Hibru 11 - Edo Bible (E Baibol Ẹdo) Version 1996

Iyayi

¹ Ne a gha mwẹ iyayi ọrọre ne I aro ọmwa da emwi ne a mwẹ idanmwehọ ẹre, ne ekhọe ọmwa mu emwi ne a ma he dẹghe.

² Iyayi iran ọre avbe emwa nẹdẹ ya gbe rhie okun vbe obọ Osanobua.

³ Iyayi ọre ima ya rẹn wẹ, ẹmwẹ unu ọre Osanobua ya yi ẹrinmwi kevbe agbọn, ne a na miẹn wẹ uwu emwi ne a i bẹghe ọre a ke yi emwi ne a bẹghe ladian.

⁴ Iyayi ọre Ebel ya zọ ese ne ọ maa sẹ ọghe Ken ghe Osanobua. Rhunmwuda iyayi ẹre, ọre Osanobua na kae ye ọmwa ẹmwata, rhunmwuda Osanobua tobọ ẹre rhan ohọ miẹn emwi imuohan rẹn.

⁵ Iyayi ọre ọ ma gie Inọk wu. Ne ọ gha na te wu, a keghi tọn ẹn mu bu Osanobua gha khian, ọmwa rhọkpa ma ghi vbe miẹn ọẹn, rhunmwuda, Osanobua rhie ẹre gha rrie odukhunmwu. Ebe khare wẹ, vbe a te do tọn Inọk mu, ọ ya ẹko rhiẹnrhiẹn Osanobua.

⁶ Ọmwa ne ẹmwẹ ọnrẹn gha ye ẹko rhiẹnrhiẹn Osanobua ẹ i rrọọ vbe ẹ i re vbe ekpa iyayi. Rhunmwuda, ọmwaikọmwa ne ọ rhirhi bu Osanobua gha dee te ọ kere ne ọ yayi ighẹ Osanobua rrọọ kevbe wẹ, ọ vbe san iran ni gualọ aro ẹre ẹse.

⁷ Iyayi ọre ọ ya Noa họn ẹmwẹ ne Osanobua tama rẹn ye otọ, vbe ekpa emwi ne ọ gha he sunu vbe ẹghẹ ne ọ dee, ne irẹn ma he dẹghe. Rẹn keghi ru vbene Osanobua kha re, ọ keghi kan okọ ne irẹn kevbe ẹgbẹe ọre na miẹn uhunmwu. Odẹ vbe nian, rẹn bu abe gbe agbọn, ọ keghi ya iyayi khian ọmwa. ẹmwata vbe obọ Osanobua.

⁸ Iyayi ọre ọ ye. Ebraham họn vbe Osanobua tie ẹre, ọ na gha rrie ẹvbo ne Osanobua ve ẹre re wẹ, rẹn gha rhie nẹẹn. Rẹn keghi kpao vbe ẹvbo irẹn rre, vbe ne ọ ma na rẹn ehe ne ọ rriẹ.

⁹ Vbe ekpa iyayi, rẹn keghi yin ẹvbo nii ne Osanobua ve ẹre re, vbene a miẹn wẹ orhunmwuyẹn rẹn khin. Rẹn keghi yin okhogbo ukpọn, irẹn kevbe Aizik kevbe Jekọb ne Osanobua vbe ve ẹre emwi vberriọ.

¹⁰ Rhunmwuda, te Ebraham gha mudia khẹ ẹvbo nii ne Osanobua mwamwa ẹn ọ na vbe bọ ẹe, ẹvbo nii ne ọ mwẹ ẹyotọ etẹbitẹ.

¹¹ Iyayi ọre ọ do ya Ebraham khian ebaba, egbe ne a rhe ya miẹn wẹ, ọ khian ọmaẹn gbe nẹ, kevbe wẹ, Sera ne amwẹ ọnrẹn keghi vbe gha re agan. Ọ keghi mu ẹtin yan Osanobua wẹ, ọ gha ru vbene ọ khare.

