Giọgis 9 - Edo Bible (E Baibol Ẹdo) Version 1996

Abimẹlẹk

¹ Abimẹlẹk ne ovbi e Gidiọn nokpia kegha rrie Siẹkẹm ehe ne avbe etẹn iye ẹe hia ye. Ọ na tama iran.

² Wẹ ne iran nọ emwa Siẹkẹm wẹẹ, “De ne ọ ye uwa sẹ vbọ? Ne ivbi e Gidiọn ekigbesiyenẹ hia gha kha yan uwa ra ne orhiọnkpa gha kha yan uwa? Wa yerre wẹ esagiẹn kevbe egbe uwa ọre Abimẹlẹk khin.”

³ Avbe etẹn iye ẹe keghi ya mu ẹmwẹ na ma emwa e Siẹkẹm ne ẹẹn. Iran na ghi ta ẹe ne iran yaba Abimẹlẹk rhunmwuda ọtẹn iran nọ.

⁴ Iran keghi viọ igho esiliva ekigbesiyenẹ vbe aro Bal-ọghe-lle, iran na viọ ne ẹẹn, ọ na ya ye igho na viọ avbe emwa ni kuogboi ye ẹvbo eso ba egbe ne iran lele irẹn gha khian.

⁵ Ọ kegha rrie owa erha ẹe vbe Ọfra ọ keghi wa gbele ivbi erha ẹe ighẹ Gidiọn ne ekigbesiyenẹ ni vbe uhunmwu okuta ọkpa kẹkan. Sokpan e Jotam ne ọre ọmọ okpia ọkotọ ọghe Jerubal keghi lẹ re, a ma gbe ẹe rua.

⁶ Iyeke ọnii, ivbi e Siẹkẹm kevbe Bẹtmilo hia keghi si egbe koko, iran na gha rrie ẹzi okan itaemwi ne ọ rre Siẹkẹm, iran na ya ma Abimẹlẹk ọba vbe evba.

⁷ Ugbẹn vbe Jotam ghi họn ẹmwẹ na, ọ na gha rrie Oke Gerizim, ọna mudia yan uhunmwu ẹnrẹn, ọ na datu gu iran guan wẹẹ, “Wa danmwẹ ehọ mwẹ ivbi e Siẹkẹm, Osanobua gha vbe danmwẹ ehọ uwa!

⁸ Ọ ghi sẹ ẹghẹ ọkpa, avbe erhan hia ke ladian ne iran ya tobọ iran zẹ ọba iran. Iran keghi tama erhan oliv wẹẹ ‘Gha re ọba ima’

⁹ Erhan oliv nii keghi wanniẹn wẹẹ, ‘Ọnii rhie maa wẹ ne I sẹ ẹmwẹ ofigbọn mwẹ ne a ya mu ọghọ ye avbe ẹrinmwi kevbe emwa ne agbọn egbe rae, ne I do gha khaemwisẹ yan uwa.’

¹⁰ Avbe erhan keghi tama ohọ wẹẹ, ‘Larre ne u do gha re ọba ima.’

¹¹ Sokpan ohọ nii keghi wanniẹn wẹẹ, ‘Ọ nii nọ wẹ ne I sẹ ọmọ ne ọ rhiẹnrhiẹn kevbe ne ọ winhin ne i mọ rae ne I do gha khaemwisẹ yan uwa.’

¹² Ẹre avbe erhan na vbe ya khama erhan ayọn ne ọ baa wẹẹ, ‘Wẹ do gha re ọba ima.’

¹³ Erhan ayọn nii keghi kha wẹẹ, ‘Onii nọ wẹ ne I sẹ ẹmwẹ ayọn mwẹ ne ọ ya ẹko rhiẹnrhiẹn agbọn vbe ẹrinmwi rae ne I do gha khaemwisẹ yan uwa.’

¹⁴ Ẹre avbe erhan hia na ya khama ọkhuẹnkhuẹn wẹẹ, ‘We do gha re ọba ima.’

