Giọgis 4 - Edo Bible (E Baibol Ẹdo) Version 1996

E Dẹbora Ke Barak

¹ Ehud ghi wu nẹ ivbi Izrẹl na vbe dọlegbe ru orukhọ ghe Nọyaẹnmwa.

² Ẹre Nọyaẹnmwa na gie Jabin ọba ọkpa ọghe Kenan ne ọ gha rriọba vbe Hazọ khọn miẹn iran otọ. Ọmwa ne ọ gha re ọkaokuo ẹre kegha re Siseria ne ọ gha rre Harosiẹt ọghe iran ne ẹ i re Ju.

³ E Jabin kegha mwẹ ikẹkẹ okuo ema tọn iyisẹn yan uri enẹ (900) Ọ keghi ye ekhọe dan gha khaemwisẹ yan ivbi izrẹl, vbe uyinmwẹ ne ọ wegbe kevbe ọkhọ, la ukpo ugie. Ẹre ivbi Izrẹl na datie Nọyaẹnmwa ne ọ do yi iran obọ.

⁴ E Dẹbora ne amwẹ Lapidot kegha re akhasẹ. Rẹn ọ gha bu ohiẹn ne ivbi Izrẹl vbe ẹghẹ nii.

⁵ Udin ọkpa rre ẹkpo e Rama kevbe Bẹtẹl vbe ẹvbo oke Ifreim. Evba ọ re ọ gha tota yi, ivbi Izrẹl ghi vbe gha bu ẹre rrie evba ne iran do gha họn vbene ọ kha hẹ.

⁶ Ẹdẹ ikẹtin ghi rre okhuo nii keghi gie ne a tie Barak ne ovbi Abinoam ne ọ vbe re ovbi ẹvbo ne a tie ẹre Kedẹs vbe Naftali, ọ Keghi tama rẹn wẹẹ, “E Nọyaẹnmwa ne Osanobua Izrẹl ọ re ọ gie uhunmwu na guẹ: ‘Gha khian ne u ya viọ emwa ruẹn gha rrie uhunmwu oke Tabọ viọ arhin arriaisẹn igbe vbe ẹwae Naftali vbe Zebulọn.

⁷ I gha si e Siseria ne ọkaokuo ne ọ gbearoghe ivbi iyokuo Jabin gha dee ne ọ do gu uẹ gbinna vbe Ẹzẹ Kisiọn. Ọ gha viọ ikẹkẹ okuo ẹre kevbe ivbi iyokuo mwẹ obọ, sokpan, I gha ru ẹe ne obọ ruẹ ke odukhunmwu ne ẹẹn.’ ”

⁸ E Barak keghi tama Dẹbora, “A deghẹ u gha lele mwẹ yo I gha yo sokpan a deghẹ u ma lele mwẹ yọ, me i vbe rae khekherriọ.”

⁹ Okhuo nii keghi wanniẹn wẹẹ, “Ọ ma, I gha lele uẹ yo. Sokpan a i ghi ra ye akhọnmiotọ ne ọ rrọọ tian ruẹn, rhunmwuda e Nọyaẹnmwa gha rhie Sisera ye okhuo obọ.” Ẹre Dẹbora na kpaegbe, ọ na lele Barak gha rrie Kedẹs.

¹⁰ E Barak keghi tie ẹwae Zẹbulọn kevbe Naftali gha die Kedẹs, arhin arriaisẹn igbe keghi lele ẹe, Dẹbora keghi lele ẹe gha khian.

¹¹ Banbanna nian, e Hebẹ ne ọmwa Ken keghi tan owa ukpọn rẹn sikẹ Kedẹs ye ọkpẹn okan ne ọ rre Zananim. Ọ si kpao hin ehe ne emwa Ken nekpa ye ighẹ ivbi Hobab ne erha amwẹ Mosis.

¹² A keghi ya tama Siseria wẹ Barak ne ovbi Abinoam kpao gha rrie Oke Tabọ.

