Giọgis 5 - Edo Bible (E Baibol Ẹdo) Version 1996

Ihuan Ne Dẹbora Kevbe Barak So

¹ Ẹdẹ nẹdẹrriọ, e Dẹbora kevbe Barak ne ovbi Abinoam keghi so ihuan na:

² “Wa rho e Nọyaẹnmwa! Ivbi Izrẹl keghi wa yan yọ ne iran gbinna; emwa nii hia keghi ye oghọghọ rhie egbe yọ.

³ Wa ne avbe ọba, wa danmwehọ. Wa rhie ekhọe yọ, enikhaemwisẹ! I gha so ihuan kpe emwi iku ne Osanobua Izrẹl ighẹ Nọyaẹnmwa.

⁴ E Nọyaẹnmwa, ẹghẹ ne u na kpao vbe oke Sẹa vbe u ke iwewe Idọm ladian, otọe rueghe, amẹ keghi rhọ ke iso rre, vbe ẹmwata, amẹ kegha kpe ke ideghedeghe kua.

⁵ “Avbe oke nekhua guọe vbe odaro Nọyaẹnmwa e Sainai, vbe odaro e Nọyaẹnmwa ne Osanobua Izrẹl.

⁶ “Vbe ẹghẹ Siamga ne ovbi Anat, vbe ẹghẹ Jaẹl. Ekhẹn ni hin ẹsin ma ghi gha la ẹvbo nii gberra odẹ abọtọ ọre ekhẹn ghi gha la,

⁷ emwa lẹ hin ore Izrẹl rre, e Dẹbora; ehia keghi divbiẹ vbe u te rre u rre zẹ vbe iye ne ivbi Izrẹl.

⁸ A khọn okuo otọe ni ra vbe ivbi Izrẹl zẹ ẹbọ ọvbehe? Vbe arhin arriaisẹn iyeva ni rre Izrẹl (40,000) a miẹn ne ọ mu asa vbo ra asoro?

⁹ Ekhọe mwẹ rrọ deba iran ni kha yan okuo Izrẹl deba iran ni tobọ iran gha khian wa rho e Nọyaẹnmwa!

¹⁰ Wa gha ta ẹe, wa ni hin ekẹtẹkẹtẹ nọfua ni tota yan egbalọ ẹsin ke uwa ni gha ya owẹ, yo ehe ne uwa rrie.

¹¹ Wa danmwẹ ehọ, iran ni gbe owogho vbe ọkpẹn uhae ẹmwẹ akhọnmiotọ ọghe Nọyaẹnmwa ọ re iran ta akhọnmiotọ ọghe ivbi Izrẹl, emwa e Nọyaẹnmwa keghi gbe ukpukpẹ kevbe avbe ẹvbo iran.

¹² Ke odaro, Dẹbora! Ke odaro! Ke odaro! So ihuan! Ke odaro! Khianmwu, e Barak ne ovbi Abinoam viọ avbe oghunmwu ruẹn gha rrie!

¹³ Iran ne ekhọe esi vbọ keghi bu ọkaolotu iran rre emwa e Nọyaẹnmwa ba ẹre, iran mu egbe igbinna

¹⁴ iran ke Ifreim gha di uwu iya. Vbe iyeke ẹwae Bẹnjamin kevbe emwa rẹn. Makẹ ọ re iran ni ghae okuo ni rrọọ kegha dee avbe olotu ke Zẹbulọn gha dee,

¹⁵ avbe ọkaolotu Isaaka lele Dẹbora gha dee, ẹn, Isaaka rre, kevbe Barak tobọ ẹre, iran keghi lele uẹ la uwu iya. Sokpan iwanegbe la ẹwae Riubẹn, iran ma sẹtin ta ẹe ne iran gha dee,

¹⁶ vbọzẹ ne iran na tota ke avbe ohuan vbe owa yi? Ne iran gha na danmwẹ ehọ vbene ọsuohuan tie oghẹn ohuan? Emwata nọ, iwanegbe lao ẹwae Riubẹn, iran ma sẹtin ta ẹe ne iran gha dee.

¹⁷ Ẹwae Dan keghi mudia ye oha erria. Ẹwae Asia keghi mudia vbe eghute okun, iran mudia lele ọkpẹn okun.

¹⁸ Sokpan ẹwae Zẹbulọn kevbe Naftali, keghi viọ uhunmwu mwẹ atataobọ vbe odaro okuo.

¹⁹ “Avbe ọba keghi rre do gbinna, vbe Tanak, vbe ọkpẹn ẹzẹ Mẹgido, avbe ọba Kenan gbinna ẹn sokpan, iran ma miẹn esiliva rhie gha rrie.

²⁰ Avbe orhọnmwẹ kegha gbinna ke odukhunmwu rre vbe ne iran ya vin la aro iso gberra. Iran gu e Siseria gbinna.

²¹ Orogho Kisiọn kpolo iran gha rrie. E Kisiọn ne ẹzẹ ogbigbi I gha gbe ukpukpẹ, I gha ye ẹtin gbe ukpukpẹ!

²² Avbe ẹsin kegha gbe ọguọguọ khian, iran na gha solo ibata iran ye otọ.”

²³ Erriọ odibo e Nọyaẹnmwa khare, “Wa fi e Mẹrẹz unu. ihẹn, ihẹn vbe uhunmwu iran ni rre evba. Iran ma ye Nọyaẹnmwa obọ, iran ma rre vbe ivbi iyokuo gbinna ne ẹẹn.

²⁴ “Okhuo ne uhunmwu ẹnrẹn ghi maa sẹ ọre Jaẹl khin, amwẹ Hebẹ ne ovbi Ken. Okhuo ne uhunmwu ẹnrẹn maa zẹ, ne ọ rre owa ukpọn.

²⁵ E Siseria nọ rẹn amẹ, sokpan ọ keghi sa ewẹn ne ẹẹn, ọ na ye ọkpan mose mose mu ewẹn ẹmila gie ẹe

²⁶ ọ rhie ukeke owa ukpọn ye obọkpa, ọ rhie umọmọ iwinna ye obọ nọkpa, ọ fi e Siseria emwi, ọ na guọghọ ẹre uhunmwu. Ọ hae fua, ọ na rẹnkhẹn ọẹn ruan.

²⁷ Ọ keghi luẹluẹ ye iguẹ. Ọ de gbe otọ, ọ na lovbiẹ hiii vbe owẹ ọre, owẹ ọre, ọ re ọ na luẹluẹ ye iguẹ, ọ na de, ọ de fi otọ, ọ na wu.

²⁸ “Iye Siseria rhie aro la ewindo ladian. Ọ na la uvun ẹkhu ghe ore. ‘Vbe ikẹkẹ okuo ẹre ma na rherhe rre hẹ yi? Vbọzẹ ne avbe ẹsin ẹnrẹn ma na rherhe rre?’

²⁹ Avbe ikhuo umẹwaẹn ẹre rhie ewanniẹn ne ẹẹn rẹn keghi ye gha ta ẹmwẹ ọkpa yan egbe

³⁰ ‘Ọvbokhunvbi ọkpa ra eva ne ovbiyokuo ọkpọkpa. Ukpon ighobioye ọghe Siseria, emwi ne a do mose mose ne urhu ọbokhuo.’

³¹ “Erriọ e Nọyaẹnmwa, te eghian ruẹn hia gha wulo, sokpan ne avbe ọse ruẹ gha wan uwanmwẹ vbe owẹn owiẹ!” Ẹre ọfumwegbe na vbe do gha rrọọ la ukpo iyeva.