¹⁵ Ere ọkhuẹnkhuẹn na tama iran wẹẹ, ‘Adeghẹ wa gele ho ne I gha re ọba uwa, wa do lẹre ye irhu mwẹ. Deghẹ wa ma ru vberriọ, erhẹn gha ladian ke uwu abọ mwẹ ni igbingban rre, ọ ghi giẹn avbe sida ne rre Lebanọn ruan.’ ”

¹⁶ Ẹre Jotam na rhie te ẹe wẹẹ, “Banbanna nian, ẹko ata ne uhunmwu ẹmwẹ ọ re uwa gele ya ma Abimẹlẹk ọba ra? Wa ru emwi esi ghe Gidiọn kevbe ẹgbẹe ọre ra vbe ne ọ te khẹ ke ẹe zẹ vbe iwinna rẹn?

¹⁷ Wa yerre wẹ te erha mwẹ gbinna ne uwa. Ọ keghi rhie uhunmwu ẹnrẹn mwẹ atataobọ ne ọ miẹn ehe na miẹn uwa fan hin obọ ivbi e Midian rre.

¹⁸ Sokpan ẹrẹna nian te uwa ghi mu aro igbinna da owa erha mwẹ. Wa gbele emọ ikpia ekigbesiyenẹ ne ọ mwẹ vbe uhunmwu okuta ọkpa kẹkan, wa na ya Abimẹlẹk ne ọmọ ne okhuo ne ọre ọguọmwadia ẹre biẹ ne ẹẹn ma ọba ọghe Siẹkẹm rhunmwuda ighẹ ọ he ghi re ọtẹn uwa.

¹⁹ Rhunmwuda onii nian a deghẹ emwi esi wa ru ghe Gidiọn kevbe ẹgbẹe ọre vbe ne ọ ke ekhọe rre, wa gie ẹko Abimẹlẹk gha rhiẹnrhiẹn uwa ne ẹko uwa vbe gha rhiẹnrhiẹn irẹn.

²⁰ Sokpan a deghẹ ẹ i re vberriọ, te erhẹn gha vẹn ke Abimẹlẹk ladian ne ọ giẹn emwa Siẹkẹm kevbe Bẹtmilo ruan, te erhẹn gha vẹn ke ehe ne ivbi e Siẹkẹm kevbe Bẹtmilo rre ne ọ giẹn Abimẹlẹk ruan.”

²¹ Ẹre Jotam na lẹ fua, ọ na ya gha rre Beẹ rhunmwuda ohan Abimẹlẹk ne ọtiọnrẹn mu ẹẹn.

²² Abimẹlẹk keghi rriọba yan Izrẹl la ukpo eha.

²³ Ẹre Nọyaẹnmwa na mu ikhẹko nọkhua ye ẹkpo Abimẹlẹk kevbe ivbi e Siẹkẹm, iran na sọtẹ Abimẹlẹk.

²⁴ Emwi ne ọ ya ọ na sunu ọrọre ne Abimẹlẹk kevbe ivbi e Siẹkẹm ni rhie igiẹdu ne ẹẹn ne ọ ya gbele ivbi Gidiọn ekigbesiyenẹ uan miẹn ehe na rri oya ye orukhọ iran.

²⁵ Ivbi e Siẹkẹm keghi ya viọ emwa ghae ye odẹ khẹ Abimẹlẹk vbe uhunmwu oke, iran keghi gbe emwa ni rhirhi a la odẹ miẹn iran emwi. Iran keghi ya ta ẹmwẹ na ma Abimẹlẹk.

²⁶ E Gaal ne ovbi Ẹbẹd kegha die Siẹkẹm ke iran kevbe etiọnrẹn. Ivbi e Siẹkẹm wa vbe mu ẹtin yan irẹn.

²⁷ Iran kegha rrie ugbo iran, iran na ya kọlọ ọmọ erhan ne a ya ru ayọn ne ọ baa, iran keghi ru ayọn, iran na ya ẹe le evbare emwiukpo. Iran na gha rrie aro ẹbọ iran, iran na ya gha re, iran na ya gha da, iran na gha ye Abimẹlẹk gbe ogiẹ.