¹³ Rẹn keghi tie ikẹkẹ okuo ematọn iyisẹn yan arriaenẹ (900) ọghe ọe kevbe emwa rẹn hia ladian, ọ na wẹ ne iran ke Harosiẹt ọghe iran ne ẹ i re Ju gha rrie Ẹzẹ Kisiọn.

¹⁴ Ẹre Dẹbora na tama e Barak wẹẹ, “Khianmwu, ẹdẹ ne Nọyaẹnmwa gha gie obọ ruẹ ke ukhunmwu ne Siseria ọ re ọna khin. E Nọyaẹnmwa ọ re ọ ke odaro nuẹn.” Ẹre Barak na tuorre vbe oke Tabọ, irẹn kevbe arhin arriaisẹn igbe (10,000) ni gu ẹe.

¹⁵ E Barak ghi wa ladian ke irẹn kevbe ivbi iyokuo ẹre, e Nọyaẹnmwa keghi fian otighi fi e Siseria ke ẹe kevbe ikẹkẹ okuo ẹre kevbe emwa rẹn egbe, E Siseria keghi tuorre vbe ikẹkẹ okuo ẹre, ọ na ye owẹ lẹ fua.

¹⁶ E Barak keghi khu avbe ikẹkẹ okuo nii kevbe ivbiyokuo gha rrie Harosiẹt ọghe iran ne ẹ i re Ju. Iran keghi gbele ivbiyokuo e Siseria hia fo fẹẹrẹ; ọkpa ma vbe kẹe vbọ.

¹⁷ E Siseria keghi lẹ gha rrie owa ukpọn ọghe Jaẹl ne amwẹ Hebẹ ne ovbi Ken rhunmwuda e Jabin ne ọba Hazọ kevbe ẹgbẹe Hebẹ, wa ma ẹko egbe ẹghẹ na.

¹⁸ E Jaẹl keghi khian bu e Siseria vbe odẹ, ọ tama rẹn wẹẹ, “La owa enọwanrẹn, gha die uwu owa ukpọn mwẹ. Ghẹ gie afianma fian an.” Rhunmwuda ọnii, rẹn keghi la owa, okhuo nii keghi ya rhie ẹre lẹre ye iyeke ukpọn ne a tan gue odẹ.

¹⁹ Rẹn keghi tama rẹn wẹẹ, “Lahọ sa amẹ mẹ wọn rhunmwuda ohanmwẹ amẹ gbe mwẹ.” Okhuo nii keghi kie ọgọ ohian ne ewẹn ẹmila ye, ọ na sa ne ẹẹn wọn, ọ na vbe dọlegbe rhie ẹre lẹre.

²⁰ Ẹre irẹn na tama okhuo na wẹẹ, “Mudia ye onurho owa ukpọn, a deghẹ ọmwa rre do nọ ruẹn deghẹ ọmwa rre emwa na u ghi tama rẹn wẹ ẹn o.”

²¹ Egbe wọ e Siseria sẹrriọ wẹ ọ na vbiẹ ua fan an an. Ẹre Jaẹl na rhie umọmọ kevbe ise ne a ya tan owa ukpọn, ọ na hẹko sikẹ ọre, ọ na so ise la ẹre akan ehọ ginna otọe. Rẹn keghi wu.

²² Ugbẹn vbe Balak ghi gualọ e Siseria sẹ evba, e Jaẹl keghi khian bu ẹre sẹ odẹ ọ tama rẹn wẹẹ, “Larre vbe edinran, I gha ma ruẹn ọmwa ne u gualọ.” Rẹn keghi lele ẹe la owa, ọ ghi ghe ghe Siseria vbe otọe, ọ wu, ise ne a ya tan owa ukpọn ha ẹre uhunmwu ladian.

²³ Ẹdẹ nẹdẹrriọ, Osanobua keghi khọn Jabin ne ọba Kenan miotọ ne ivbi Izrẹl.

²⁴ Ivbi Izrẹl keghi tua obọ vbe egbe Jabin ọ sẹre ọ sẹre, rhinrin iran te do fuẹn ọnrẹn uan.