Hibru 4 - Edo Bible (E Baibol Ẹdo) Version 1996

¹ Banbanna nian, Osanobua tama ima ye otọ nẹ wẹ ma sẹtin la owa ne a ya gu ẹe kẹtin. Rhunmwuda ọnii wa gie ima gha mwẹ imuohan, ne a ghẹ miẹn wẹ, a miẹn orhiọnkpa vbe uwu uwa ne ọ ma sẹtin la uwu ikẹtin nii.

² Rhunmwuda, ma họn nene Iyẹn Ne ọ maa nẹ zẹ vbene iran vbe họn ẹn. Iran họn nene iyẹn ne ọ maa, sokpan ọ ma mwẹ emwi esi ọkpa ne ọ ru ne iran, rhunmwuda, ẹghẹ ne iran na họn ẹn iran ma ya iyayi miẹn rẹn.

³ Ma ne ọ rhan obọ miẹn rẹn, ma gha lao owa ya gu Osanobua hẹ wẹ. Vbe ne irẹn ta ẹe zẹẹ wa nọ wẹẹ, “Ohu mu mwẹ, I keghi yan wẹ: ‘Iran i ra la owa do gun mwẹ kẹtin!’ ” Ọ ta ẹmwẹ na egbe ne a rhe ya miẹn wẹ, ọ winna iwinna rẹn fo nẹ vbe ẹghẹ ne ọ na yi agbọn na.

⁴ Rhunmwuda vbe uwu ebe, iran guan kan ikpẹdẹ ne ogihinrọn, “Osanobua keghi hẹwẹ vbe iwinna rẹn hia.”

⁵ A ye vbe dọlegbe guan kan ẹmwẹ ọkpa na. “Iran i ra la owa do gun mwẹ hẹwẹ.”

⁶ Iran ni ka họn Iyẹn Ne ọ maa na, ma la owa ya gu Osanobua hẹwẹ, rhunmwuda iran ma yayi. Rhunmwuda ọnii, emwa ọvbehe rrọọ khekherriọ ne a ghi giẹe la owa ya gu Osanobua hẹwẹ.

⁷ A rẹnrẹn ighẹ erriọ nọ, rhunmwuda Osanobua keghi vbe bu ẹdẹ ọvbehe ne ọ tie ẹre “Ẹdẹnẹrẹ” Okiekie, vbe iyeke ukpo ni bun, ọ keghi vbe do dọlegbe la unu Devid guan kan rẹn vbe ebe ne a ka so unu yi wan wẹẹ, “Wa gha họn urhu Osanobua ẹrẹna, wa ghẹ ze vbe udu.”

⁸ Rhunmwuda, akpawẹ Jọsua viọ iran sẹ ihe ikẹtin ọghe Osanobua, Osanobua ghẹ ghi vbe do bu ẹdẹ ọvbehe vbe okiekie.

⁹ Vbene ọ rhirhi gha ye hẹ, vbene ọ ghi ye na nian, ọrọre wẹ, ikẹtin ọkpa ye rrọọ ne emwa Osanobua ne ọ vbe khọ vbene Osanobua hẹwẹ vbe ikpẹdẹ ne ogihinrọn.

¹⁰ Rhunmwuda, ọmwaikọmwa ne ọ la owa ya gu Osanobua hẹwẹ, gha zobọ vbe iwinna ne ọ winna, zẹ vbene Osanobua vbe zobọ vbe iwinna ọghọe.

¹¹ Rhunmwuda ọnii, wa gie ima ziga ne a la owa ya gu Osanobua hẹwẹ. Wa ghẹ gie ima rhọkpa yin ehọ, zẹ vbe ne iran ru ne iran ma na ghi la owa.

¹² Rhunmwuda, ekpakpasusu ọre ẹmwẹ Osanobua khin. Ọ mu sẹ agbadakagba ne ọ mwẹ unu eva, te ọ fiaẹn la ehia fo, ya sẹ ehe ne orhiọn kevbe ekhọe na sikan mu egbe, kevbe ehe ne akhuẹn kevbe efun ne ọ rre uwu ugboloko na vba egbe. Rẹn ọre ọ ta vbene iziro kevbe aho ekhọe emwa ne agbọn ye hẹ.

¹³ Emwi ọkpa ne a sẹtin rhie lẹre ne Osanobua ẹ i rrọọ. Emwi hia ni rre ehe ne agbọn sẹe ehe ne ọ rhanmwẹ, te a fannọ ehia a, a na vbe wa ẹre ye otọ vbe odaro ẹre. Rọẹn ni ọre ima ra ya ye unu mwa na iyẹn egbe mwa ma.

Jesu Ne Ogie Ohẹn Nọkhua

¹⁴ Rhunmwuda ọnii, wa gie ima dae yi gbain ighẹ iyayi ne ima tobọ mwa lao, rhunmwuda ma mwẹ ogie ohẹn nọkhua ne ọ kpao gha rrie odaro Osanobua zẹẹ, ọnii ọre Jesu ne Ovbi Osanobua.

¹⁵ Ogie Ohẹn ọghomwa, ẹ i re ne ẹnina ọmwa i sẹtin la ẹre ekhọe vbe ẹmwẹ evburriẹ mwa. Sokpan Ogie Ohẹn ọghomwa keghi re ne avbe la odẹ hia danmwẹ ghe zẹ vbene ima ye, sokpan ọ ma ru orukhọ.

¹⁶ Rhunmwuda ọnii, wa gie ima din khekherriọ, ne a gha die odaro ẹkete Osanobua, ehe ne ẹsọhẹ ye. Evba nii i ọre ima gha na miẹn itohan rhie kevbe ẹsọhẹ ne ọ gha yi ima obọ vbe ẹghẹ ne a na gualọe zẹẹ.