Hibru 5 - Edo Bible (E Baibol Ẹdo) Version 1996

¹ Ogie Ohẹn ke ogie ohẹn, ọkpa vbe uwu emwa nii, ọre a na zẹ ọe ne ọ do gha ga Osanobua ne iran hia. Rẹn ghi gha yo imuohan, ọ ghi vbe gha zọ ese ye orukhọ.

² Rhunmwuda ighẹ odẹ ni bun ọre irẹn ma na gba, rẹn tobọ ẹre ọ ghi gha ye obọ nekhuẹrhẹ mu iran ni ma rẹn ne a ye, kevbe ni ha emwi ku ru.

³ Kevbe rhunmwuda ighẹ ọ ma vbe khia ne irẹn fo, ọ ghi gha zọ ese, ẹ i ghi re ọghe orukhọ avbe emwa nii ọkpa, sokpan kevbe ọghe irẹn tobọ ẹre.

⁴ Orhunmwu ọkpa ne ọ tobọ ẹre mu ọghọ akpa ogie ohẹn yọ egbe ẹre, ẹ i rrọọ. Osanobua ọre ọ zẹ ọmwa ne a ya ma ogie ohẹn, zẹ vbene a zẹ Errọn.

⁵ Erriọ vbe nọ zẹẹ, ẹ i re te Jesu wa tobọ ẹre tọn uyi ogie ohẹn mu yan egbe ẹre. Sokpan te Osanobua tama rẹn wẹẹ “Ovbi mwẹ ọre u khin, Ẹdẹnẹrẹ na I khian Erha a.”

⁶ Ọ keghi vbe ta ẹe vbe ehe ọvbehe wẹẹ, “Ohẹn ọre u khian gha khin ẹdẹdẹdẹ, vbe uniẹn ohẹn ọghe Mẹlkizẹdẹk.”

⁷ Vbe ẹghẹ ne Jesu na gha rre agbọn na, utumwẹ nọkhua kevbe ameve ọre ọ ya gha nọ emwi vbe obọ Osanobua ne ọ gha sẹtin fan irẹn ye otọ vbe obọ uwu. Rhunmwuda ighẹ ọ mu egbe rri otọ ọ keghi vbe mu aro yọ. Osanobua keghi họn erhunmwu ẹnrẹn.

⁸ A gha rhe miẹn wẹ, Ovbi Osanobua ọre irẹn gha khin sẹ evba, te ọ ye la ekpa oya ne ọ re ruẹ, vbe ne a họn ẹmwẹ hẹẹ.

⁹ Ugbẹn vbe a ghi ya ẹe khian enọgbae na nẹ, rẹn keghi do khian ehe ne imiẹnfan etẹbitẹ ke rre ne iran hia ni họn ẹmwẹ nẹẹn.

¹⁰ Osanobua keghi tie ẹre ogie ohẹn vbe uviẹn ọghe Mẹlkizẹdẹk.

Ibude Ye Ẹmwẹ Ne A Ghẹ Ya Khian Ne Ọ Lahin Iyayi Rre

¹¹ Emwi wa rrọọ ne a gha guan yan ẹmwẹ na ẹsẹse, sokpan ọ wa lọghọ ne a rhan otọ ẹre ma uwa, rhunmwuda, wa i rherhe rẹn otọ emwi.

¹² Ẹghẹ te sẹ nẹ ne uwa tobọ uwa gha ya gha re emamwaemwi, sokpan te uwa ye gualọ ọmwa ne ọ gha ma uwa ikpe orhu ẹmwẹ Osanobua. Ne uwa gha na gha rri evbare ne evbare, ewẹn uwa ye wẹn.

¹³ Ọmwaikọmwa nọ wẹn ewẹn, ọvbokhan he ye nọ, ne ọ ma kue rẹn enaye vbe a gha ta ẹmwẹ emwi ne ọ gbae ra ne ọ ma gba.

¹⁴ Evbare ne ọ wo vbe egbe, ọghe avbe eniwanrẹn nọ, iran ni ma unu iran ẹre, ne iran vbe gha ya ẹe rẹn alughaẹn ne ọ rre ẹkpo emwi ne ọ maa kevbe ne ẹ i maa.