Hozia 11 - Edo Bible (E Baibol Ẹdo) Version 1996

Aho Ẹmwẹ Ọmwa Osanobua Ghe Emwa Rẹn Ni Sọtẹ

¹ E Nọyaẹnmwa khare wẹẹ, “Ẹghẹ ne Izrẹl na re ọvbokhan, I keghi gha hoẹmwẹ ọnrẹn, I keghi tie ẹre ke Igipt rre, zẹ vbe ovbi mwẹ nokpia.

² Sokpan vbene I ya gha tie ẹre, erriọ ọ re ọ ya gha lẹ mẹ. Emwa mwẹ zọ ese ne Baal, iran giẹn eturari ne amazẹ.

³ Vberriọ, mẹ ọ re ọ ma Izrẹl okhian I mu emwa mwẹ vbe ekuabọ, sokpan, iran ma miẹnkue ighe mẹ ọ re ọ gbearoghe iran.

⁴ Ahoẹmwọmwa kevbe ẹnina, ọ re I ya si iran kẹ egbe I tọn iran mu kpao vbe otọ, I keghi mu irho ye iran irho, I ghughẹ rre, I na gha koko iran.

⁵ “Iran he ne iran werriegbe bu mwẹ gha dee, rhunmwuda ọnii, Igipt iran gha werriegbe gha rrie, Asiria gha vbe gha khaemwisẹ yan iran.

⁶ Okuo gha khọn la ore iran, ọ ghi guọghọ urho ne a la la ẹvbo kua. Ọ gha rẹnkhẹn emwa mwẹ rhunmwuda, emwi ne iran ro ighe ọ maa sẹ vbe ekhọe iran ọ re iran ru.

⁷ Iran wa mu aro ye ẹmwẹ ne iran gha rhie aro lẹ mẹ. Iran gha viẹ ba ẹmwẹ urọnghọn ne ọ rre iran urhu, sokpan, iran i ra miẹn ọmwa ne ọ gha rhan ẹnrẹn hin iran urhu rre.

⁸ “Vbe I a ghi ra he uwẹ fua hẹ Izrẹl? Vbe I a ghi ra sẹtin fi iyeke gbuẹ hẹ? Mẹ gha sẹtin fuẹn uwẹ ua zẹ vbe Adma ra? Ra ne I ru uẹ vbene I ru Zẹboim? Ekhọe i sẹ mwẹ ya ru ẹe ahoẹmwọmwa mwẹ ghe ruẹ kpọlọ gbe.

⁹ Mẹ i ra ya ohu rri uwẹ oya. Mẹ i ra dọlegbe fuẹn Izrẹl rua ọvbehe rhunmwuda, Osanobua mẹ khin ighe ẹ i re ọmwa kẹkan. Mẹ, ne Ọmwa Nọhuanrẹn, mẹ gu uwẹ rrọ. Mẹ i ra ya ohu bu rua rre.

¹⁰ “Emwa mwẹ gha lele mwẹ vbe I gha van mu avbe eghian iran nẹ zẹ vbe oduma. Iran gha ke odẹ orrie rhulẹ bu mwẹ gha dee.

¹¹ Iran gha ke Igipt gha dee, zẹ vbene ahianmwẹ tin, kevbe ke Asiria gha dee zẹ vbe idu. I gha dọlegbe viọ iran gha die owa iran. Mẹ ne Nọyaẹnmwa taa ẹe nẹ.”

A Buu Ohiẹn Gbe Izrẹl Kevbe Juda

¹² E Nọyaẹnmwa khare wẹẹ, “Ivbi Izrẹl ya ohoghe kevbe erẹrẹ gha ogba ga mwẹ, te ivbi e Juda ye sọtẹ mwẹ; mẹ ne Osanobua ẹmwata nọhuanrẹn.