Giọgis 6 - Edo Bible (E Baibol Ẹdo) Version 1996

E Gidiọn

¹ Ivbi Izrẹl keghi ru orukhọ ghe e Nọyaẹnmwa, rhunmwuda ọnii, rẹn keghi gie emwa Midian gha khaemwisẹ yan iran la ukpo ihinrọn.

² Emwa Midian keghi wegbe sẹ ivbi Izrẹl, ẹre avbe Izrẹl na lẹ la uhunmwu oke ya gha lẹre ye uvun okuta kevbe ehe ne ọ ghi sẹtin degue iran.

³ Ẹghẹ kẹghẹ ne ivbi Izrẹl ya kọ emwiokọ, avbe ivbi e Midian deba ivbi Amẹlẹk kevbe emwa ni rre uwu ato ghi do gu iran gha gbinna!

⁴ Iran ghi bu agọ ye otọe nii, iran ghi rhia emwiokọ ni rrọọ hia a rhinrin ya sẹ ọkpẹn e Gaza. Iran i ghi sẹ emwi rhọkpa rae ne ivbi Izrẹl ya gha gaga egbe koko ẹmila ọkpa ra ohuan ọkpa ra ekẹtẹkẹtẹ ọkpa.

⁵ Iran ghi viọ ẹmila iran kevbe owa ukpọn iran ni bun vbe irhiso gha dee. A i sẹtin ka iran kevbe ogologo iran vbene iran ghi bun sẹ. Iran kegha rhia otọe nii uan.

⁶ Izrẹl ma miẹn odẹ la iran re. Ẹre ivbi Izrẹl na datu tie Nọyaẹnmwa wẹ ne ọ ye iran obọ.

⁷ Ivbi Izrẹl ghi viẹ bu e Nọyaẹnmwa nẹ rhunmwuda ivbi e Midian,

⁸ e Nọyaẹnmwa keghi gie akhasẹ ọkpa gie iran, ne ọ do ta uhunmwu ne Nọyaẹnmwa ne Osanobua Izrẹl gie wẹẹ: “I viọ uwa ke uwu ọviẹn ladian vbe Igipt.

⁹ I miẹn uwa fan hin obọ ivbi Igipt rre kevbe hin obọ iran ni gu uwa gbinna rre. I kegha khulo iran ladian vbene uwa ya nana sikẹ odaro, I na mu otọ iran ne uwa.

¹⁰ I tama uwa wẹ mẹ ọrọre Nọyaẹnmwa ne Osanobua uwa, kevbe wẹ ne uwa ghẹ gho ẹbọ avbe emwa Amọri ne uwa di otọ ẹre ya na. Sokpan, wa ma zẹ yọ mwẹ re.”

¹¹ Ẹre odibo e Nọyaẹnmwa na do tota ye ototọ okan ne ọ rre igue ne a tie ẹre Ọfra ne ọ re ọghe Joas ne ovbi ẹwae Abiẹzẹ. Ovbi ẹre ighẹ Gidiọn kegha hẹko do khuọn ọka vbe okọ ne a na minọ ayọn ne emwa Midian i ghẹ bẹghe ẹre.

¹² Evba ọ re odibo e Nọyaẹnmwa na rhie egbe ma rẹn, ọ wẹẹ, “Ọmwa ne ọ din ọ re u khin, e Nọyaẹnmwa vbe rrọọ ya ba ruẹ.”

¹³ E Gidiọn keghi kha wẹẹ, “Enọwanrẹn, gun mwẹ nọ ọta wẹ, adeghẹ e Nọyaẹnmwa gele rrọọ yaba ima, vbọzẹ ne ena hia ghi na rruan ima? Iwinna ọyunnuan hia ne avbe erha ima tama ima wẹ e Nọyaẹnmwa te ru, vbene ọ ya viọ iran ke otọ Igipt ladian hẹ, vbe irẹn a ghi ye? E Nọyaẹnmwa yangbe ima nẹ, ọ na sẹ ima rae ne ivbi e Midian gha ru ima emwi ne ọ rhirhi khọn iran.”

¹⁴ E Nọyaẹnmwa keghi tama rẹn wẹẹ, “Ye ẹtin ne u mwẹ hia gha khian ne u ya wọlọ ivbi Izrẹl hin obọ ivbi Midian rre. Mẹ tobọ mwẹ ọ re ọ gie ọ.”

