Hibru 6 - Edo Bible (E Baibol Ẹdo) Version 1996

¹ Rhunmwuda ọnii, wa gia na na sikẹ odaro, ne a ya guan yan avbe emwi ni dinmwi, ne a sẹ avbe ikpogho ẹmwẹ ikpo orhu Iyayi e Kristi rae nẹ. Ma i ghi ra vbe dọlegbe gha gbe ẹyotọ ọghe ne a sẹ iwinna ne ẹ i mwẹ esa rae ye otọ, ne a do ya Osanobua yi.

² Iruẹmwi vbe ekpa isamẹ kevbe obọ ne a viọ yan emwa uhunmwu, ọghe a huẹn eniwu kpaegbe kevbe ibuohiẹn etẹbitẹ.

³ Gie ima nana sikẹ aro erriọ ma ra ruẹe, a deghẹ Osanobua kue yọ.

⁴ Rhunmwuda, vbe a ra ya viọ iran ni dele hin iyayi rre dọlegbe gha dee hẹ yi, ne iran do ro iro fi ekhọe werriẹ? Iran ka gha rre uwu uwanmwẹ Osanobua vbe ẹghẹ ọkpa yi. Iran danmwẹ ghe vbe ọhẹ ọghe ẹrinmwi, iran keghi vbe ghae vbe Orhiọn Ne Ọ Huanrẹn.

⁵ Emwi ne a ru ne iran miẹn, rhie maa iran wẹ, ẹmwẹ Osanobua maa, iran kevbe danmwẹ ghe vbe ẹtin ọghe ẹghẹ ne ọ dee.

⁶ Vbe iyeke ọna, iran keghi lahin iyayi iran rre. Ẹ ghi gia ru ne a viọ iran werriegbe rre do roiro fi uyinmwẹ werriẹ, rhunmwuda, te iran vbe dọlegbe kan Ovbi Osanobua mu ugbugbe, iran keghi fa ẹre ua vbe sirra emwa hia.

⁷ Te Osanobua fiangbe otọ ne ọ ya amẹ wọn vbe amẹ a rhọ yọ nẹ, ne ọ vbe zọ erhan ne a ya ru emwi kpataki ladian ne iran ni gbe ẹre ugbo.

⁸ Sokpan, a deghẹ ọ zọ igban kevbe irunmwu ladian, ọ rhiae nọ, ọ mu egbe ẹre ye ne Osanobua gha na fi ẹre unu, a ghi ya erhẹn fuẹn ọnrẹn uan.

⁹ Wa ne ọse mwẹ, ma gha rhe gha guan vbenian, afianma uwa i fian mwa. Ma rẹnrẹn ighẹ, wa mwẹ afiangbe ne ọ maa sẹ ena, ni re ọghe imiẹnfan uwa.

¹⁰ Osanobua i re ọmwa ne ẹ i ru emwi ẹse. Ẹ i ra mianmian iwinna ne uwa winnaẹn, ra vbene uwa ya rhie maa hẹ ighẹ wa ho ẹmwẹ ọnrẹn, vbe ekpa iyobọ ne uwa gha rhie ne ivbi iyayi ne iho uwa, kevbe ne uwa ye rhie ne iran do sẹ banbanna.

¹¹ Emwi ne ima mobọ ho ọrọre wẹ, ne dọmwadẹ ọghọe vbe uwu uwa ye obọ da isasegbe ne ọ guẹe yi, ya sẹ ufomwẹ, ne emwi ne uwa rhie aro yi sẹtin gha ye rriọ.

¹² Ma i ho ne uwa gha si oroho, sokpan ne uwa gha ye vbe emwa ni yayi ni vbe mwẹ iziengbe, ne emwi ne Osanobua ve sẹtin sẹ uwa obọ.

Emwi Ne Osanobua Ve Ne Ẹ I Baku

¹³ Ẹghẹ ne Osanobua na ve Ebraham emwi ọ keghi yan wẹ, rẹn gha ru vbene irẹn ve. Ugbẹn vbe a miẹn wẹ, ọmwa ne ọ kpọlọ sẹ irẹn i ghi rrọọ, ọ keghi ye eni egbe ẹre yan nene eyan.

¹⁴ Ọ keghi kha wẹẹ, “I yan ma ruẹn wẹ, I gha fian gbe uẹ, I ghi vbe viọ uniẹn ni bun nuẹn.”

¹⁵ Ebraham mwẹ iziengbe, rhunmwuda ọnii emwi ne Osanobua ve keghi sẹ ọre obọ.

¹⁶ Ọmwa gha yan, ọ ghi ya eni ọmwa ne ọ kpọlọ sẹ irẹn yan. Eyan ọre ọ ta ọfo ye imuaẹmwẹ hia, ne emwa gu egbe muan.

¹⁷ Osanobua keghi ho ne ọ rhie maa emwa ne emwi ne irẹn ve gha sẹ ọre obọ hia wẹ, rẹn i ra fi ekhọe werriẹ: rhunmwuda ọnii, ọ na rhie eyan na te emwi ne ọ ve.

¹⁸ Rhunmwuda ọnii khekherriọ, emwi eva na ọre ọ rrọọ ne ẹ i sẹtin fiwerriẹ, kevbe vbe ekpa ne Osanobua i na sẹtin ta ohoghe. Rhunmwuda ọnii, te ọna rhie igiẹdu ne ima ni lẹ fe ye ehe ne ọ ye nẹ, ne ima da ẹe yi gbain ighẹ idaehọ ne a rhie ima aro yi.

¹⁹ Ma keghi mwẹ idaehọ na, zẹ vbe okpo ne ọ da owa yi ọghe ekhọe mwa, ẹbe i rrọọ, te ọ vbe deziẹn gbain, ọ kevbe la ukpọn ne a ya fian ọgua Osa gberra gha, rrie ehe ne Ogiukpo nọkhua ye.

²⁰ Jesu ka ke odaro nẹ, gha rrie evba nii, ne ima. Rẹn keghi vbe khian ogie ohẹn etẹbitẹ lele uviẹn ọghe Mẹlkizẹdẹk.