Hibru 7 - Edo Bible (E Baibol Ẹdo) Version 1996

Mẹlkizẹdẹk

¹ Mẹlkizẹdẹk ne a kha na, kegha re Ọba Salẹm, ọ keghi vbe gha re ohẹn ọghe Osanobua Ne ọ yo sẹ. Ugbẹn vbe Ebraham ghi ke ehe ne ọ na gbele avbe ọba isẹn dee, Mẹlkizẹdẹk keghi khian dekun ẹnrẹn, ọ na fiangbẹe.

² Ebraham keghi wa emwi ne ọ gu ẹe ye ihe igbe, ọ na viọ obọkpa nẹẹn vbọ. (Emwi ne a mobọ ya Mẹlkizẹdẹk kha ọrọre “Ọba Ẹmwata.” Rhunmwuda ne ọ na vbe re ọba ọghe Salẹm, emwi ọvbehe ne a ghi vbe ye eni ẹnrẹn kha keghi re “Ọba ọghe ọfumwegbe.”)

³ Emwi rhọkpa i rrọọ ne a gbẹn ye otọ vbe ekpa erha ra iye Mẹlkizẹdẹk ra vbe ekpa uniẹn kevbe ekhuarha ẹre, a ma rẹn vbene a ya biẹ ọe hẹ ra vbene ọ ya wu hẹ. Te irẹn yevbe Ovbi Osanobua, ọ na gha re ohẹn ẹdẹdẹmwẹdẹ.

⁴ U gha la ekpa ọna rẹn vbene ọ kpọlọ sẹ hẹ. Ebraham ne erha odede keghi wa emwi ne ọ viọ rre vbe okuo ye ihe igbe, ọ na viọ obọ ọkpa nẹẹn vbọ.

⁵ Ivbi uniẹn Livai ni re ohẹn, te nene Uhi yi ẹre iyi ne iran wẹ, ne iran gha miẹn emwa Izrẹl obọ ọkpa vbe uwu igbe, ọnii nọ wẹ, obọ ivbi ẹvbo iran ọre iran na miẹn rẹn, a gha rhe miẹn wẹ ivbi uniẹn Ebraham iran vbe khin.

⁶ Mẹlkizẹdẹk i re ovbi uniẹn Livai, sẹ evba, ọ keghi miẹn Ebraham obọ ọkpa vbe uwu igbe, ọ na fiangbẹe ighẹ ọmwa ne Osanobua ve ẹre emwi.

⁷ Agbọn hia rẹnrẹn ighẹ ọmwa ne ọ fiangbe ọmwa ọre ọ kpọlọ sẹ ọmwa ne ọ fiangbe.

⁸ Zẹ vbe ọghe avbe ohẹn nii, emwa ni wulo ọre ọ viọ aghaeyihigbe nii, sokpan zẹ vbe ọghe Mẹlkizẹdẹk, ọmwa ne ọ rre agbọn ọre ọ viọ awaye-ihe-igbe nii, zẹ vbene ebe kha re.

⁹ A sẹtin ta ẹe nian wẹ, ẹghẹ ne Ebraham na hae aghaeyihigbe nii, Livai (ne uniẹn ọnrẹn ghi do gha miẹn iran nene aghaeyihigbe) vbe zọe.

¹⁰ Rhunmwuda, a ma he biẹ Livai ẹghẹ ni, sokpan a sẹtin kha wẹ uwu egbe Ebraham ne erhae odede ọre ọ ye vbe ẹghẹ ne Mẹlkizẹdẹk na miẹn ọẹn.

¹¹ Obọ uniẹn ivbi e Livai ni re ohẹn, ọre a la mu Uhi aghaeyihigbe ye otọ ne ivbi Izrẹl. Vbene ọ ghi ye na nian, akpawẹ te avbe ohẹn ne ivbi e Livai gbae fo, a i ghẹ ghi vbe wẹ ne a vbe dọlegbe rhie ohẹn ọvbehe ladian, ne ọ re uviẹn Mẹlkizẹdẹk, ne ẹ i re ọghe Errọn.

¹² Rhunmwuda, a gha fiohan werriẹ, ẹghẹ nii, te a ghi vbe fi uhi werriẹ lele ẹe.

¹³ E Nọyaẹnmwa ne a ta ẹmwẹ na vbe ekpa ẹre na, uniẹn ughaẹn rẹn khin, ivbi uniẹn ni ma he winna iwinna ohẹn vbe Ogiukpo ẹdẹ.

