Hibru 12 - Edo Bible (E Baibol Ẹdo) Version 1996

Osanobua Ne Erha Mwa

¹ Zẹ vbe ọ ghe ima, ma mwẹ osẹe ọkhọngborrie ni lẹga mwa, rhunmwuda ọnii wa gie ima bannọ idobo hia kua, kevbe orukhọ ne ọ rhikhan obọ mu ọmwa, wa gie ima mu aro ye ẹmwẹ ulẹ ne ọ rre ima otọ.

² Wa gie ima rhie aro da Jesu, ọmwa ne iyayi mwa ya iyeke-kọ ke omuhẹn ọnrẹn ya sẹ ufomwẹ ọnrẹn. Rẹn ma rhunmwuda ugbugbe zẹ obọ vbọ, sokpan rhunmwuda oghọghọ ne ọ diakhẹ ọre, ọ ma zẹdẹ mu ẹmwẹ efaa ne ọ rre ne a wu vbe uhunmwu ugbugbe ro. Banbanna nian, ọ tota vbe obọ erha ọmwa ọghe ẹkete Osanobua.

³ Wa roro emwi ne ọ ye egbe miẹn, vbene ọ ziengbe hẹ vbe emwa orukhọ khọ ẹko ẹre, rhunmwuda ọnii, wa ghẹ gie egbe wọ uwa ne uwa zẹ obọ vbọ.

⁴ Rhunmwuda, vbe uwu igbinna ne uwa gu orukhọ gbinna, ọ ma he sẹ egbe ne a ghi na te ra gbele uwa a.

⁵ Te uwa ghi mianmian ra ighẹ ẹmwẹ igiẹdu ne Osanobua tama uwa zẹ vbe ivbi ẹre? “Ovbi mwẹ, rhie aro ye otọ vbe Nọyaẹnmwa a gha gbe uẹ hin ọkhọ rre, deghẹ ọ vbe gu ẹ gui ghẹ gie egbe wọ ruẹ.

⁶ Rhunmwuda ne Nọyaẹnmwa ho ẹmwẹ ọnrẹn, ọre ọ gbe hin ọkhọ rre. Ne ọ tie ẹre ovbi ẹre, ọre ọ gbe ẹre asan.”

⁷ Emwi ne uwa a rhirhi gha rri oya ẹre, wa ziengbe ẹre zẹ vbene a miẹn wẹ ke obọ erha uwa rre nọ, rhunmwuda oya ne uwa re rhie maa ighẹ obọ ne a ya mu ọmọ, ẹre Osanobua ya mu uwa. Wẹ he miẹn ọmọ ne erha ẹe i gbe hin ọkhọ rre ra?

⁸ Deghẹ rẹn ma gbe uwa hin ọkhọ rre zẹ vbene ọ ru ivbi ẹre nekpa, wa i ghi re emọ kherriọ, umwọbọ nọ.

⁹ Zẹ vbene erha ima ni rre agbọn na ye, iran gbe ima hin ọkhọ rre, ma ghi ye vbe gha ye ọghọ ne iran. Inuinu ọ ghi wa ya ke sẹẹ, ne ima gha gbe uhunmwu ke otọ ne Erha mwa vbe ọ ghe orhiọn! Ne ima vbe die agbọn ya.

¹⁰ Ovbi ẹghẹ kherhe ọre erha ima vbe ọghe agbọn na, ya gbe ima hin ọkhọ rre zẹ vbene ọ vbe kei yi vbe aro iran. Sokpan te Osanobua ru ẹe, ne umamwẹ mwa, ne ima miẹn ehe na gu ẹe ghae vbe uhuanmwẹ ọnrẹn.

¹¹ A gha gbe ima hin ọkhọ rre, vbobọ vbobọ nii, ọ ghi ye vbe ne a miẹn wẹ, te a wa ho ne a rhia ima ekhọe rua, ighẹ i re ne ọ ya ẹe rhiẹnrhiẹn. Sokpan Ọ ghẹ ghi sẹ okiekie, a vbe emwa ne a gu gui vberriọ dia ye odẹ, ghi do miẹn ẹdẹ agbọn nekhuẹrhẹ, ọ ghe ọmwa ẹmwata, rhie vbọ.

Igiodẹ Kevbe Atama Ọmwa Ye Otọ

¹² Rhunmwuda ọnii, wa gie obọ uwa ne lughọlughọ si tua, wa vbe gie igbọn ne ọ rhie gbe egbe de ziẹn.

¹³ Wa gha la odẹ ne ọ diae khian, ne owẹ arọe nii ghẹ wa khian ne ẹ i ghi mwẹ vbe ọ gie a ya ru sokpan, ne ọ khian ne a mu ẹre egbe rran.

¹⁴ Hia ne u gu emwa hia gha rrọọ vbe ọfumwegbe, kevbe ne u vbe yin uyinmwẹ, ne ọ huanrẹn, rhunmwuda vbe ne ọnii i na rrọọ, orhiọnkpa ne ọ gha sẹtin miẹn Nọyaẹnmwa aro, ẹ i rrọọ.