¹⁵ E Gidiọn keghi wanniẹn wẹẹ, “Sokpan, e Nọyaẹnmwa, vbe imẹ a gha ya sẹtin miẹn Izrẹl fan hẹ? Ewae mwẹ ọrọre ne ọ ma wegbe sẹ vbe uwu ẹwae Manasẹ, mẹ ọ re ọ vbe re ne ẹ i mwẹ esa ne ọ ye vbe uwu ẹgbẹe mwẹ.”

¹⁶ E Nọyaẹnmwa keghi tama rẹn wẹẹ, “U gha sẹtin ru ẹe rhunmwuda te I ra ye uẹ obọ. Te u ra rẹnkhẹn ivbi Midian vbe ne a miẹn wẹ orhiọnkpa kẹkan nọ.”

¹⁷ E Gidiọn keghi wanniẹn wẹẹ, “A deghẹ ẹko ruẹ rhiẹnrhiẹn ghe mwẹ, ye emwi zẹ ama ya rhie ma wẹ wẹ ọ re ọ gele gunmwẹ guan.

¹⁸ Lahọ ghe he kpao I tedo ye evbare zẹ ọhẹ guẹ.” Rẹn wanniẹn wẹẹ, “I gha mudia u te ya rre.”

¹⁹ Ọ re Gidiọn na la owa, ọ na ya le oteghe ẹwe, ọ na ye uwan irhuarhua ọkpa le ebrẹd ne a ma rhie eyist yi, Ọ kevbe viọ emiowo ni ye okhuae, ọ na mu uwọnmwẹ ne ọ rrọọ ye uwawa, ọ na viọ bu odibo e Nọyaẹnmwa nii gha die ototọ erhan okan nii, ọ na viọ ne ẹẹn.

²⁰ Ẹre odibo nii na tama rẹn wẹẹ, “Viọ avbe emiowo kevbe ebrẹd yan okuta na ne u hihiẹ uwọnmwẹ nii yan rẹn.” E Gidiọn keghi ru vberriọ.

²¹ Odibo e Nọyaẹnmwa ni keghi niẹn obọ ẹre ladian, ọ na ye ọkpọ ne ọ gu ẹe kan emiowo kevbe ebrẹd nii. Erhẹn keghi vẹn ke uwu okuta nii ladian, ọ na giẹn emiowo kevbe ebrẹd nii uan. Odibo nii keghi ru gbẹnnẹ.

²² Ẹre Gidiọn na do rẹn wẹẹ odibo e Nọyaẹnmwa ọ re irẹn miẹn, ọ keghi ya ohan datu wẹẹ, “E Nọyaẹnmwa ne Udazi, mẹ miẹn odibo ruẹ vbe ghe aro mwẹ ghe aro uẹ!”

²³ Sokpan, e Nọyaẹnmwa tama rẹn wẹẹ, “Ghẹ gie ohan mu ẹẹn, ne ọ maa nọ. U i ra wu.”

²⁴ E Gidiọn keghi bọ aka ọkpa ne Nọyaẹnmwa vbe evba, ọ na gha tie ẹre, “E Nọyaẹnmwa ọrọre Ọfumwegbe.” (Te ọ ye rre Ọfra ne ọ re otọ ẹwae Abiẹzẹ.)

²⁵ E Nọyaẹnmwa keghi tama e Gidiọn vbe asọn ni wẹẹ, “Mu ẹkhuia ẹmila erha a kevbe ẹkhuia ọvbehe ne ọ he rre ukpo ihinrọn, guọghọ aka ne erha a gbe ne Bal sotọ ne u vbe giagia ọkpọ Asiẹrra ne ẹbọ nokhuo nii diake ẹe kua.

²⁶ U ghi bọ aka esiesi yan ehe ne a guọghọ ena yi ne Nọyaẹnmwa Osanobua ruẹ. U ghi mu ẹkhuia ne ogieva nii, u ghi giẹn ọnrẹn uan zẹ vbe emwi izọ ese ke ẹe kevbe ọkpọ ne a giagia kua nii.”

