Giọgis 7 - Edo Bible (E Baibol Ẹdo) Version 1996

E Gidiọn Khọnmiotọ Emwa Midian

¹ Ẹdẹ ikẹtin e Gidiọn keghi gua kpao vbe owiẹ vbirrivbirri ke irẹn kevbe emwa rẹn, iran na ya bu agọ ye ọkpẹn Ovbi Ẹzẹ Harọd. Agọ ọghe emwa Midian kegha rre iya vbe odẹ okuọ ọghe iran, vbe ọkpẹn oke Morẹ.

² E Nọyaẹnmwa keghi tama e Gidiọn wẹẹ, “Emwa ne u hẹ mwẹ bun gbe ne I gha gie ẹe khọnmiotọ vbe uhunmwu emwa Midian. Iran sẹtin gha ro ighẹ iran ọ tobọ iran khọnmiotọ, iran i vbe tian mwẹ.

³ Khama emwa ni wẹẹ, ‘Ọmwaikọmwa ne ohan mu, wẹ ne ọ kpao vbe Oke Giliad rre ne ọ werriegbe gha rrie owa.’ ” Ẹre iran arriaisẹneva-yan ugie (22,000) na gha rrie, sokpan arriaisẹn igbe (10,000) keghi mudia.

⁴ E Nọyaẹnmwa keghi tama Gidiọn wẹẹ, “Emwa ye bun gbe. Viọ iran gha rrie ẹzẹ, I gha wannọ iran ne uẹn vbe evba. I gha wẹ ọmwa gha leluẹ gha khian, ọ gha yo. I gha kha wẹ ne ọmwa ghẹ leluẹ yo, ẹ i yo.”

⁵ E Gidiọn keghi viọ iran gha die ẹzẹ, e Nọyaẹnmwa keghi tama rẹn wẹẹ, “Wannọ iran ni ya aranmwẹ lalọ amẹ zẹ vbe ekita ye efẹn ọkpa, hin uwu iran ni diguẹ wọn amẹ rre.”

⁶ Iran ni ya obọ balọ amẹ wọn kegha re iyisẹn eha. Iran ni dekẹe hia keghi diguẹ gha wọn amẹ.

⁷ E Nọyaẹnmwa keghi tama e Gidiọn wẹẹ, “Iran iyisẹn eha ni ye obọ balọ amẹ wọn ọ re I ra ya miẹn ruẹn fan ne I vbe ya rhie akhọnmiotọ ne uẹn vbe uhunmwu emwa Midian. Tama emwa nekpa hia ne iran gha rrie owa.”

⁸ E Gidiọn keghi rhunmwuda onii wẹ ne ivbi Izrẹl hia gha rrie, sokpan iran iyisẹn eha nii, iran ni viọ avbe evbare mwẹ kevbe avbe okpe, iran keghi sẹ eni rae ye otọ. Agọ emwa Midian kegha rre ototọ iran vbe iya nii.

⁹ Vbe asọn nii, e Nọyaẹnmwa keghi tama Gidiọn wẹẹ, “Kpaegbe ne u dekun agọ nii; I ra rhie ẹre ye uẹ obọ ne u khọn miẹn ọre otọ.

¹⁰ Sokpan, a deghẹ ohan mu ẹẹn ighẹ ohan ma guẹ dekun ẹnrẹn, rhie Pura ne ọguọmwadia ruẹ mwẹ obọ ne u gha rrie agọ emwa Midian.

¹¹ U gha họn ẹmwẹ ne iran ta, ẹghẹ nii u gha mwẹ udinmwẹ ne u ya dekun agọ nii.” Ẹre irẹn vbe Pura ne ọguọmwadia ẹre na gha rrie agọ eghian iran.

¹² Ivbi e Midian, Amẹlẹk kevbe iran ne ẹwae ni rre uwu ato keghi wa gba iya nii zẹ vbe irhiso, iran keghi vbe mwẹ ekẹtẹkẹtẹ ni bun zẹ vbe ekhae ni rre ọkpẹn okun.

¹³ Ugbẹn vbe Gidiọn ghi sẹ evba, rẹn keghi họn vbe okpia ọkpa ta imina ne ọ minaẹn ma ọse ẹre. Ọ keghi gha kha wẹẹ, “I mina imina ọkpa. Ududu ebrẹd ne a ye irhuarhua ọka le keghi werriẹ fi agọ, ọ keghi degbe owa ukpọn, owa ukpọn nii keghi de guo, ọ na wa gha rre otọ wawawa.”

