Hibru 8 - Edo Bible (E Baibol Ẹdo) Version 1996

Jesu Ogie Ohẹn Mwa

¹ Uhunmwu uta ẹmwẹ ne ima guan yan ọrọre wẹẹ, ma mwẹ Ogie Ohẹn ne ọ ye vbe nian na, ọmwa ne ọ tota ye obọ erha ọmwa Ẹtin Emwi Ne Osa ya ru Osa vbe ẹrinmwi.

² Rẹn mudia ye ukpo ogie ohẹn vbe Ehe Ne Ọ Huan Sẹẹ Ehia, ọnii nọ wẹ, vbe uwu Ọgua nọ gua nii, ne Nọyaẹnmwa tobọ ẹre bọe ighẹ ẹ i re ne ọmwa ne agbọn họe.

³ Te a ma dọmwadẹ ogie ohẹn wẹ, ne ọ gha ya emwi mu ohan, kevbe ne ọ gha ya aranmwẹ zọ ese ghe Osanobua, rhunmwuda ọnii, te ogie ohẹn ọghomwa gha vbe mwẹ emwi ne ọ gha ya mu ohan.

⁴ Akpawẹ agbọn na ọre ọ ye, ẹ i ghẹ gha re ohẹn hiehiere, rhunmwuda wẹ, avbe ohẹn rrọọ ni ye emwi mu ohan, zẹ vbe vbene Uhi avbe Ju mwamwa ẹn.

⁵ Iwinna ne iran winna zẹ vbe ohẹn, te a yae taa ama ọghe vbene a ru ẹe vbe ẹrinmwi. Erriọ ọ vbe ye, zẹ vbe ne ọghe Mosis vbe gha ye. Ẹghẹ ne ọ khian na bọ Ọgua ukpọn nii, Osanobua tama rẹn wẹẹ, “U ghi miẹn wẹ, vbene ne a mu ma ruẹn vbe uhunmwu oke gha ye, ọre uwa ru ehia re.”

⁶ Sokpan vbene ọ ye na, a mu iwinna ohẹn ne ọ kpọlọ sẹẹ ọ ghe iran ẹsẹse ne Jesu nẹ, zẹ vbene ile ne irẹn mwamwa ẹn ye ẹkpo Osanobua kevbe emwa ne agbọn, vbe maa sẹ, rhunmwuda, emwi ne a ve ne ọ vbe maa sẹ, ọre a hẹnhẹn ọẹn yan.

⁷ Akpawẹ te ile ne okaro maa, a ghẹ ghi vbe gha gualọ ne ukpo ogieva.

⁸ Sokpan te Osanobua miẹn emwi ne a ma ru ẹse vbe obọ emwa rẹn, ọre ọ na kha wẹẹ, “Ẹdẹ dee, erriọ Nọyaẹnmwa khare. Ne I gha gu emwa Izrẹl ta ile ọgbọn, debe emwa Juda.

⁹ Ẹ i ra ye vbe ile ne I gu erha iran ta, vbe ẹdẹ ne I rhie iran obọ su iran ladian vbe otọ Igipt. Iran ma mu ile ne I gu iran ta sẹ. Rhunmwuda ọnii, mẹ ma ghi zẹ ye iran re, erriọ Nọyaẹnmwa kha re.

¹⁰ Banbanna nian, ile ne U ghi ra gu iran ta ọna khin. Vbe iyeke avbe ẹdẹ nii, erriọ Nọyaẹnmwa khare: I gha rhie uhi mwẹ ye ẹko iran, I ghi vbe gbẹn ọẹn ye iran ekhọe, Mẹ ghi gha re Osanobua iran, Iran ghi gha re emwa mwẹ.

¹¹ Ọkpa ne ọ gha ghi vbe gha ma ihua ẹre emwi i rrọọ, ra ne ọmwa ọkpa vbe tama ovbi ẹvbo ẹre wẹẹ, ‘Rẹn Nọyaẹnmwa.’ Rhunmwuda, iran hia gha rẹn mwẹ, ke egbe ne ọ kanmwa sẹ ya sẹ ne ọ kpọlọ sẹ.

¹² I gha mwẹ itohan ghe abakuru iran, I i ghi ra vbe ye orukhọ iran rre ọvbehe.”

¹³ Vbene ọ ghi na guan kan ile ọgbọn nian, Osanobua ye ne okaro khian ọwiẹyi nẹ. Emwi ne ọ ghi khian ọmaẹn nẹ ighẹ ọ vbe rẹnhuan nẹ, ẹ i ghi kpẹe a ke ho ẹre bẹkun.