Hibru 9 - Edo Bible (E Baibol Ẹdo) Version 1996

Ugamwẹ Vbe Agbọn Kevbe Ẹrinmwi

¹ Ile ne okaro mwẹ ilele ọghe vbene a ya ga hẹẹ, ọ vbe mwẹ ehe ne ọmwa ye obọ ru ne a na vbe ga.

² Iran keghi gbe Ọgua ukpọn, ne ọ ke ore vbọ, a kegha tie ẹre Ehe Ne ọ Huanrẹn. Emwi ne ọ rre emwa kegha re, ukpa, eteburu kevbe ebrẹd ne a ya fi ohan ne Osanobua.

³ Vbe iyeke ukpọn ne a ya fian ẹn ne ogieva, ọre Ọgua nọkpa ye ne a tie ẹre Ehe Ne ọ Huan Sẹẹ Ehia.

⁴ Uwu emwa ọre Ogiukpo ọghe igoru ne a na giẹn eturari, ke ẹe kevbe ẹkpẹti kevbe ne a ya igoru rhu. Emwi ni rre uwu ẹkpẹti na kegha re ovbi uru igoru ne a viọ e mana yi, ọkpọ erhan Errọn ne ọ gbe ukhu, kevbe uhanhan okuta eva ne agbẹnnẹ ẹmwẹ ile nii yi.

⁵ Vbe odukhunmwu ẹkpẹti na, iran keghi sa ama emwi ne a yi ni mwẹ uyi yọ, ena keghi mudia ye ama Ọ rre emwa ọghe Emwi ne Osa ya ru Osa, iran keghi tan ifuẹn gue ehe ne a na ye orukhọ bọ emwa. Sokpan ma i he miẹn ẹghẹ ya rhan otọ emwi hia fo fẹẹrẹ nian.

⁶ A ghẹ ghi mwamwa emwi na hia nẹ, ẹdẹgbegbe ọre avbe ohẹn ya la Ọgua ukpọn ne ọ ke ore, ne iran ya gha winna iwinna iran.

⁷ Sokpan Ogie Ohẹn ọkpa ọre ọ la Ọgua ukpọn ne ọ ke uwu ẹre, uhukpa ọre ọ vbe ru vberriọ vbe ukpo. Ọ ghi mu esagiẹn mwẹ, ọnii ọre ọ ya zọ ese ne egbe ẹre, kevbe ye orukhọ ne emwa ni hia ru, vbe ne iran ma na rẹn.

⁸ Orhiọn Ne Ọ Huanrẹn wa ya avbe emwamwa na rhie maa zẹẹ wẹ, ugbẹn vbe Ọgua ukpọn ne ọ ke ore he ye rre evba, a ma he kie urho ne a la sẹ Ehe Ne ọ Huan Sẹẹ Ehia nii.

⁹ Ọna keghi re ama emwi ne ya gie ẹghẹ na ye na. Ọ rhie maa wẹ, emwi imuohan kevbe avbe aranmwẹ ne a ya zọ ese ghe Osanobua, ẹ i sẹtin ye ekhọe emwa ni ga khian ne ọ gbae.

¹⁰ Emwi ni rrọọ ma gberra evbare, evba da kevbe ulamwẹ ọkpe huan ughughan, ilele ọghe ore egbe kẹkan, ọre ena hia khin, ne a miẹn wẹ, ọ mwẹ esa ne ọ ye, ọ te do sẹ ẹghẹ ne Osanobua gha na fi emwi hia werriẹ ne ọ dọlọ iran yi.

¹¹ Sokpan Kristi rre nẹ, zẹ vbe Ogie Ohẹn ọghe avbe emwi ni maa ni rre emwa na nẹ, Ọgua ukpọn ne irẹn na ga, keghi re ne ọ kpọlọ sẹẹ, kevbe ne ọ vbe gba na sẹẹ, ẹ i re emwa ne agbọn ọre ọ ru ẹe, ọnii nọ wẹ, ẹ i re ọkpa vbe uwu emwi ni rre agbọn ne a yi na.

¹² Ẹghẹ ne Kristi na la Ọgua ukpọn ni gberra, ne ọ na vbe la uwu esagiẹn ẹwe ra ẹmila, ne ọ ya zọ ese, sokpan, ọ keghi mu esagiẹn ọghe egbe ẹre, ọ na rhie imiẹnfan ẹtẹbitẹ gie ima.

¹³ Esagiẹn ẹwe kevbe ẹmila nii, kevbe emuẹn ese ne a giẹn uan nii, a ghi bọnmwẹ ọẹn yan iran ni ma huan vbe ọghe ilawo iruemwẹ ugamwẹ, ọ ghi ya iran khian ni huanrẹn zẹ vbe ọghe ilawo iruemwi ugamwẹ.

