Giọgis 3 - Edo Bible (E Baibol Ẹdo) Version 1996

Ẹvbo Ne A Sẹrae Ye Otọe Nii

¹ E Nọyaẹnmwa keghi sẹ avbe ẹvbo eso rae vbe otọe nii ne a ya danmwẹ ivbi Izrẹl ni ma yo okuo vbe Kenan ghe.

² Te irẹn ru ọna ne ọ ya ma orre ọkpọkpa vbe Izrẹl re vbene a khọn okuo hẹ, kpataki iran ni ma he yo okuo ẹdẹ.

³ Iran ne a sẹrae kegha re ẹvbo Filistia isẹn, ivbi e Kenan hia e Saidọn, e Hivi ni rre uhunmwu Oke Lebanọn kevbe Oke Bal rhinrin ya sẹ Ada Hamat.

⁴ Te a wẹ ne a ya iran danmwẹ ivbi Izrẹl ghe ẹsẹse, ne a miẹn ehe na rẹn a deghẹ iran gha ya uhi ne Nọyaẹnmwa la obọ Mosis rhie ne avbe erha iran odede ru emwi ra ẹn o.

⁵ Erriọ ọ re ivbi Izrẹl na gbe ẹkun sẹ otọ gha yin vbe uwu ẹbu emwa Kenan, Amọri, Pẹriz, Hivi kevbe Jebus.

⁶ Iran keghi gba gha viọ ivbi egbe rọnmwẹ, iran kevbe gha gho ẹbọ iran.

Otniẹl

⁷ Ivbi Izrẹl keghi mianmian e Nọyaẹnmwa ne Osanobua iran, iran na ru orukhọ ghe ẹre, iran kevbe gha gho avbe Bal kevbe Asiẹrra.

⁸ Rhunmwuda ọnii, ohu Izrẹl kegha mu e Nọyaẹnmwa, ọ na gie Kusian Risiatem ne ọba Mẹsopotamia khọn iran miotọ. Iran keghi ya ukpo erẹnrẹn gha rre ototọ asẹ ọre.

⁹ Ẹghẹ nii ọ re ivbi Izrẹl na datu tie Nọyaẹnmwa, rẹn keghi gie okpia ọkpa gie iran ne ọ miẹn iran fan. Ọna kegha re Otniẹl ne ovbi Kenan ne ọtẹn Kelẹb ne kherhe.

¹⁰ Orhiọn e Nọyaẹnmwa keghi hin yan ẹnrẹn, ọ keghi gha re ọkaolotu Izrẹl. Otniẹl kegha rrie okuo, e Nọyaẹnmwa keghi gie ẹe khọn ọba Mẹsopotamia miotọ.

¹¹ Ọfumwegbe kegha rre otọe ni la ukpo iyeva, ẹre Otniẹl ne ovbi Keniz ghi na wu.

Ehud

¹² Ivbi Izrẹl keghi vbe dọlegbe rukhọ ghe e Nọyaẹnmwa. Rhunmwuda ọna, e Nọyaẹnmwa keghi gie Ẹgiọn ne ọba ọghe Moab wegbe sẹẹ Izrẹl.

¹³ Ẹgiọn keghi deba emwa Amọn, kevbe Amẹlẹk, obọ iran keghi ke okhunmwu ne ọghe ivbi Izrẹl, iran na khọn mu Jẹriko ne ẹbu udin.

¹⁴ Ivbi Izrẹl kegha rre ototọ Ẹgiọn vbe ukpo eva irrọvbugie.

¹⁵ Ẹghẹ nii ọ re ivbi Izrẹl na datu tie e Nọyaẹnmwa, ọ keghi vbe gie okpia ọkpa ne ọ do miẹn iran fan. Ọmwa nii ọrọre Ehud, ẹkpẹnagobọ ne ovbi Gera vbe ẹwae Bẹnjamin. Ivbi Izrẹl keghi viọ emwi ihaoko ne Ehud viọ gie Ẹgiọn ne ọba Moab.