¹² A gha rhe miẹn wẹ, esa ne ọ wu nẹ rẹn gha ye, sẹ evba, egbe orhiọnkpa na, ọre ọ na suẹn ighẹ uniẹn ne ọ ghi do ye vbe orhọnmwẹ ni re aro iso, kevbe zẹ vbe ikpẹ ekhae ne a i sẹtin ka, ni rre ọkpẹn okun.

¹³ Uwu iyayi ọre iran na hia na wulo. Emwi ne Osanobua ve ma he sẹ iran obọ, sokpan urria gbaan iran na bẹghe iran, iran keghi rhan obọ miẹn iran, iran keghi ye unu iran miẹn kue ma emwa hia wẹ, erhunmwuyẹn kevbe ekhẹn ọre iran khin vbe agbọn na.

¹⁴ Emwa ni guan vberriọ wa rhie maa wẹ, ẹvbo ne ọre ọghe iran ọre iran gualọ khian.

¹⁵ Iran ma ghi vbe mu ẹmwẹ ẹvbo ne iran kpao sẹ rae ro, akpawẹ te iran ru vberriọ, otọ te wa rrọọ ne iran ya werriegbe.

¹⁶ Sokpan, ẹvbo ne ọ maa sẹ ọnii ọre iran rhie aro yi, ẹvbo ẹrinmwi. Rhunmwuda ọnii, ekhue ẹre i mu Osanobua vbe ọ wẹ ne iran gha tie irẹn Osanobua iran, rhunmwuda, ọ rhie ẹvbo ye otọ khẹ iran nẹ.

¹⁷ Iyayi ọre ọ ya Ebraham ya Aizik ne ovbi ẹre zọ ese vbe Osanobua danmwẹ Ebraham ghe. Ebraham ọrọre ọmwa ne Osanobua ve ẹre emwi, sẹ evba, ọ keghi wa ye mu egbe ne ọ ye ovbi ẹre ne ukpọmọkpa zọ ese.

¹⁸ Osanobua ka tama rẹn nẹ wẹẹ, “Urho Aizik ọre u ra na gha mwẹ uniẹn ruẹn.”

¹⁹ Te Ebraham wa rhie aro yọ wẹ, Osanobua gha sẹtin dọlegbe huẹn Aizik kpaegbe vbe idin, a sẹtin kha khekherriọ wẹ, a gele rhie Aizik ke idin werriegbe gie Ebraham.

²⁰ Iyayi ọre Aizik ya tae ighẹ agbọn gha ma Jekọb kevbe Isọ.

²¹ Iyayi ọre Jekọb ya na erhunmwu ne ọkpọkpa vbe ivbi e Josẹf vbe ọ te wu, ọ keghi ye ọkpọ tua otọ, ọ na ga Osanobua.

²² Iyayi ọre a ya miẹn wẹ, ọ ghi bu ẹghẹ ne Josẹf ra ya wu, ọ keghi ye unu kan ẹmwẹ vbene ivbi Izrẹl gha kpao vbe Igipt rre hẹẹ, ọ na tama iran vbene iran gha ru ikun irẹn hẹẹ.

²³ Iyayi ọre ọ ya evbibiẹ Mosis rhie ẹre lẹre la uki eha, iyeke vbe a biẹ ọe nẹ. Iran miẹn wẹ, ọmọ ne ọ mose nọ, rhunmwuda ọnii, afianma ma fian iran vbe iran rra uhi ọba.

²⁴ Iyayi ọre a na miẹn wẹ ugbẹn vbe Mosis ghi wan nẹ, ọ ma kue ne a gha tie irẹn ovbi ovbi e Fero ne okhuo.

²⁵ Rẹn gu emwa Osanobua rri oya ọre ọ yẹ ọre sẹẹ, ne ọ gha ku obọ ye uwa vbe uwu orukhọ vbe ovbi ẹghẹ kherhe.