²⁷ E Gidiọn keghi viọ igbe vbe uwu avbe eguọmwadia irẹn, ọ na ya ru zẹ vbene e Nọyaẹnmwa tama rẹn. Ohan ẹgbẹe irẹn ke ẹe kevbe emwa ni rre ẹvbo ma gie ẹe ru ẹe vbe avan, ọ keghi ya ru ẹe vbe asọn.

²⁸ Emwa ni rre ẹvbo nii ghi rhiọrre vbe owiẹ ne ọ lele ẹe, iran keghi miẹn vbe a rẹnkhẹn aka e Bal kevbe ọkpọ Asiẹrra ne ọ rrọọ sotọ, a kevbe giẹn ekhuia ne ogieva vbe uhunmwu aka ọvbehe ne a bọ ye evba.

²⁹ Iran kegha nọ egbe iran wẹẹ, “Gha ọ ru ọ na yi?” Iran keghi gualọ otọ ẹre, iran na miẹn wẹ e Gidiọn ne ovbi Joas ọ re ọ ru ẹe.

³⁰ Iran keghi tama Joas wẹẹ, “Rhie ovbi uẹ ladian ne ima gbe ẹe rua. Ọ dunmwu aka e Bal sotọ, ọ na vbe bun ukhurhẹ Asiẹrra ne ọ diake ẹe rua.”

³¹ Sokpan, e Joas wanniẹn iran ni gu ẹe guan wẹẹ, “Wa ọ re ọ guan ne Bal ra? Wa ọ re ọ kha ne unu e Bal ra? Ọmwa ne ọ rhirhi guan ne ẹẹn, a gha gbe ẹe rua ọ te sẹ owiẹ. A deghẹ ẹbọ ọ re Bal gele khin, wa gie ẹe khọn ekhae ne egbe ẹre. Aka ẹre ọ re a dunmwu uan.”

³² Ke ẹghẹ nii kpao, a na ghi gha tie Gidiọn Jerubabẹl, rhunmwuda ne Joas na kha wẹẹ, “Gie Bal khọn ekhae ne egbe ẹre rhunmwuda, aka ẹre ọ re a guọghọ ua.”

³³ Ẹre ivbi e Midian hia, emwa Amẹlẹk kevbe avbe ẹwae ni rre uwu ato na do si koko, iran na fian Ẹzẹ Jọdan rra, iran na bu agọ ye Iya Jezrẹl.

³⁴ Orhiọn e Nọyaẹnmwa keghi hin yan Gidiọn, ọ keghi si orhu ya tie emwa ẹwae Abiẹzẹ wẹ ne iran lele irẹn.

³⁵ Ọ na gie uhunmwu la otọe ẹwae Manasẹ hia, ọ na ya tie iran wẹ ne iran lele irẹn. Ọ kevbe gie emwa gha rrie ẹwae Asia, Zẹbulọn kevbe Naftali, Iran kevbe deba ẹre.

³⁶ Ẹre Gidiọn na tama Osanobua wẹẹ, “U khare wẹ u ra lo mwẹ ya miẹn ivbi Izrẹl fan.

³⁷ Banbanna nian, I ra mu eto ohuan eso ye otọ vbe ehe ne ima na wiẹn ọka. A deghẹ a ghi miẹn vbe ẹdẹ a gbe ighẹ evbu rre eto ohuan nii, ighẹ otọe ni lẹga ẹre kae, I ghi rẹn wẹẹ te u gele ho ne I miẹn Izrẹl fan.”

³⁸ Erriọ ọ re ọ gele wa sunu. E Gidiọn ghi rhiọrre vbe owiẹ ẹdẹ ne ọ lele ẹe, ọ keghi miẹn ighẹ evbu rre eto ohuan nii, ọ ke mi evbu ne ọ vuọn ọkpan hoho ladian vbọ.

³⁹ Ẹre Gidiọn na vbe tama Osanobua wẹẹ. “Ghẹ gie ohu mwẹ mu ẹẹn, gun mwẹ ye guan uhukpa na kẹkan. Lahọ ye gunmwẹ ye eto ohuan na ghe ẹre ghe uhukpa. Gie eto ohuan nii ka vbene evbu gha na gha rre otọ ni lẹga ẹre hia”

⁴⁰ Vbe asọn nii, Osanobua kevbe ru ẹe vberriọ. Eto ohuan nii ọkpa ọ re ọ ka ẹe vbe ne evbu na gba otọe hia.