Hozia 2 - Edo Bible (E Baibol Ẹdo) Version 1996

¹ Rhunmwuda ọnii, tie ivbi Izrẹl ne ihua “Ivbi Osanobua” kevbe “Ne Nọyaẹnmwa ho ẹmwẹ ọnrẹn.”

Goma Ne Ọmwoghẹ — Izrẹl Ne Ọmwoghẹ

² Wa ne ivbi mwẹ, wa gu iye uwa guan, a gha rhe miẹn wẹ, ẹ i ghi re ọvbokhan mwẹ, kevbe wẹ, mẹ i ghi vbe re ọdọ ẹre. Wa tama rẹn ne ọ dobọ ọghe kevbe ebabotu ne ọ gbe yi.

³ Adeghẹ ọ ma dobọyi, I gha bannọ ọẹn ruan ye irhunmwuirhun, egbe ne ọ gha ye vbe ẹdẹ ne a biẹ ọe. I gha ru ẹe ne ọ khian otọe ne ọ kae kevbe ne ọ dihoi rua. Ohanmwẹ amẹ ghi gbẹe rua.

^4-5 Mẹ i ra tohan ivbi ẹre. Ivbi ebabotu ne awa lalọ ẹre aro ọ re iran khin. Rẹn tobọ ẹre khare wẹẹ, “I ra bu avbe ọse ne I zẹlẹe, iran ọ re ọ ya mẹ re, iran ọ re ọ ya mẹ da, iran ọre ọ viọ eto ohuan kevbe ukpọn eto ovbiohuẹ mẹ, ofigbọn oliv kevbe ayọn.”

⁶ Rhunmwuda ọnii, I ra ya ẹti igban gba ogba ga ẹre. I ghi gbe ekẹn ya ran odẹ ọre.

⁷ Ọ gha rhie ulẹ lele avbe esiọre, sokpan ẹ i ra vba iran. Ọ gha gualọ iran, sokpan ẹ i ra miẹn iran. Ẹghẹ nii, ọ ghi kha wẹẹ, “I ra do bu ọdọ mwẹ ne I ka rọnmwẹ. Ẹghẹ nii ọre agbọn na ma mwẹ sẹ ne I ghi ye na.”

⁸ Rẹn I ra miẹnkue ighe mẹ ọ re ọ rhie ọka kevbe ayọn kevbe ofigbọn oliv ne ẹẹn, deba esiliva kevbe igoru hia ne ọ ya gho e Baal.

⁹ Rhunmwuda ọnii ọ gha sẹ ẹghẹ emwiorhọ, I gha viọ ọka ne I te ya ru ẹre ẹse werriegbe, kevbe ayọn, I gha rhie ukpọn eto ohuan kevbe eto ovbiohuẹ ne I te viọ nẹẹn ne ọ gha rhuan.

¹⁰ I gha sirra avbe ọse ne ọ zẹlẹe bannọ ọẹn ruan, ọmwa ọkpa ne ọ gha sẹtin wọlọ ẹe hin mwẹ obọ rre, ẹ i rrọọ.

¹¹ I gha dobọ ugie ne ọ do hia yi. Ugie ukpukpo kevbe ugie ukiuki ne ọ do deba, emwi ne ọ ru vbe Ẹdẹ Ikẹtin hia fẹẹrẹ, kevbe iko ugamwẹ ne ọ ko hia.

¹² I gha guọghọe rua ighe erhan ne ọ mọ ọmọ ne ọ ya ru ayọn, kevbe erhan ohọ hia, ne ọ khare ighe avbe esiọre ọ re ọ viọ ẹre ne irẹn, rhunmwuda iwinna ne ọ ye ne iran. I gha ya ogba azara ẹre kevbe erhan ohọ ẹre khian ẹgbo, aranmwẹ oha ghi rhia ẹre ua.

¹³ I gha rria ẹre ikhi ye ẹghẹ ne ọ ya mianmian mwẹ, ọ na ya gha giẹn eturari ne Baal, ọ na silo ikpẹrọnmwọ ye egbe rhikhan lele avbe esiọre. E Nọyaẹnmwa taa ẹe nẹ.

Vbene Nọyaẹnmwa Ho Ẹmwẹ Emwa Rẹn Hẹ

¹⁴ Rhunmwuda ọnii, I ra dọlegbe rhie ẹre la uwu ato, odọ niii ọ re I gha na rhẹrhọe ne I ye ẹmwẹ ahoẹmwọmwa giee werriegbe gha mwẹ aho ghe mwẹ.

¹⁵ I gha mu ogba azara ne ọ kagha mwẹ dọlegbe nẹẹn, I ghi ya Iya orueghe khian Onurho idaehọ ne ẹẹn. Ọ gha zẹ yọmwẹ re vbe odọ niii zẹ vbene ọ ka gha ru ẹghẹ ne ọ na ye kherhe, ẹghẹ ne ọ na ke Igipt rre.

¹⁶ Ẹghẹ nii ọ ghi dọlegbe gha tie mwẹ ọdọ ẹre, ẹ i ghi ra tie mwẹ e Baal ọghọe ọvbehe.

¹⁷ Mẹ i ghi ra gie ẹe dọlegbe ye so unu ye eni e Baal ọvbehe.

¹⁸ Ogha sẹ ẹghẹ nii, mẹ gha gu avbe aranmwoha hia kevbe avbe ahianmwẹ ta ẹe kugbe, ne iran ghẹ kuan emwa mwẹ ọvbehe. I gha vbe viọ emwi igbinna okuo hia hin otọe nii rre, umozo kevbe uhanbọ hia I ghi gie emwa mwẹ gha rrọọ vbe ọfumwegbe kevbe ne a i na mwẹ ẹbe.

¹⁹ Izrẹl, mẹ gha ya uwẹ ru ọvbokhan mwẹ; I gha mudia ẹse I ghi vbe gia mu ẹtin yan; I gha mwẹ itohan kevbe aho ne ẹ i beghe ghe ruẹ, I gha ya uwẹ khian ọghomwẹ ẹdẹdẹmwẹdẹ.

²⁰ I gha mu eyan mwẹ sẹ, I ghi ya uwẹ khian ọghomwẹ, wẹ ghi vbe miẹn imẹ zẹ vbe Nọyaẹnmwa ruẹn.

^21-22 Ẹghẹ ni, mẹ gha họn erhunmwu ivbi Izrẹl ne emwa mwẹ. I gha gie amẹ rhọ ye otọ, otọe ghi vbe ma ọka, alimo kevbe oliv.

²³ I gha gbe emwa ẹkun sotọ vbe otọe nii, I ghi vbe gie agbọn maa iran, I gha ho ẹmwẹ emwa ne a te tie ẹre “Na ma ho ẹmwẹ ọnrẹn,” iran ne a te tae da wẹẹ, “Iran-ire-emwa-mwẹ.” I ghi kha wẹẹ, “Emwa-mwẹ-wa-khin.” Iran ghi vbe wanniẹn wẹẹ, “Wẹ ọrọre Osanobua mwa.”