¹⁵ Wa khẹ ye egbe, ne ọmwaikọmwa ghẹ ya fi iyeke gbe ẹsọhẹ Osanobua. Wa mwẹ ẹwaẹn, ne ọmwaikọmwa ghẹ ya khian utẹzi ne ọ gha wan nẹ, ọ ghi ye obi ẹre gha kpokpo emwa ni bun.

¹⁶ Wa mwẹ ẹwaẹn, ne ọmwaikọmwa ghẹ ya khian ne ọ gbe alama ra ne ẹ i zẹ ye ẹmwẹ orhiọn, zẹ vbe ne Isọ gha ye, ne ọ na rhunmwuda ekan unu ọkpa mu ukpo ọmọ ọdiọn ne ọ ye khiẹn.

¹⁷ Wa rẹnrẹn wẹ, vbe okiekie, ọ keghi te gha ho ne erha ẹe fiangbe irẹn sokpan, a keghi khu ẹe werriegbe rhunmwuda, ọ ma miẹn odẹ ne ọ ya fi emwi ne ọ ru nẹ werriẹ, a gha rhe miẹn wẹ ameve ọ ya gha rinmwian.

¹⁸ Wa ma he sẹ eke ne ọ gha da uwa egbe, zẹ vbene ọ ghe ivbi Izrẹl gha ye vbe Oke Sainai, ke ẹe kevbe erhẹn ọnrẹn ne ọ ba gidigidi, ebiebi kevbe okuku kevbe okpẹhoho.

¹⁹ Urhu okpe kevbe owogho uvannọmwẹ. Ugbẹn vbe iran ghi họn urhu nii, iran keghi rinmwian wẹ, ne iran ghẹ ghi dọlegbe họn ifi ẹmwẹ ọkpa sẹẹ ọnii.

²⁰ Rhunmwuda, egbe iran ma rrọ uhi ne a yi wẹ, “A gha rhe wẹ aranmwẹ ọre ọ ya obọ kan oke ni, te a gha filo okuta gbe ẹe ua.”

²¹ Ọ mu ohan sẹrriọ ne a ghe wẹ, Mosis keghi kha wẹẹ, “I guọe zẹzẹzẹ, ohan keghi mu mwẹ.”

²² Sokpan, uhunmwu Oke Zaiọn ọre uwa gha dee kevbe ẹvbo Osanobua, Jerusalẹm ne ọ rre ẹrinmwi, ke ẹe kevbe odibo Osa ẹre ne ẹgbenuri.

²³ Wa kegha die uwu ẹbu oghọghọ ivbi Osanobua nii, ke aro emwa ne a gbẹnnẹ eni iran ye otọ vbe ẹrinmwi. Wa keghi hu Osanobua ne ọre ne ọ bu ohiẹn emwa hia gha dee ke ẹe kevbe orhiọn avbe emwa ẹmwata ne a ya khian ne ọ fo na.

²⁴ Wa keghi bu Jesu gha dee, ọmwa ne ọ mwamwa ile ọgbọn nii ye otọ kevbe esagiẹn ne agbe kha kha, ne ọ vbe ta ẹmwẹ emwi ni maa sẹ esagiẹn ọghe Ebẹl.

²⁵ Rhunmwuda ọnii nian, wa ghi mwẹ ẹwaẹn wa ghẹ rhie obọ khiọ ehọ ne uwa ghẹ miẹn ehe na họn ẹmwẹ ọmwa ne ọ guan. Iran nọ ma danmwehọ ọmwa ne ọ kpe orhu iyẹn ne ọ huanrẹn vbe agbọn na, ma miẹn uhunmwu. Vbe ọmwa ghi ra na miẹn uhunmwu hẹ khekherriọ deghẹ ọ wẹ rẹn i danmwehọ ọmwa ne ọ guan ke ẹrinmwi rre?

²⁶ Te urhu ẹre mu otọe agbọn rueghe ẹghẹ nii. sokpan wanwanna nian, rẹn tae nẹ wẹ, “Ẹ i re otọ agbọn ọkpa I gha dọlegbe mu rueghe, sokpan, kevbe ẹrinmwi ba ẹre.”

²⁷ Ne ọ na kha wẹ, “dọlegbe,” wa rhie maa wẹ, emwi ne a yi hia ọre a gha mu rueghe, a ghi viọ iran hin rre, ne ọ miẹn ehe na do kẹe avbe emwi ne a ma mu rueghe.

²⁸ Rhunmwuda ọnii nian, wa gie ima kpọnmwẹ ye ọna wẹ, arriọba ne a i sẹtin mu rueghe ọre ọ sẹ ima obọ. Wa gie ima kpọnmwẹ Osanobua ne a vbe gae vbe ọghọ kevbe ute, zẹ vbe ne ọ gha yẹ ọre.

²⁹ Rhunmwuda Osanobua mwa, erhẹn ne ọ fuẹn emwi uan nọ.