Hibru 10 - Edo Bible (E Baibol Ẹdo) Version 1996

¹ Uhi avbe Ju i re ama ẹmwata ne ọ gbae, ne a ya gie nene emwi tobọ ẹre. Te ọ te ra ye vbe emwi ne ọ khọ uwa ne ọ dee kherhe. Ese ọkpa ni ọre a zọọ ẹdẹdẹmwẹdẹ, ke ukpo dinna ukpo. Vbe nene Uhi i ghi ra na sẹtin ya egbe zọ ese vbe nian ye emwa ni bu Osanobua rre khian ni gbae hẹ?

² Akpawẹ a gele khuẹ emwa ni ga Osanobua huan hin orukhọ iran rre, ekhọe iran i ghẹ ghi vbe gha bu abe orukhọ gbe iran ọvbehe, ẹghẹ ni, ese ne a zọ hia ghẹ ghi dobọ yi.

³ Sokpan, vbene ọ ghi ye na nian, te ese ne a zọọ nii ghi ye emwa ẹmwẹ orukhọ iran rre, ke ukpo dinna ukpo.

⁴ Rhunmwuda esagiẹn ẹmila kevbe ọghe ẹwe i sẹtin kpe orukhọ khua.

⁵ Ọna ọre ọ si ẹe ne a na miẹn wẹ ugbẹn vbe Kristi ghi ra gha die agbọn, ọ keghi kha wẹẹ, “Wẹ i gualọ ese ra emwi imuohan aranmwẹ, sokpan, wẹ ru egbe ọkpa ye otọ mẹ nẹ.

⁶ Ikun aranmwẹ na giẹn uan ya zọ ese vbe uhunmwu aka i yẹ ruẹ. Ra ese ne a zọ ne ọ kpe orukhọ kua.

⁷ Rhunmwuda ọnii ọre I mẹ na kha wẹẹ, ghe mwẹ vbe emwa na Osanobua. Ne I ru ne uwẹ ho ne I ru zẹ vbene a gbẹn ọẹn ye otọ mẹ vbe ebe nene Uhi.”

⁸ Okaro, ọ keghi kha wẹẹ, “Wẹ i ho ese ne a ya aranmwẹ zọọ ra ne a ya mu ohan, ẹ i vbe yẹ ruẹ, ra ọghe aranmwẹ ne a ya zọ ese ne a giẹn rẹn vbe uhunmwu aka, ne ọ kpe orukhọ kua.” Ọ ye ta ẹe vberriọ, egbe ne a rhe ya miẹn wẹ, avbe ese ne a zọ re na hia, vbene nene Uhi wẹ ne a ru ẹe, ọre nọ.

⁹ Iyeke ọnii, ọ keghi kha wẹẹ, “Ghe mwẹ Osanobua, ne I do ru vbene u ho ne I ru.” Rhunmwuda ọnii, te Osanobua viọ avbe ese nẹdẹ ni kua ọ keghi rhie izọese Kristi ye ihe iran.

¹⁰ Rhunmwuda wẹ Kristi ru zẹ vbene Osanobua ho ne ọ ru, ma keghi khian ne a khuẹ hin orukhọ ima ne, rhunmwuda ese ne ọ ya egbe ẹre zọ uhukpa ne ọ fo vbe otọ.

¹¹ Dọmwadẹ ohẹn avbe Ju, te ọ mudia winna iwinna rẹn ẹdẹgbegbe, ọ ghi vbe gha zọ ese ọkpa ni yan egbe yan egbe. Sokpan avbe izọese na i sẹtin kpe orukhọ kua.

¹² Sokpan Kristi keghi zọ ese ọkpa ye orukhọ, ese ne ọ ruẹre ẹdẹdẹmwẹdẹ, vbe iyeke ọnii ọ keghi tota vbe obọ erha ọmwa Osanobua.

¹³ Rẹn mudia khẹ ẹghẹ ne Osanobua gha ya viọ eghian rẹn ye ọre atataowẹ zẹ vbe ukhuerhe ne a viọ owẹ yan.

¹⁴ Ọ keghi ye ese ne ọ zọ re uhukpa kẹkan ya iran khian ni huanrẹn ighẹ avbe iran ni huan hin orukhọ rre.

¹⁵ Rhunmwuda, Orhiọn Ne Ọ Huanrẹn vbe sẹ osẹe ọghọe ma ima. Okaro ọ wẹẹ

¹⁶ “Ọna ọre ile ne I gha gu iran ta vbe iyeke a vbe ẹdẹrriọ, erriọ Nọyaẹnmwa khare: I gha rhie uhi mwẹ ye iran ekhọe, I ghi vbe gbẹn ọẹn ye iran orhiọn.”

¹⁷ Iyeke ọnii ọ keghi kha wẹẹ, “I i ghi ra ye orukhọ kevbe uyinmwẹ dan iran rre ọvbehe.”

¹⁸ Rhunmwuda ọnii, ugbẹn vbe a ghi ye ena bọ ọmwa nẹ, a i ghi mwẹ vbe a yae ru ọvbehe ighẹ ese ne a zọ ya rhie orukhọ hin rre.

Wa Gie Ima Sikẹ Osanobua

¹⁹ Rhunmwuda ọnii, etẹn mwẹ, vbe ekpa uwu ne Jesu wu, a fan obọ ẹre ne ima nẹ nian, ne ima wa gha la uwu Ehe Ne ọ Huan Sẹẹ Ehia nii.

