Hagai 2 - Edo Bible (E Baibol Ẹdo) Version 1996

Ose Ọghe Ọgua Osa Ne ọgbọn

¹ Vbe ikpẹdẹ ọkpayan ugie, vbe uki ne ogihinrin, ọghe ukpo ọkpa nii, e Nọyaẹnmwa keghi vbe dọlegbe gie Hagai ne akhasẹ uhunmwu rre.

² Ọ tama Hagai wẹ ne ọ tama e Zerubabẹl ne gọvina ọghe Juda, kevbe Jọsua ne Ogie Ohẹn kevbe avbe emwa nii wẹẹ,

³ “A gha ye miẹn ọmwarhọkpa vbe uwu uwa ra, ne ọ gha ye yerre vbene Ọgua Osa nii te ye hẹ ẹghẹ nii vbe umosemwẹ? Vbe ọ ghi khọ vbe aro uwa nian? Ẹ i zẹdẹ gia gie hiehiere.

⁴ Sokpan, banbanna nian, wa ghẹ gie egbe wọ uwa rhọkpa, wa winna iwinna nii rhunmwuda, I rrọọ yaba uwa.

⁵ Ẹghẹ ne uwa na ke Igipt ladian, I yanrẹn wẹ I gha gu uwa gha rrọ ẹghẹ hia. I ye gu uwa rrọ, rhunmwuda ọnii wa ghẹ fian afianma.

⁶ “Vbe ọ ma he kpee wan, I gha mu ẹrinmwi rueghe, kevbe agbọn otọe kevbe okun.

⁷ I gha ye avbe uhunmwu ẹvbo hia uhunmwu rhu, a ghi viọ emwi ẹfe iran gha die emwa na, Ọgua Osa ghi vuọn ne emwi ẹfe.

⁸ Esiliva kevbe igoru ni rre agbọn na hia, ọghomwẹ nọ.

⁹ Ọgua Osa ne ọgbọn na gha mose sẹẹ Ọgua Osa nẹdẹ, evba ọ re imẹ gha na rhie ne emwa mwẹ wẹ ne agbọn ma iran kevbe ne iran gha rre ọfumwegbe.” Erriọ Nọyaẹnmwa ne Oghodua khare.

Akhasẹ Mu Iro Gie Ohẹn

¹⁰ Vbe ikpẹdẹ enẹyan-ugie vbe uki ne ogihinrin vbe ukpo ne Ogieva ne Dariọs ya gha re ọgbaisi, e Nọyaẹnmwa ne Oghodua keghi vbe dọlegbe gu e Hagai ne akhasẹ guan.

¹¹ Ọ wẹẹ, “Tama avbe ohẹn ne iran guan ye ẹmwẹ awua vbene ọ kere ne ọ gha ye:

¹² Gie a kha ighe orhunmwu ọkpa rhie ukpudu emiowo vbe aranmwẹ ne a ya fi ohan nẹ vbe uwu aranmwẹ ne a ya zẹ ese, ọna vbuẹ ọre ye agbada ẹwu ẹre mu gha rrie, a deghẹ ọ ghi gie ẹwu ẹre ni dekan ebrẹd, evbare ne a le nẹ, ayọn ofigbọn oliv, ra evbareikevbare ne ọ rhirhi a gha khin, ọ gha ye evbare nii khian ne avbe ya fi ohan ra?” A ghi nọ ọta na, avbe ohẹn keghi wanniẹn wẹẹ, “Ẹn o.”

¹³ Ẹre Hagai ghi na nọ wẹẹ, “Gie a kha ighe awua gu ọmwa rhunmwuda ighe ọ ya obọ kan orinmwi, a deghẹ ọ na ya obọ kan avbe evbare ne a kha na, ọnii gha ya iran khian ne ọ ma ghi huan ra?” Avbe ohẹn keghi wanniẹn wẹẹ, “Ẹn.”

¹⁴ Ẹre Hagai ghi na kha wẹẹ, “Erriọ ọ re ọghe emwa otọe na wa vbe ye, kevbe emwi ne iran ya obọ ru hia, rhunmwuda ọnii, emwikemwi ne iran ya zẹ ọhẹ rrie Ogiukpo awua rrọ.”

E Nọyaẹnmwa Rhie Eyan Afiangbe Ne Iran

¹⁵ E Nọyaẹnmwa khare wẹẹ, “Wa ma miẹn emwi ne ọ sunu vbe egbe uwa na? Vbe uwa te suẹn gha dọlọ Ọgua Osa bọ,

¹⁶ wa ghi kpao gha rrie ehe ne a si ọka gbo yi, ne uwa na rhie aro ye agban ugie, sokpan, igbe kẹkan ọ re uwa miẹn vbọ. Wa ghi wẹ wa ra sa egalọn ayọn ekigbesiyeha vbe ẹgbẹdin nọkhua, sokpan wa ghi miẹn ugie kẹkan vbọ.

¹⁷ I gie ẹhoho kevbe owowo ne ọ giẹn emwi uan ne ọ do rhia emwi ne uwa te kọ hian a, sokpan, wa ma ye ro iro fi uyinmwẹ werriẹ.

¹⁸ Ẹdẹnẹrẹ na ọrọre ikpẹdẹeneyan-ugie ọghe uki ne ogihinrin, ẹdẹ ne a gbe ẹyotọ Ọgua Osa ni fo. Wa ghi ye emwi ne ọ ra gha sunu ke ẹghẹ na kpao ẹro.

¹⁹ A gha rhe miẹn wẹ, ọka kevbe avbe emwiokọ ni khọe i ghi rrọ, avbe erhan azara erhan ohọ, e pomegranẹt, kevbe oliv, ne ọ he mọ i rrọ, sokpan ke ẹghẹ na kpao te I ra gha fiangbe uwa.”

Emwi Ne Nọyaẹnmwa Ve Zerubabẹl Re

²⁰ Vbe ẹdẹ ọkpa nii, ikpẹdẹ enẹ yan ugie vbe uki, e Nọyaẹnmwa keghi vbe gie Hagai uhunmwu ukpogieva,

²¹ gie Zerubabẹl ne gọvina e Juda wẹẹ, “I ra mu ẹrinmwi vbe agbọn rueghe.

²² I ghi ya avbe arriọba kevbe ẹtin iran uhunmwu rhu, I gha ya avbe ikẹkẹ okuo kevbe iran ni hin iran uhunmwu rhu, avbe ẹsin gha wulo, iran ni hin iran khian gha gbele egbe ua.

²³ Vbe ẹdẹ ne ẹdẹrriọ, I gha rhie uwẹ e Zerubabẹl ne ọguọmwadia mwẹ. I gha ka uwẹ uhe ye aga ne u gha ya eni mwẹ khaemwisẹ. Wẹ ọrọre ọmwa ne I zẹe.” E Nọyaẹnmwa ne Oghodua ta ẹe nẹ.