Hozia 1 - Edo Bible (E Baibol Ẹdo) Version 1996

¹ Ọna ọrọre uhunmwu ne Nọyaẹnmwa gie ẹre re ighe Hozia ne ovbi e Biẹri vbe ẹghẹ ne avbe Uzaia, Jotan, Ehaz kevbe Hẹzekaia na gha re ọba e Juda, ne Jeroboam ne ovbi e Jehoas na gha re ọba Izrẹl.

Amwẹ Kevbe Ivbi E Hozia

² Ẹghẹ ne Nọyaẹnmwa na gie Hozia uhunmwu gie ivbi Izrẹl vbe okaro, ọ tama Hozia wẹẹ, “Ya rhie okhuo; amwọn gha wa gha ghẹẹ, te emọ ne u ra biẹlẹ ra wa vbe yevbe irẹn. Erriọ wa vbe nọ, emwa mwẹ sẹ mwẹ rae, iran ma ghi guobọ mwẹ.”

³ Ẹre Hozia na ya rhie okhuo ọkpa ne a tie ẹre Goma ne ovbi e Diblem. Ugbẹn vbe iran ghi biẹ ovbi iran ne ọdiọn, okpia nọ, e Nọyaẹnmwa keghi tama e Hozia wẹẹ,

⁴ “He ẹre ‘Jizrẹl’ rhunmwuda, vbe ọ ma he kpee wan, I gha rri ọba Izrẹl oya ye izigha ne erha ẹe odede ighe Jehu dee vbe Jizrẹl. I ra fiaẹn fua ighe uniẹn Jehu.

⁵ I gha fuẹn ẹtin ivbiyokuo Izrẹl vbe Iya e Jizrẹl vbe ẹghẹ nii.”

⁶ E Goma keghi vbe biẹ ovbi ẹre ne ukpogieva, okhuo ọre ọna gha khin. E Nọyaẹnmwa keghi tama e Hozia wẹẹ, “He ẹre ‘Loruhama,’ ọnii nọ wẹ Ne ama ho ẹmwẹ ọnrẹn, rhunmwuda, mẹ i ghi ra dọlegbe ho ẹmwẹ ivbi Izrẹl ra ne I ya orukhọ bọ iran.

⁷ Sokpan, I gha ho ẹmwẹ ivbi Juda. Mẹ ne Nọyaẹnmwa ne Osanobua iran gha miẹn iran fan, sokpan ẹ i re okuo I ra ya ru ẹe, ẹ i re umozo, uhanbọ kevbe ifẹnmwẹ, ẹ i re vbekpa ẹsin kevbe emwa ni hin ẹsin.”

⁸ E Goma ghi vbe fian ovbi ẹre ewẹn nẹ, ọ keghi vbe dọlegbe hanmwa, ọ na vbe biẹ ọmokpia ọvbehe.

⁹ E Nọyaẹnmwa keghi tama Hozia wẹẹ, “He ẹre ‘Loammai,’ ọnii nọ wẹẹ, ‘Ẹ i re emwa mwẹ,’ rhunmwuda ivbi Izrẹl i re emwa mwẹ, mẹ i vbe re Osanobua iran.”

A Gha Dọlegbe Rhie Izrẹl Ye Ihe

¹⁰ Ivbi Izrẹl gha do gha yevbe ikpẹ ekhae ni rre okun, iran ghi gha re ne a i sẹtin ka ra ne a mwa rẹn. Banbanna nian Osanobua tama iran wẹẹ, “Wa i re emwa mwẹ.” Sokpan, ẹdẹ dee ne ọ gha tama iran wẹẹ, “Wa ọrọre ivbi Osanobua ne ọ rrọọ!”

¹¹ A gha ku ivbi Izrẹl kevbe ivbi e Juda kugbe ne iran gha re ọkpa. Iran ghi koko tobọ iran zẹ olotu ọkpa. Iran ghi dọlegbe gha bun yọ, agbọn ghi maa iran vbe otọe iran. Ẹn, ẹdẹ nọkhua ọre ẹdẹ, Jizrẹl ra gha khin.