²⁶ Rẹn roro ẹe wẹ ne a rri oya a ye ọmwa gbe ogie rhunmwuda e Mẹzaia, ọre ọ maa sẹ ẹfe ni rre Igipt hia, rhunmwuda rẹn rhie aro ye ẹse ne a gha do san irẹn re ẹdẹ ne ọ dee.

²⁷ Iyayi ọre Mosis ya kpao vbe Igipt rre vbene afainma ohu ọghe ọba ma na fian ẹn, ọ ma werriegbe, ọ keghi ye vbene a miẹn wẹ rẹn bẹghe Osanobua ne a i bẹghe.

²⁸ Iyayi ọre ọ ya mu emwiukpo Alagberra gbọọ, ọ na wẹ ne a sanmwẹ esagiẹn ye onurho ne ogiuwu ghẹ gbele emọ ọdiọn ọghe Izrẹl.

²⁹ Iyayi ọre ivbi Izrẹl ya fian Okun Ne ọ baa rraa, vbene a miẹn wẹ otọ, ne ọ kae ọre nọ. Ivbi Igipt ghi te ra vbe ru vberriọ, amẹ keghi minọ iran re.

³⁰ Iyayi ọre ọ mu ekẹn Jẹriko gbe otọ, iyeke vbe ivbi Izrẹl ye ikpẹdẹ ihinrọn khian lẹga ẹre nẹ.

³¹ Iyayi ọre ọ ma gie a gbe Rehab ne ebabotu be emwa ni ma họn ẹmwẹ ne Osanobua, rhunmwuda rẹn keghi miẹn iran ne avbe ọrhẹ yi.

³² Ne I ye gha kọ ẹre khian ra? Ẹghẹ i ghi sẹ mwẹ ya kpa itan ọghe Gidiọn, Barak, Samsin, Jẹfta, Devid, Samuẹl kevbe avbe akhasẹ.

³³ Iyayi ọre iran ya gu agbọn ẹvbo ni bun khọn, iran na vbe khọnmiotọ. Iran ru emwi ne ọ kere, emwi ne Osanobua ve keghi sẹ iran obọ. Iran gue avbe oduma unu.

³⁴ Iran dọ ogidi erhẹn yọ, iran lẹ fe vbe obọ umozo ne ọ tera gbele iran uan. Te iran te vburriẹ, sokpan iran keghi do wo vbe egbe. Iran zẹ uza vbe okuo, iran keghi khọn ivbiyokuo etẹ muotọ.

³⁵ Vbe ekpa iyayi, a keghi huẹn ivbi ikhuo ni te wulo nẹ kpaegbe viọ ne iran. Eso vbọ keghi he vbe a te ra fannọ iran kua, iran keghi wulo ye uwu ekuẹnkuẹn, ne a miẹn ehe na huẹn iran ye arrọọ ne ọ maa sẹ ọnii.

³⁶ A ye eso gbe ogiẹ, a gbe iran asan, a keghi munọ eso gbalọ hẹ ku uwu ẹwẹdọ.

³⁷ A filo okuta gbele iran uan, a sọ iran ye eva, a ya umozo gbele iran uan. A ya iran kin ughe vbene a na yọ iran ohian ẹwe ra ọghe ohuan, ivbiogue, ne a zẹ ọre owẹ kevbe ne a ru ẹre emwi oya.

³⁸ Agbọn na ma maa sẹ ne iran. Iran kegha kun yo kun rre vbe uwu ato kevbe uhunmwu oke, zẹ vbe emwa ne ẹ i mwẹ owa, iran kegha di uwu uvun okuta kevbe uvun otọ ya.

³⁹ U miẹn emwi ne iran na he ya iyayi iran ru! Sẹ evba, emwi ne Osanobua ve ma sẹ iran obọ.

⁴⁰ Rhunmwuda, Osanobua ru emwamwa nọ maa sẹẹ ọnii ye otọ khẹ ima nẹ. Iro ọghọe nọ wẹ, ẹghẹ mwa ọkpa ọre iran gha na do dunna fo.