¹⁴ Agbọn hia rẹnrẹn ighẹ uniẹn Juda rẹn la rre. Mosis ma ye unu kan uniẹn na vbe ẹghẹ ne ọ na gha ta ẹmwẹ avbe ohẹn.

Ohẹn Ọvbehe Ne Ọ Yevbe Mẹlkizẹdẹk

¹⁵ Ẹmwẹ na la ọwara sẹ ayọ nẹ nian: ohẹn ughaẹn rrọọ nẹ, ne ọ yevbe Mẹlkizẹdẹk.

¹⁶ Ẹ i re iyi kevbe emwamwa ọghe emwa ne agbọn ọre a lele ma ẹre ohẹn, ẹtin ọghe arrọọ ne ẹ i mwẹ ọfo, ọre ọ la ekpa ẹre khian ohẹn.

¹⁷ Rhunmwuda, ebe tae wẹ, “Wẹ gha rri ohẹn ẹdẹdẹmwẹdẹ vbe uviẹn Mẹlkizẹdẹk.”

¹⁸ Te a mu emwamwa nẹdẹ fua khekherriọ rhunmwuda wẹ, ẹ i mwẹ ẹtin, ẹ i vbe mwẹ esa ne ọ ye.

¹⁹ Rhunmwuda, Uhi e Mosis i sẹtin ya emwikemwi khian ne ọ gbae fo. Wanwanna nian, a rhie idaehọ ọkpa ne ọ maa sẹ, ye otọ nẹ, ne ima gha la bu Osanobua gha dee.

²⁰ Ye vbe sẹ ọnii, emwi ne Osanobua yan rẹn vbe rre evba. Egbe eyan vberriọ ma gha rrọọ vbe ẹghẹ ne a na mannọ iran nekpa ohẹn.

²¹ Sokpan, la ekpa eyan rre, ọre Jesu ya khian ohẹn vbe Osanobua tama rẹn wẹ, “Nọyaẹnmwa yan nẹ, ẹ i ra vbe fi ekhọe werriẹ: ‘Ohẹn ọre u ra gha khin ẹdẹdẹmwẹdẹ.’ ”

²² Alughaẹn ne ọ rrọ na, keghi rhie maa nian wẹ, Jesu ọrọre ama ne aro ya dae wẹ, ile ne ọ maa sẹ ọre ọ na khin.

²³ Alughaẹn ne egbe ọvbehe ye vbe rrọọ, avbe ohẹn nekpa nii, wa bun, rhunmwuda wẹ, te iran vbe wulo, iran i ghi vbe sẹtin gha winna iwinna iran khian.

²⁴ Sokpan te Jesu wa rrọọ ẹdẹdẹmwẹdẹ, iwinna rẹn zẹ vbe ohẹn i vbe re ne a ghi mu ne ọmwa ọvbehe.

²⁵ Rhunmwuda ọnii, te irẹn ghi sẹtin miẹn emwa ni la obọ ẹre bu Osanobua gha dee fan, vbe ẹghẹ na, kevbe ẹghẹ hia, rhunmwuda, rẹn wa rre agbọn ẹdẹdẹmwẹdẹ, ne ọ gha rinmwian ne iran.

²⁶ Rhunmwuda ọnii nian, Jesu ọrọre Ogie Ohẹn ne ọ sẹe ne a gha ye enegbe mwa yan! Ọmwa ne ọ huanrẹn nọ, rẹn i mwẹ a baku ru ra orukhọ vbe obọ ẹre, a wannọ ẹn ye efẹn ọkpa hin ehe ne emwa orukhọ ye rre, a keghi vbe tọn ẹn mu yo sẹ a vbe ẹrinmwi.

²⁷ Rẹn i yevbe avbe igie ohẹn nekpa, ẹ i vbe ka zọ ese ye orukhọ obọ ẹre nẹ ẹdẹgbegbe, zẹ vbe emwi ne ẹ i mwẹ a ma ru, ọ keghi do zọ ye ọghe emwa nekpa. Ọ zẹ ese nẹ uhukpa nii, ne emwa hia, vbe ẹghẹ ne ọ na ye egbe ẹre zọ ese.

²⁸ Emwa ne ọ ma khia na, ọre Uhi e Mosis zẹlẹ ye ukpo igie ohẹn, sokpan ẹmwẹ eyan Osanobua, ne ọ ghi do kiekie rre khẹ nene Uhi, keghi zẹ Ovbi Osanobua ọmwa ne a ya khian ne ọ gba na fo nẹ rhinrin ẹdẹ.