²⁰ Ọ kie odẹ ọgbọn ye uwu ukpọn ne a ya fiaẹn ni ne ima nẹ, odẹ ne ọ rrọọ, ọnii nọ wẹ vbe ekpa egbe ẹre.

²¹ Ma mwẹ ohẹn nọkhua ne ọ gbearoghe owa Osanobua.

²² Rhunmwuda ọnii, wa gie ima ye ẹkoata sikẹ Osanobua, ba iyayi ne aro dae, ke ẹe kevbe orhiọn ne a kpe huan hin ekhọe ne ọ rri abe rre nẹ, kevbe egbe ne a ye amẹ ne ọ hianrẹn khuẹ.

²³ Wa gie ima da idaehọ ne ima miẹn kue yi mwẹ gbain, rhunmwuda, ma gha sẹtin mu ẹtin yan Osanobua wẹ ọ gha ru vbene ọ khare.

²⁴ Wa gie ima gha zẹ ye ẹmwẹ egbe, ne ima gha ye egbe obọ, ne a gha mwẹ aho ẹmwẹ ọmwa, kevbe ne a gha ru emwi esi.

²⁵ Wa ghẹ gie a do obọ iko ne a do miẹn egbe yi, zẹ vbene emwa eso ru na, sokpan wa gie a rhie igiẹdu ne egbe, kpataki vbe ne a na wa miẹn nian wẹ, Ẹdẹ Nọyaẹnmwa sẹ otọ fo nẹ.

²⁶ Rhunmwuda, ese ọvbehe ne ọ gha kpe orukhọ kua i ghi rrọọ, a deghẹ ma ye ma gha ru orukhọ khian, iyeke vbe a rhie nene ẹmwata ma ima nẹ.

²⁷ Sokpan, emwi ne ọ ghi kẹe ọrọre ne afainma emwi ne ọ ra do sunu, gha fian mwa. Ọnii nọ wẹ, Ibuohiẹn, kevbe ogidi erhẹn ne ọ ra do fuẹn iran ighẹ iran ni gbe odan ghe Osanobua.

²⁸ Ọmwaikọmwa ne ọ ma ru vbene Uhi e Mosis khare, a gha miẹn arhin eva ra eha ne ọ do sẹ osẹe gbe ẹe ighẹ o rri abe, a ghi gbe ẹe ua vbe ne a i na vbe tohan rẹn.

²⁹ Inuinu ghi nọ khekherriọ, ne ọmwa ne ọ zan Ovbi Osanobua? Ne ọ ye aro tila ẹe ua, ighẹ esagiẹn ile Osanobua ne ọ yae khian ne ẹ i mwẹ iruẹn, ne ọ ye ukpẹ sakan Orhiọn ẹsọhẹ. Wa tobọ uwa roro ẹe vbene oya ne a gha rri ọre re gha kpọlọ sẹẹ ọnii hẹẹ.

³⁰ Rhunmwuda ma rẹn ọmwa ne ọ khare wẹ, “I gha rria ikhi, I gha ru iha osa.” Kevbe ne ọ khare wẹ, “Nọyaẹnmwa gha bu ohiẹn emwa rẹn.”

³¹ Ọkpan udu nọ, deghẹ a defi Osanobua nọ rrọọ obọ!

³² Wa roro vbe ne ọ gha ye uwa hẹ, ẹghẹ ne ọ gberra. Ẹkpo nii, vbe uwanmwẹ Osanobua ghi wan mu uwa nẹ, wa rri oya emwi ni bun, sevba ọlọghọmwa nii ma gbele uwa kua.

³³ Ẹghẹ eso ne a na gha rhovbiẹ uwa sirra emwa hia, a na gha ru uwa emwi oya, ke ẹghẹ eso ọvbehe, wa keghi mu egbe ne uwa yaba avbe emwa ne a ru ẹre emwi vberriọ.

³⁴ Wa deba avbe oleghan rri oya, ugbẹn vbe iran fu emwi ne uwa mwẹ hia viọ, wa keghi ya oghọghọ ziẹn egbe ehia rhunmwuda, wa rẹnrẹn ighẹ wa ye mwẹ emwi obọ uwa ne ọ maa sẹ eni, ne ọ gha rrọọ ẹdẹdẹmwẹdẹ.

³⁵ Wa ghẹ gie egbe wọ uwa khekherriọ, rhunmwuda, ere nọkhua ọre ọ la dee.

³⁶ Te uwa gha mwẹ iziengbe, erriọ ọre uwa gha na sẹtin winna iwinna Osanobua, ne emwi ne ọ ve gha na sẹ uwa obọ.

³⁷ Rhunmwuda zẹ vbene ebe khare, “Ọ gha ghi kpẹe kherhe, ọmwa ne ọ dee gha rre, Ẹ i ra yae rhọ eghẹrẹ.

³⁸ Sokpan emwa ẹmwata mwẹ gha yayi, iran gha vbe fe. sokpan deghẹ ọmwaikọmwa vbe uwu iran werriegbe, ẹko mwẹ i ra rhiẹnrhiẹn ghe ẹre.”

³⁹ Ma i rre uwu emwa ni werriegbe, iran na vbe wirua, sokpan ma mwẹ iyayi, a keghi miẹn mwa fan.