Hozia 10 - Edo Bible (E Baibol Ẹdo) Version 1996

¹ Te ivbi Izrẹl te yevbe erhan azara ne ọmọ gba ẹre uhunmwu. Vbene emwi ya gha maa ne iran, erriọ ọ re iran ya gha bọlọ Ogiukpo yọ. Vbene emwiokọ iran ya gha maa yọ, erriọ iran ya gha te ẹre egbe yọ ighẹ avbe okuta ẹbọ ne iran gho.

² Emwa ne ekhọe ẹre vuọn ne erẹrẹ, te iran ghi ra rrioya ye orukhọ ne iran ru. Osanobua gha guọghọ Ogiukpo iran an, ọ ghi dunmwu okuta ẹbọ iran an.

³ Avbe emwa na gha rherhe suẹn gha kha wẹẹ, “Ma i mwẹ ọba rhunmwuda, ma ma mu ohan e Nọyaẹnmwa. Sokpan, demwi ne ọba ra te miẹn ru ne ima yi amawẹ.”

⁴ Ẹmwẹ akuọkan ọ re iran ta ladian vbe unu, iran ghi vbe gha yan eyan ifianyanegbe kevbe ebe ne ẹ i mwẹ esa ne a gha rhie obọ yi. Ohiẹn ẹmwata gele khian ohiẹn ne ẹ i re ẹmwata nẹ nian, ọ gha wan khian zẹ vbe ne irunmwu eruan ye vbe otọ ne a mu ugbo yi.

⁵ Ohan gha mu emwa ni rre ore Sameria, iran ghi vbe gha khiẹ ye ẹmwẹ ẹkhuia ẹmila ne iran ya igoru ma mu ye Bẹtẹl, iran kevbe avbe ohẹn ni gho nene amazẹ gha viẹ ẹsẹse. Iran gha go ugomwẹ eve vbe ẹghẹ ne a gha na bannọ ẹre ose igoru ẹre hẹ kua.

⁶ Iran gha mu amazẹ nii gha rrie Asiria zẹ vbe emwi ne a ya yo imuohan gie ọgbaisi nọkhua nii, a gha fa Izrẹl rua, a ghi vbe ya ekhue mu ẹẹn, rhunmwuda ude ne ọ ya gha ru emwi.

⁷ A gha mu ọba ẹre kpao zẹ vbe iku erhan vbe ẹzẹ.

⁸ Aro ẹbọ ne ọ rre oke Avọn, ehe ne avbe ivbi Izrẹl na ya gha gho ẹbọ, a gha fuẹn ọnrẹn uan. Igban kevbe irunmwu gha zọ vbe Ogiukpo iran. Emwa nii gha go tama avbe oke nekhua wẹẹ, “Viọ ima lẹre!” Kevbe avbe oke negiẹrẹ wẹẹ, “Guẹ ima muotọ!”

E Nọyaẹnmwa Bu Ohiẹn Izrẹl

⁹ E Nọyaẹnmwa khare wẹẹ, “Avbe ivbi Izrẹl ma he dobọ orukhọ ne a ru ghe mwẹ yi, kevbe ne iran ya rukhọ vbe Gibea gha dee. Rhunmwuda ọnii, e Gibea ọ re okuo ra na ya khu iran mu.

¹⁰ I gha dekun emwa orukhọ na, I gha rri iran oya. Avbe uhunmwu ẹvbo gha ku obọ gbe mu aro da iran, a gha vbe rri iran oya ye orukhọ iran nibun ẹsẹse.

¹¹ “Ẹghẹ ọkpa, te Izrẹl te ye vbe oteghe ẹmila ne a ma ẹre emwi ẹsẹse, ne ọ mu egbe kevbe ne ọ vbe ho ne ọ gha wiẹn ọka vbe ẹghẹ hia. Sokpan, mẹ keghi kha wẹ, te I gha rhie urọnghọn ye ẹyaẹn rẹn ne mose mose na, te I gha vbe gbalọ ẹre egbe khẹ iwinna ne ọ wegbe sẹ ọnii. I keghi ru ẹe ne Juda gha si emwi ne a ya vulo otọ, Izrẹl keghi vbe si emwi ne a ya guọghọ otọ.

¹² Mẹ keghi kha wẹẹ, ‘Ya gua ehe ne ọ maa ọghe obọ ruẹ, kọ emwiokọ uhunmwu ẹmwẹ ne u vbe rhọ afiangbe ne ọ gha ladian vbe ekhọe esi ne u ya ga mwẹ. Ẹghẹ sẹe nẹ ne u ya bu mwẹ gha dee, mẹ ne Nọyaẹnmwa ruẹn, mẹ gha rre I ghi vbe do rhọ afiangbe yan ruẹn.’

¹³ Sokpan, u keghi ya kọ emwi dan, u na vbe rhọ ọmọ rẹn. U rrii ọmọ ne ohoghe ne u ta mọẹn nẹ. Rhunmwuda ne u na mu ẹtin yan avbe ikẹkẹ okuo ruẹ, kevbe avbe ivbiyokuo ruẹ nibun,

¹⁴ okuo gha bu emwa ruẹn rre, a gha vbe guọghọ avbe ẹvbo ruẹ ne a gbe odin ga hia. Te ọ ra yevbe ẹdẹ ne Sialmaa ne Ọba dunmwu ore Betabẹl vbe okuo, ne a na vbe dunmwu emọ kevbe iye iran an.

¹⁵ Erriọ ọ ra sunu vbe egbe uwa ne ivbi e Bẹtẹl, rhunmwuda emwi dan ne ọ muohan ne u wa ru. Okuo gha wa da suẹn nii, ọba Izrẹl ghi wu.”