²⁸ E Gaal keghi kha wẹẹ, “Vbọzẹ ne ima na ga Abimẹlẹk yi? De egbe emwa ne ima ne ivbi e Siẹkẹm mobọ khin? Gha ọ vbe re irẹn yi? Ovbi e Gidiọn! E Zẹbul ghi vbe gha ya uhunmwu ne ọ gie. Vbọzẹ ne ima gha na gha gae? Wa gie ekhọe uwa gha rre ẹmwẹ erha uwa odede ighẹ Hamọ ne ọ mu uniẹn uwa hẹn!

²⁹ Vbọ rrọọ akpawẹ mẹ ọrọre ọkaolotu emwa na, I gha miẹn Abimẹlẹk uhunmwu. I gha tama rẹn wẹẹ, ‘A deghẹ ivbi iyokuo ruẹ gele bun, ladian ne u do gbinna!’ ”

³⁰ E Zẹbul ne ọ gbe aro ghe ẹvbo nii ghi họn ẹmwẹ na, ohu keghi mu ẹẹn ye ẹmwẹ ne Gaal ta ẹe.

³¹ Rẹn keghi gie emwa ya tama Abimẹlẹk vbe Aruma wẹẹ, “Gaal ne ovbi Ẹbẹd ke ẹe kevbe etiọnrẹn kpao gha die Siẹkẹm iran i ra guẹ la ore ẹvbo.

³² Rhunmwuda ọnii, wẹ vbe emwa ruẹn ghi kpao vbe ore ẹvbo vbe asọn ne uwa lẹre ye uwu oha.

³³ Vbe ne a khuẹ, u ghi guakpao vbe owiẹ vbirrivbirri ne u dekun ẹvbo nii. E Gaal kevbe emwa rẹn ghẹ ghi bu ruẹ gha dee, u ghi ya emwi ne u mwẹ hia fi iran emwi!”

³⁴ Ẹre Abimẹlẹk kevbe emwa rẹn na kpaegbe vbe asọn, iran na wa egbe ye ihe enẹ, iran na ya lẹre ye ọkpẹn Siẹkẹm.

³⁵ E Gaal keghi ladian, ọ na ya mudia ye onurho ẹvbo. Abimẹlẹk kevbe emwa rẹn kevbe kpaegbe vbe ehe ne iran lẹre yi.

³⁶ E Gaal ghi bẹghe iran, ọ keghi tama Zẹbul wẹẹ, “Ghe! Emwa eso ke uhunmwu oke dee.” E Zẹbul keghi wanniẹn wẹẹ, “Aghọnghọn ni rre uhunmwu oke nọ ighẹ ẹ i re emwa.”

³⁷ E Gaal keghi dọlegbe kha wẹẹ, “Ghe vbe emwa tuorre dee vbe odẹ, otu ọkpa vbe ke odẹ okan iran ni miẹn aro dee!”

³⁸ E Zẹbul keghi tama rẹn wẹẹ, “Orhuọ ne u rhuọ hia ghi vbo yi? Wẹ ọrọre ọmwa ne ọ nọ rẹn wẹ de emwi ne ọ zẹe ne ima na ga ọmwa na ighẹ Abimẹlẹk yi. Emwa ne u gha ya gbe ogie ena khin. Gha khian nian ne u ya gu iran gbinna.”

³⁹ E Gaal keghi viọ emwa Siẹkẹm mwẹ obọ, ọ na ya gu Abimẹlẹk gbinna.

⁴⁰ Abimẹlẹk keghi lele ẹe vbọ, ẹre Gaal na lẹ fua. Emwa ni bun keghi miẹn ikuan egbe, uhin ya sẹ onurho ẹvbo.

⁴¹ Abimẹlẹk keghi werriegbe gha rrie Aruma, ẹre Zẹbul na khulo Gaal kevbe etiọnrẹn ladian, iran ma ghi sẹtin di e Siẹkẹm ya ọvbehe.

⁴² Vbe ẹdẹ ne ọ lele ẹe, ivbi e Siẹkẹm keghi ladian gha rrie uwu oha, Abimẹlẹk keghi rẹn emwi na.

