Giọgis 8 - Edo Bible (E Baibol Ẹdo) Version 1996

Ugbemwẹ Okiekie Ivbi E Midian

¹ Ivbi Ifreim keghi tama e Gidiọn wẹẹ, “Vbọzẹ ne u ma na tie ima yi vbe u ra khọn ivbi Midian? Vbe u a na ru ima vberriọ hẹẹ?” Iran keghi kakabọ gui yọ ẹsẹse.

² Sokpan rẹn keghi tama iran wẹẹ, “Emwi ne imẹ ru ma zẹdẹ sẹ vbe ne uwa ru hiehiere. Uhin emwi kherhe ne uwa ne ivbi Ifreim ru kpọlọ sẹ emwi hia ne ekhuarha mwẹ he ru ukhukhu uri.

³ Osanobua keghi viọ avbe ekhaẹmwẹ e Midian, Orẹb kevbe Zib ye uwa obọ. De emwi ne imẹ he ru ne a gha ya gie ọnii?” Rẹn ghi ta ẹmwẹ na, ohu ma ghi mu iran gbe ọvbehe.

⁴ E Gidiọn kevbe arhin eha ni gue ẹe, keghi do sẹ Jọdan, iran na fiaẹn rra. Egbe wọ iran nẹ, sokpan iran keghi ye gha khulo avbe eghian iran khian.

⁵ Ọ ghi sẹ Sukọt, rẹn keghi tama ivbi e Sukọt, wẹẹ, “Wa lahọ, wa viọ ebrẹd eso ne emwa mwẹ rhunmwuda egbe wọ iran nẹ, te I khu e Zẹba kevbe Zalmuna ne avbe ọba Midian khian.”

⁶ Sokpan avbe ekaolotu emwa Sukọt keghi kha wẹẹ, “Vbọzẹ ne ima gha na rhie evbare ne ivbi iyokuo ruẹ yi? Obọ ruẹ ma he vba Zẹba kevbe Zalmuna.”

⁷ Ẹre Gidiọn ghi na kha wẹẹ, “Ọ ma! E Nọyaẹnmwa ghẹ ghi viọ Zẹba kevbe Zalmuna yọ mwẹ obọ nẹ, ọkhuẹnkhuẹn kevbe akọsọ ọ re I ra viọ ke ato rre do ya yan ghan ikpakpa egbe uwa hẹ kua!”

⁸ E Gidiọn keghi sikẹ odaro gha rrie Pẹnuẹl, ọ na vbe ya nọ iran nii emwi ọkpa nii, sokpan vbene emwa Sukọt tama rẹn ọ re emwa Pẹnuẹl vbe tama rẹn.

⁹ Ẹre irẹn ghi na tama iran wẹẹ, “Egbe hẹnnẹdẹn I ra ya rre, I gha sẹtin rre vberriọ, te I ra dunmwu owa ne ọ yo na sotọ.”

¹⁰ E Zẹba kevbe Zalmuna kegha rre Kakọ, iran kevbe ivbi iyokuo iran. Vbe uwu ivbi iyokuo ẹwae ni ke ato rre, arriaisẹn ekesugie (15,000) ọre ọ ghi ke ẹe, a gbele arriaisẹn iyehan (120,000) vbe uwu iran.

¹¹ E Gidiọn keghi lele odẹ ne ọ rre ọkpẹn ato vbe odẹ ahọ ọghe Noba kevbe Jogbeha, ọ na dekun ivbi iyokuo nii vbe amaro amakọ.

¹² Avbe ọba Midian eva nii, e Zẹba kevbe Zalmuna, keghi lẹ kua, sokpan rẹn keghi khu iran ọ na munọ iran. Ọ na fian otighi fi ivbi iyokuo iran egbe.

¹³ E Gidiọn ne ovbi e Joas keghi la odẹ Heras Pas ke okuo gha die owa.

¹⁴ Ọ keghi mu igbama ọkpa oghunmwu vbe Sukọt, ọ na gha nọ rẹn ọta. Igbama nii keghi gbẹnnẹ eni ekhaẹmwẹ kevbe ediọn eha irrọvbiyenẹ (77) ọghe Sukọt ye otọ ne ẹẹn.

¹⁵ Ẹre Gidiọn na bu emwa Sukọt, ọ na khama iran wẹẹ, “Wa ye rre ẹghẹ ne uwa na yagha mwẹ! Wa na tama mwẹ wẹ, wa i rhie evbare ne avbe ivbi iyokuo mwẹ ne egbe wọ nẹ rhunmwuda obọ mwẹ ma he vba Zẹba kevbe Zalmuna. Banbanna nian, wa ghe iran!”

¹⁶ Ọ keghi silo igban kevbe akọsọ ke uwu ato rre, ọ na ya ẹe rri avbe ọkaolotu e Sukọt oya.

¹⁷ Ọ na dunmwu owa ne ọ yo ọghe Pẹnuẹl sotọ, ọ na gbele ikpia ni rre ẹvbo nii.