¹⁶ Ehud keghi ya dunmwu agbada ne ọ mwẹ unu eva ne ọ re omwa ibata ọkpa vbe ukhiọnmwẹ, ọ keghi gba ẹe ye obọ erha ọmwa ẹnrẹn vbene ọ na rhuan ukpọn gue ẹre.

¹⁷ Rẹn keghi do viọ emwi ihaoko gie Ẹgiọn, ne ọ re ọmwa ne ọ kpọlọ egbe ẹsẹse.

¹⁸ Ugbẹn vbe Ehud ghi viọ emwi ihaoko ne ẹẹn nẹ, ọna wẹ ne iran ni viọ ihẹ ni rre gha rrie.

¹⁹ Sokpan Ehud keghi fi egbe werriẹ vbe ọ sẹ okuta ne a gbẹn vbe ọkpẹn Gilgal, ọ keghi kha wẹẹ, “Umogun, I mwẹ ẹmwẹ ẹkhokho ne I ra tama ruẹn.” Ọba keghi tama avbe eguọmwadia wẹẹ, “Wa kpao sẹ ima ọkpa rae.” Iran keghi gele ladian.

²⁰ Ehe ne ọba nii na tota rẹn ọkpa kẹkan vbe odukhunmwu vbe ughugha ne ọ furre, Ehud keghi bu ẹre gha de do tama rẹn wẹẹ, “Osanobua gie mwẹ uhunmwu ne I tama ruẹn.” Ọba nii ke kpaegbe.

²¹ Ehud keghi ye obọ iye ọmwa yuo agbada ni vbe obọ erha ọmwa, ọ na ziẹn rẹn ye ọba ni ẹko.

²² Umozo ni keghi wa kpero ye uwu ẹre, uhin ya sẹ uze ẹre, efun egbe degue ẹre rhunmwuda, Ehud ma si ẹe ladian hin ẹko ọba rre. Umozo keghi do si ukpẹ ladian vbe akharha ẹre.

²³ Ẹre Ehud na ladian, ọ keghi bi ẹkhu gbe, ọ keghi khui ẹre.

²⁴ Ọ na kpao eguọmwadia ghi rre iran ghi do ghe, a khui urho iran te gha ro ighẹ te ọba ra ya ghughẹ.

²⁵ Iran keghi khẹ sẹ omwa ẹghẹ ne ọ ke yi sokpan ugbẹn vbe ọba ma ghi kie urho, iran keghi rhie isanhẹn, iran na kie ẹre. Iran keghi do vba arowa iran vbe otọ, ọ wu.

²⁶ Ehud keghi lẹfua vbe ẹghẹ ne iran ya gha khẹ nii. Ọ keghi gberra avbe okuta ne a gbẹnnẹ, ọ na lẹ fi Sẹira.

²⁷ Ọ ghi sẹ evba, ọ keghi kpe okpe vbe uhunmwu oke Ifreim ne ọ ya tie ivbi Izrẹl gha die okuo, ọ na ke uhunmwu oke ke odaro ne iran.

²⁸ Ọ keghi tama iran wẹẹ, “Wa lele mwẹ! E Nọyaẹnmwa rhie akhọnmiotọ ne uwa nẹ vbe uhunmwu ivbi e Moab ne eghian uwa.” Iran keghi lele ẹe tuorre, iran na ya khọn mu ehe ne emwa Moab gha na te fian Jọdan rra. Iran ma gie orhiọnkpa kẹkan fiaẹn rra.

²⁹ Ẹdẹrriọ nii, iran keghi gbele arriaisẹn igbe vbe uwu ivbi iyokuo ni wegbe ọghe Moab ọkpa ne ọ miẹn uhunmwu i rrọọ.

³⁰ Ivbi Izrẹl keghi khọnmiotọ vbe uhunmwu e Moab ẹdẹ nẹdẹrriọ. Ọfumwegbe kegha rre otọe nii la ukpo iyenẹ.

Siamga

³¹ Ọkaolotu ne ọ ghi lele kegha re Siamga ne ovbi Anat. Ọ keghi ya uwẹnrhiẹn ne a ya khu ẹsin gbele arriaeha (600) vbe emwa Filistia. Rẹn vbe miẹn Izrẹl fan.