Hibru 3 - Edo Bible (E Baibol Ẹdo) Version 1996

Jesu Kpọlọsẹ Mosis

¹ Etẹn mwẹ vbe uwu Kristi, emwa ne Osanobua vbe tie. Wa ghe Jesu ne Osanobua gie ne ọ do gha re Ogie Ohẹn ọghe iyayi mwa.

² Rhunmwuda te irẹn wa gha re ne ọ gia mu ẹtin yan vbe odaro Osanobua, ọmwa ne ọ gi ẹe ne ọ do winna iwinna na, zẹ vbe ne Mosis vbe gha re ne ọ gie mu ẹtin ya, vbe uwu iwinna rẹn vbe igiowa Osanobua hia.

³ Ọmwa ne ọ bọ owa ọre ọ mwẹ uyi sẹ nene owa tobọ ẹre. Erriọ vbe nọ, Jesu ọre uyi khẹke sẹ Mosis.

⁴ A rẹnrẹn ighẹ, owa hia mwẹ ọmwa ne ọ bọ ẹe, Osanobua ọrọre ọmwa ne ọ bọ emwi hia.

⁵ Mosis kegha re ọmwa ne ọ gia mu ẹtin yan vbe igiowa Osanobua hia. Ọguọmwadia rẹn gha khin, ọ kegha ta ẹmwẹ emwi ne Osanobua ra do ta vbe ẹghẹ ne ọ dee.

⁶ Sokpan Kristi kegha re ne ọ gia mu ẹtin yan, zẹ vbe Ọmọ ne a gbe aro ghe owa erha ẹe. Ma na ọrọre owa ẹre, a deghẹ ma ya obọ da ẹtin mwa kevbe a muẹtinyan mwa yi mwẹ, vbe ọghe emwi ne ima mwẹ idanmwehọ ẹre.

Ikẹtin Ne Emwa Osanobua

⁷ Rhunmwuda, zẹ vbene Orhiọn Ne Ọ Huanrẹn ta ẹe, “Wa gha họn urhu Osanobua,

⁸ Wa ghẹ ze vbe udu, vbe ne uwa ka ru ẹghẹ ne uwa na sọtẹ Osanobua, vbene uwa gha ye vbe uwu ato ẹkporriọ ne uwa na gha danmwẹ ọẹn ghe.”

⁹ Osanobua khare wẹ, “Evba ọre avbe erha uwa odede na gha danmwẹ mwẹ ghe, vbe gualọ mwẹ ẹmwẹ ne unu. Egbe ne iran rhe ya miẹn ne I ru, vbe ọwara ukpo iyeva.

¹⁰ Rhunmwuda ọnii, ọre ohu emwi ni na mu mwẹ. I keghi kha wẹ, ‘Ẹghẹ hia iran ya ba odẹ ku vbe iro ne iran zẹ. Iran ma he ye rẹn uyinmwẹ mwẹ.’

¹¹ Ohu mu mwẹ, ‘I keghi yan wẹ iran i ra la owa do gun mwẹ kẹtin.’ ”

¹² Etẹn mwẹ, wa mwẹ ẹwaẹn, ne a ghẹ ya miẹn arhiọnkpa vbe uwu uwa ne ọ mwẹ ekhọe dan, kevbe ne ẹ i yayi, sẹrriọ, ne ọ gha na fi iyeke gbe Osanobua ne ọ rrọọ.

¹³ Sokpan na ghẹ miẹn wẹ orukhọ rẹrẹ eso vbe uwu uwa do ya ẹe gha ze vbe udu, wa ghi gha ru iyobọ ne egbe ẹdẹgbegbe, ugbẹn vbe a miẹn wẹ “Ẹdẹnẹrẹ” ne ebe khare ye dekan ima.

¹⁴ Rhunmwuda, otu Kristi ma hia ye, deghẹ ma mu uhunmwu kọ ẹe gbangbaangban, ya sẹ ufomwẹ, ighẹ a mu ẹtin yan ne ima gha mwẹ vbe omuhẹn.

¹⁵ Ẹmwẹ ne ebe tae ọna khin, “Wa gha họn urhu Osanobua ẹre na, wa ghẹ ze vbe udu vbene uwa ka ru ẹghẹ ne uwa na sọtẹ Osanobua.”

¹⁶ De emwa ni họn urhu Osanobua ne ọ na sọtẹ ọre yi? Ẹmwata, emwa hia ne Mosis hẹ ke Igipt ladian nọ.

¹⁷ De emwa ne Osanobua ya ukpo iyeva mu ohu ghe yi? Ọ mu ohu iran ni ru orukhọ, ne iran na vbe dele wu vbe uwu ato.

¹⁸ Ẹghẹ ne Osanobua na yan wẹ, “Iran i ra la owa do gun mwẹ kẹtin,” de emwa ne ọ kha yi? Iran ni sọtẹ ọre ọ kha.

¹⁹ Ma miẹn ọẹn nian wẹ iran ma sẹtin la owa rhunmwuda iran ma yayi.