⁴³ Rẹn keghi viọ emwa rẹn, ọ na gha iran ye otu eha, iran keghi lẹre ye uwu oha gha khẹ. Rẹn ghi miẹn wẹ avbe emwa nii wa ladian vbe ore ẹvbo, ọ keghi ladian vbe ehe ne ọ lẹre yi, ne ọ do gbele iran an.

⁴⁴ Abimẹlẹk kevbe emwa rẹn ke zẹgiẹgiẹ werriegbe, iran na ya gha khẹ onurho ẹvbo. Otu neva keghi dekun emwa ni rre uwu oha, ọ keghi gbele iran hia a.

⁴⁵ Ọ keghi dunmwu ẹvbo nii sẹ otọ, ọ na ya umwẹ rhu otọ ẹre.

⁴⁶ Avbe ekamakodin ni rre Owa ọkhẹ e Siẹkẹm ghi họn ẹmwẹ na, iran kegha rrie owa nọyo ọghe Bal-ọghe-lle ne iran ya lẹre.

⁴⁷ Iran keghi tama Abimẹlẹk ighẹ iran si koko ye ihọkpa.

⁴⁸ Ọ keghi viọ emwa rẹn mwẹ obọ gha rrie Oke Zalmọn, ọ na rhie ughanmwa, ọ na fian abọ erhan ọkpa, ọ na mu ẹn yan izabọ. Ọ na tama emwa rẹn ne iran hia zabọ ru vberriọ.

⁴⁹ Ẹre dọmwadẹ ọghọe na fian abọ erhan, iran na lele Abimẹlẹk, iran na ya si ẹe gbo ye ẹzi owa ne ọ yo ni, Iran na mu erhẹn yọ vbene emwa ni he na ye rre uwu ẹre. Ẹre emwa nii hia ni rre Owa ọkhẹ nii na wulo. Emwa ni rrọọ sẹ omwa arriaisẹn kevbe ikpia kevbe ikhuo.

⁵⁰ Ẹre Abimẹlẹk na gha rrie Tebẹz ọ na ghae ga ẹre, ọ na khọn rẹn muotọ.

⁵¹ Owa ne ọ yo ne ọ wegbe ọkpa rre evba, ọre ikpia kevbe ikhuo ni rre ẹvbo nii, deba avbe olotu iran na lẹ gha rrie evba. Iran na khui urho ke egbe yi, iran na hin ẹnrẹn gha rrie odukhunmwu ẹnrẹn.

⁵² Abimẹlẹk kevbe rre, ọ dekun owa nii, ọ keghi la ghe ehe ne ẹkhu ne ọ rrọọ ye ne ọ miẹn ehe na mu erhẹn ye owa nii.

⁵³ Sokpan okhuo ọkpa keghi werrie olọ gbe ẹre uhunmwu, ọ na dunmwu ẹre ẹrherhe rua.

⁵⁴ Rẹn keghi zegiẹgiẹ tie igbama ne ọ viọ emwi igbinna rẹn mwẹ ọnrẹn, ọ tama rẹn wẹẹ, “Si umozo ruẹ ladian ne u gbe mwẹ uan. Mẹ i ho ne a gha ta ẹe khian wẹ okhuo ọre ọ gbe mwẹ.” Ẹre igbama nii na bi umozo ye ọre egbe, ọ keghi wu.

⁵⁵ Ivbi Izrẹl ghi miẹn wẹ Abimẹlẹk wu nẹ, iran hia kegha rrie owa.

⁵⁶ Erriọ ọre Osanobua ya ha Abimẹlẹk osa emwi dan ne ọ ru erha ẹe re vbene ọ na gbele ivbi erha ẹe ekigbesiyenẹ.

⁵⁷ Osanobua keghi vbe gie emwa Siẹkẹm rri oya ye ekhọe dan iran zẹ vbene Jotam ne ovbi Gidiọn khare wẹ ọ gha sunu vbe ẹghẹ ne ọ na tie ẹbọ ne iran.