¹⁴ Ugbẹn vbe a ghi miẹn wẹ ẹmwata ọna khin, Inuinu ọre ne esagiẹn Kristi gha ru ya kpọlọ sẹẹ! Ọ la ekpa Orhiọn etẹbitẹ nii ya egbe ẹre zọ ese ne ọ gbae ghe Osanobua. Esagiẹn ọnrẹn ọre ọ gha khuẹ ekhọe orhiọn mwa huan hin obọ iwinna ọrhiae rre, ne ima miẹn ehe na gha ga Osanobua ne ọ rrọọ.

¹⁵ Rhunmwuda ọnii, ọre a na miẹn wẹ, Kristi ọre ọ mwamwa ile ọghọgbọn, ne afiangbe etẹbitẹ ne Osanobua ve, miẹn ehe na sẹ iran obọ ighẹ avbe emwa ne Osanobua tie re. Te ọna ghi gia ru nian, rhunmwuda, ọmwa ọkpa wu, ne ọ fannọ emwa hin orukhọ ne iran ru ẹghẹ ne iran na gha rre ototọ ile ne okaro rre.

¹⁶ A gha miẹn ebe ne a gbẹn ya gha ukhu, a ghi ghe ẹre deghẹ ọmwa ne ọ gbẹn ọẹn wu nẹ.

¹⁷ Rhunmwuda ebe igha ukhu, ẹ i zẹdẹ mwẹ esa vbe ọmwa ne ọ gbẹn ọẹn a ye gha rre agbọn, ọ gha wu nẹ ọkpa ọre a na yae ru emwi.

¹⁸ Ọre a na miẹn wẹ, ile ne okaro nii, esagiẹn ọ re a ya mu vbene ọ khare sẹ.

¹⁹ Okaro, Mosis keghi talọ ẹmwẹ uhi na ma emwa nii, zẹ vbene a gbẹn ye nene Uhi. Vbe iyeke ọnii, ọ keghi mu esagiẹn ẹmila ke ẹe kevbe amẹ, ọ keghi ye hisọp kevbe iku oru ododo, sanmwẹ ọẹn ku ebe nene Uhi kevbe avbe emwa nii.

²⁰ Ọ keghi kha wẹ, “Esagiẹn na ọre a ya yi ẹre okhi ighẹ ile ne Osanobua ye ẹre iyi ne uwa, ne uwa gha muẹn sẹ.”

²¹ Erriọ vbe nọ, Mosis keghi vbe miẹn esagiẹn yan Ọgua ukpọn nii, kevbe avbe emwi ne a lo vbe ẹghẹ ugamwẹ.

²² Vbe ẹmwata, zẹ vbene Uhi khare, esagiẹn ọre a ya ye emwi hia huan, a deghẹ a ma da esagiẹn ye otọ, orukhọ ne a ya bọ ẹ i rrọọ.

Ese Kristi Kpe Orukhọ Kua

²³ Odẹ vbe nian, ọre a ya ya iran khian ni huanrẹn ighẹ a vbe emwi na ni re ama ne a ya taa ọghe ẹmwata ni rre ẹrinmwi. Sokpan ni wa rre ẹrinmwi ni rrọọ, emwi ni maa sẹ ena ọre a ya zọ ese ẹre.

²⁴ Rhunmwuda, ẹ i re Ehe Ne ọ Huanrẹn ne emwa ye obọ ru, ne a ya ta ọghe ẹmwata ne ọ rrọọ, ọre Kristi lao. Ẹrinmwi fẹẹrẹ rẹn wa gha rrie, ehe ne ọ na mudia ne ima nian vbe odaro Osanobua.

²⁵ Ogie Ohẹn a vbe Ju, uhukpa vbe ukpo ọre ọ la uwu Ehe Ne ọ Huanrẹn, irẹn kevbe esagiẹn aranmwẹ ne ọ mu mwẹ. Sokpan Kristi ma la evba ya ye egbe ẹre zọ ese kugba kẹghẹrẹ.

²⁶ Akpawẹ erriọ nọ, ẹghẹ ni bun ọre ọ gha ya rri oya ke ne agbọn ya suẹn gha dee. Sokpan rẹn keghi ladian nian uhukpa ọghe ọfo vbe otọ, ne ọ do ya egbe ẹre zọ ese ya kpe orukhọ kua, vbe ẹghẹ na ne emwi hia ni rrọọ ghi na ye egbe rrie ufomwẹ.

²⁷ Rhunmwuda uhukpa ọre dọmwadẹ ọghọe ra wu, vbe iyeke ọnii, Osanobua ghi bu ohiẹn ọnrẹn.

²⁸ Erriọ vbe nọ zẹẹ, a keghi ya Kristi zọ ese uhukpa, ne ọ viọ orukhọ emwa ni bun gha rrie. Ọ gha ye vbe ya egbe ladian uhukpa, ẹ i ghi re ne ọ do guan ye ẹmwẹ orukhọ, sokpan ne Ọ do miẹn iran fan ighẹ avbe emwa ni mudia khẹ ọre.