin lẹre mẹ. Rẹn ma ka guobọ mwẹ ẹdẹ, emwa rẹn ma vbe sẹ ne ọ gha ga mwẹ.”

Hozia Wẹ Ne A Mwẹ Ẹwaẹn Vbe Egbe Ẹbọ Ne A Ga

⁴ Emwi dan ne emwa ni ru ma ghi gie iran dọlegbe bu Osanobua iran gha dee. Ẹbọ ne a gho la iran uhunmwu nẹ, iran ma ghi vbe kha ighe iran rẹn e Nọyaẹnmwa.

⁵ Uhiomwẹ ivbi Izrẹl ya iran rrie. Orukhọ iran ọ re ọ ye iran rrua owẹ ne iran na dele. Ivbi e Juda keghi dele ba iran.

⁶ Iran munọ ohuan kevbe ẹmila iran ne iran ya zọ ese ghe Nọyaẹnmwa, sokpan, ẹ i ruẹ ne iran. Iran i sẹtin miẹn ọẹn rhunmwuda, rẹn kpao sẹ iran rae nẹ.

⁷ Iran ma guobọ e Nọyaẹnmwa. Ivbi iran i re ọghe ọe. Rhunmwuda ọnii nian, a gha fuẹn iran kevbe otọe iran an ban.

Okuo Ne Juda Kevbe Izrẹl Gu Egbe Khọn

⁸ Wa kpe okpe okuo vbe Gibea, wa so okokoko vbe Rama. Wa tu utumwẹ okuo vbe Bẹtẹl! Ivbi e Bẹnjamin, wa la okuo.

⁹ Ẹdẹ irria ikhi dee. Izrẹl gha la ọrhiae rrie. Ivbi Izrẹl, ẹ i mwẹ ọna ma sunu.

¹⁰ E Nọyaẹnmwa khare wẹẹ, “Ohu wa mu mwẹ rhunmwuda ivbe e Juda vẹ la Izrẹl, iran keghi ya gha fu iran otọe hẹ, rhunmwuda ọnii, mẹ gha hihiẹ irriaikhi yan iran zẹ vbe orogho amẹ.

¹¹ Iran wa wọ Izrẹl uhunmwu, otọe ne ọ te re ọghe obọ ẹre, erhọkpa i ghi gue ẹe rhunmwuda, ọ keghi wa muẹn yan uhunmwu wẹ obọ emwa ne ẹ i sẹtin ru iyobọ, ọre irẹn gha na ya gha nọ iyobọ.

¹² I gha gie ọkhọ rruan Izrẹl kevbe ọfuan vbe egbe ivbi e Juda.

¹³ “Izrẹl ghi miẹn vbene obọ emianmwẹ da irẹn hẹ, e Juda ghi miẹn ẹwẹn ne egbe ẹre, Izrẹl keghi gha rrie Asiria ne ọ ya nọ iyobọ vbe obọ ọgbaisi nọkhua, sokpan, ọ ma sẹtin sinmwi iran, ra ne ọ kpe ẹwẹn iran rrie.

¹⁴ I gha gu ivbi Izrẹl kevbe Juda gbinna zẹvbe oduma. Mẹ tobọ mwẹ ọ re ọ ra yanghan iran hẹkua. Ẹghẹ ne I gha na silo iran kpao, ọmwa ne ọ gha sẹtin miẹn iran fan i rrọọ.

¹⁵ “I gha he emwa mwẹ yotọ a te do miẹn wẹ iran rri oya ye orukhọ iran sẹ nẹ, kevbe wẹ te iran ghi vbe gualọ mwẹ. Ogha kẹe, usẹ gha sẹ iran nẹ, iran gha gualọ mwẹ rre.”