¹⁴ Ọse ẹre keghi wanniẹn wẹẹ, “Umozo e Gidiọn ne ovbi Joas nọ! Ẹ i vbe re emwi ọvbehe rhọkpa! Osanobua rhie akhọnmiotọ ne ẹẹn nẹ vbe uhunmwu e Midian kevbe ivbi iyokuo ima hia!”

¹⁵ E Gidiọn ghi họn imina nii, kevbe emwi ne a ya ẹe kha, ọ keghi diguẹ. Ọ na ga e Nọyaẹnmwa. Ọ keghi werriegbe gha rrie agọ ivbi Izrẹl, ọ na kha wẹẹ, “Wa kpaegbe, e Nọyaẹnmwa ra rhie akhọnmiotọ ne uwa vbe uhunmwu ivbi iyokuo e Midian!”

¹⁶ Rẹn keghi ghae emwa rẹn ni re arhin iyisẹn eha ye otu eha, ọ keghi mu okpe kevbe ovbi ẹluba ne orhiọn kpọkpa vbe uwu iran, ukpa kevbe rre uwu avbe ovbiẹluba nii.

¹⁷ Rẹn keghi tama iran wẹ, “Wa gha ghe mwẹ, ne uwa vbe ru emwi ne imẹ a rhirhi ru vbe I gha sẹ ọkpẹn agọ nii nẹ.

¹⁸ Mẹ kevbe avbe emwa mwẹ gha kpe okpe ima, wa ghi vbe kpe ọghe uwa lẹga agọ nii, wa ghi vbe datu wẹẹ, ‘Ọ ghe Nọyaẹnmwa kevbe ọghe Gidiọn!’ ”

¹⁹ E Gidiọn kevbe emwa rẹn keghi sẹ ọkpẹn agọ nii vbe ọ ke ekherhe ne a sẹ ogiasọn, vbe iran wa da fi emwa ni ba odẹ werriẹ. Iran keghi kpe okpe iran, iran keghi gbele avbe ovbiẹluba ne iran hẹ mwẹ uan.

²⁰ Iran hia ni rre otu eha nii keghi kpe okpe iran, iran keghi gbele ovbiẹluba iran an. Iran keghi viọ ukpa ni rrọọ mwẹ agobọ iran, kevbe avbe okpe vbe obọ erha ọmwa iran, iran keghi datu wẹẹ, “Umozo ọghe Nọyaẹnmwa kevbe ọghe Gidiọn!”

²¹ Dọmwadẹ ọghọe keghi mudia ye ehe ne iran ye lẹga agọ nii; ivbi iyokuo eghian iran nii hia keghi lẹkua, iran na gha tulo khian.

²² Ẹghẹ nii, iran iyisẹn eha nii ghi na kpee okpe iran, e Nọyaẹnmwa keghi ru ẹe ne iran ni rre agọ nii, ya umozo yan egbe iran. Iran keghi lẹ ghe odẹ Zarẹta ya sẹ Bẹt Sita ya sẹ Ebẹl Mehola vbe ọkpẹn Tabat.

²³ Iran keghi tie ikpia ni rre ẹwae Naftali, Asia kevbe Manasẹ hia ladian, iran keghi zẹ ivbi e Midian khu.

²⁴ E Gidiọn keghi gie emwa ya la avbe ẹvbo ni rre oke Ifreim khama iran wẹẹ, “Wa gha dee ne uwa do gu ivbi e Midian gbinna. Wa mu Ẹzẹ Jọdan mwẹ kevbe avbe ivbi ẹzẹ ni ya sẹ Bẹtbara ne a ghẹ gie ivbi e Midian fiaẹn rra.” A keghi tie ivbi Ifreim si koko. Iran keghi mu ẹzẹ Jọdan mwẹ, kevbe avbe ivbi ẹzẹ ya sẹ Bẹtbara.

²⁵ Iran keghi khọn munọ ekhaẹmwẹ e Midian eveva, Orẹb kevbe Zib. Iran keghi gbe Orẹb ye okuta Orẹb, kevbe Zib ye ehe ne Zib na dunmwu ọka. Iran na ye gha khu ivbi e Midian khian, iran munọ uhunmwu Orẹb kevbe Zib gie Gidiọn vbe odẹ ahọ Jọdan ne irẹn gha ye.