¹⁸ Ẹre Gidiọn na nọ e Zẹba kevbe Zalmuna wẹẹ, “Emwa ne uwa gbele de emwi ne iran khọe?” Iran wanniẹn wẹẹ, “Wẹ ọre iran khọe, dọmwadẹ ọghọe vbe uwu iran wa ye vbe ovbi ọba.”

¹⁹ E Gidiọn keghi wanniẹn wẹẹ, “Etẹn mwẹ ne ikpia iran khin, ivbi iyemwẹ ne ikpia. Te I wa vẹn ihẹn ya ta ẹe wẹ akpawẹ wa ma gbele iran an, mẹ i ghẹ vbe gbele uwa a.”

²⁰ Ọ keghi tama e Jeta ne ovbi ẹre ne ọdiọn wẹẹ, “Kpaegbe ne u gbele iran an!” Sokpan, ọvbokhan ni ma yuo umozo ẹre ladian. Ohan kegha mu ẹẹn rhunmwuda, ọvbokhan he ye nọ.

²¹ Sokpan e Zẹba kevbe Zalmuna ke kha wẹẹ, “Tobọ gbele ima an rhunmwuda, ọmwa ne ọ sihe okpia ọre ọ sẹtin ru emwi okpia.” Ẹre Gidiọn na gbele Zẹba kevbe Zalmuna, ọ na viọ emwi itegbe ni rre ẹyaẹn ekẹtẹkẹtẹ iran.

²² Iyeke ọnii, ivbi Izrẹl keghi tama e Gidiọn wẹẹ, “Gha re ne ọ kha yan ima, wẹ kevbe ovbi uẹ ke eyẹ ruẹ ne ọ gha leluẹ. U miẹn ima fan vbe obọ ivbi e Midian.”

²³ E Gidiọn keghi wanniẹn wẹẹ, “Mẹ i ra kha yan uwa, ovbi mwẹ i vbe kha yan uwa, e Nọyaẹnmwa ọ re ọ khian gha kha yan uwa.”

²⁴ Sokpan rẹn keghi rhie te ẹe wẹẹ, “Gunmwẹ nọ uwa emwi ọkpa. Dọmwadẹ ọghọe vbe uwu uwa, wa viọ emwiehọ ne uwa viọre mẹ.” (Te emwa Midian viọ emwiehọ igoru ye ehọ zẹ vbene avbe emwa ni rre ato hia vbe ru.)

²⁵ Iran keghi wanniẹn wẹẹ, “Ẹkorhiẹnrhiẹnmwẹ ma gha ya viọ iran ne uẹn.” Iran keghi wa ukpọn ye otọ, edọmwadẹ ọghọe keghi viọ emwiehọ ne ọ viọre yọ.

²⁶ Emwiehọ igoru ne Gidiọn nọ rẹn sẹ omwa uwan iyeha, a ma ka avbe emwi itegbe, emwiurhu kevbe ẹwu ododo ne avbe ọba Midian yọe, ra ne ọ gbalọ ẹyaẹn avbe ekẹtẹkẹtẹ iran ba ẹre.

²⁷ E Gidiọn keghi ya nene igoru ma amazẹ, ọ na mu ẹẹn ye ẹvbo irẹn ne Ọfra. Ivbi Izrẹl hia keghi sẹ Osanobua rae, iran na ya gha ya uhunmwu rhanmwotọ ne amazẹ nii. Ọ ke ghi yevbe ifi ne Gidiọn kevbe ẹgbẹe ọre.

²⁸ Izrẹl keghi khọnmiotọ vbe uhunmwu e Midian, ọ ma ghi vbe gha re emwi ne ọ si afianma ọvbehe. Otọe nii kegha rre ọfumwegbe la ukpo iyeva vbe ẹghẹ ne Gidiọn na gha rre agbọn.

Uwu Ọghe Gidiọn

²⁹ E Gidiọn keghi ya gha rre owa obọ ẹre.

³⁰ Ọ kegha mwẹ emọ ekigbesiyenẹ rhunmwuda, ọ viọ ikhuo ni bun.

³¹ Ọ keghi vbe gha mwẹ ọse ọkpa vbe Siẹkẹm, ne ọ biẹ ọmọ okpia ọkpa nẹ ẹn. Rẹn na gha tie ẹre Abimẹlẹk.

³² E Gidiọn ne ovbi Joas keghi wu vbe ọ wa khian ọmaẹn nẹ ẹsẹse. A keghi re ẹre ye idin Joas ne erha ẹe vbe Ọfra ne ọ rre ẹwae Abiẹzẹ.

³³ E Gidiọn ghi wu nẹ, ivbi Izrẹl keghi vbe fi iyeke gbe Osanobua, iran na ya gha gho e Bal. Iran keghi ya e Bal-ọghe-lle khian ẹbọ iran.

³⁴ Iran ma ghi ga e Nọyaẹnmwa Osanobua iran ne ọ miẹn iran fan hin obọ avbe eghian iran ni lẹga iran hia rre.

³⁵ Iran ma kpọnmwẹ ẹgbẹe Gidiọn ye emwi ni maa ne ọ ru ne Izrẹl.