Giọgis 20 - Edo Bible (E Baibol Ẹdo) Version 1996

Izrẹl Mu Egbe Okuo

¹ Ivbi Izrẹl hia fẹẹrẹ, ke Dan vbe odẹ okuọ ya sẹ Biẹsiẹba vbe odẹ ekẹn kevbe otọ Giliad vbe odẹ ahọ, ehia keghi khuẹnniẹn utiemwẹ na. Iran keghi wa si koko ye odaro e Nọyaẹnmwa vbe Mispa.

² Avbe ọkaolotu ẹwae Izrẹl hia kevbe gha rre ehe ne emwa Osanobua na si egbe koko na. Ivbi iyokuo ni ya owẹ khian kegha re arriaisẹn uri eva (400,000).

³ Ivbi e Bẹnjamin keghi họn wẹ ivbi Izrẹl nekpa hia wa rrie Mizpa. Ivbi Izrẹl keghi nọ wẹẹ, “Tama ima vbe ne iran ya ru ọkhọ na hẹẹ.”

⁴ E Livai ne iran gbe ẹre ọsiọre ua ni keghi wanniẹn wẹẹ, “Mẹ vbe ọse mwẹ keghi gba gha rrie Gibea vbe otọ Bẹnjamin ne ina ya gbe asọn ọkpa vbe evba.

⁵ Ivbi e Gibea kegha dee do mu mwẹ, iran keghi ghae lẹga owa nii vbe asọn. Te iran te ho ne iran gbe mwẹ uan. Sokpan ye ihe ọnii, iran keghi mu ọse mwẹ, iran keghi ye ẹtin vbe iwegbe gha gu ẹe ru emwi ọdọ vbe amwẹ, rẹn na ghi wu.

⁶ Ọre I na mu ikun ẹnrẹn, I na giagia ẹre ukhiọnmwẹ, I na ghae ẹre la otọ Izrẹl hia. Emwi dan, emwi ọrhiae ọ re iran na ru vbe uwu ẹbu ima.

⁷ Ivbi Izrẹl ọ re uwa ni rre emwa na hia khin. Vbe a ra ru ye emwi na?”

⁸ Emwa ni hia keghi wa koko kpaegbe, iran wẹẹ, “Ọmwa ne ọ gha yo owa vbe uwu ima i rrọ, ọ re owa ne owa ọ re ọ ye ra owa ukpọn nọ.

⁹ Emwi ne ima gha ru ọ re ọna khin, ma gha yan uta yọ, ma ghi zẹ emwa eso ne iran ya khọn Gibea.

¹⁰ Obọkpa vbe uwu igbe vbe ivbi Izrẹl ghi viọ evbare ne ivbi iyokuo, ni ghi de kẹe ghi ya rri e Gibea oya ye uyinmwẹ ihin ne iran yinrin vbe Izrẹl.”

¹¹ Ẹre emwa hia ni rre Izrẹl na do sikoko vbe iro ọkpa, ọnii nọ wẹ ne a khọn nene ẹvbo.

¹² Ẹwae Izrẹl hia keghi wa gie emwa lele ẹwae e Bẹnjamin hia, ya kha wẹẹ, “Vbe ọ na khun emwi dan ne uwa ru yi?

¹³ Banbanna nian, viọ emwa oya nii ni rre Gibea ladian, ne ima gbele iran an, ne a kpe ọkhọ na hin Izrẹl rre.” Sokpan ivbi e Bẹnjamin ma zẹdẹ zẹ ye ivbi Izrẹl nekpa re.

¹⁴ Iran keghi ke ẹvbo ni rre ẹwae Bẹnjamin hia gha dee ni iran do gu Izrẹl gbinna.

^15-16 Iran keghi tie ivbi iyokuo arriaisẹn enẹ irrọvbọgban (26,000) ladian vbe ẹvbo iran. Yevbe gberra ọna, emwa Gibea kevbe hannọ arhin iyisẹn yan uri eha (700) ladian, emwa ne a wa mobọ hannọ. Vbe uwu iran ọre arhin iyisẹn yan uri eha ni rre ẹkpẹn nagobọ ye, iran na hia gha sẹtin ya umọvọn ya okuta fi ukpẹ eto ọkpa vbe ne ẹ i na ba ẹe ku.

¹⁷ Ivbi Izrẹl kevbe hannọ arriaisẹn uri eva (400,000) vbe ne a i na ka e Bẹnjamin yọ, iran ne a ma ẹre ẹmwẹ okuo ne a khọn.

Okhọn Ne A Khọn Emwa E Bẹnjamin

¹⁸ Ivbi Izrẹl kegha rrie owa ugamwẹ vbe Bẹtẹl. Iran na ya nọ Osanobua vbe evba wẹẹ, “De ẹwae ne ọ gha ka dekun e Bẹnjamin?” E Nọyaẹnmwa keghi wanniẹn wẹ, ẹwae Juda.

¹⁹ Ẹre ọ ghi na sẹ owiẹ, ivbi Izrẹl keghi kpaegbe, iran na ya bu agọ ye ọkpẹn Gibea.

²⁰ Iran yo ya gu ẹvbo ni khọn, iran na mwamwa okuo ye ihe ne iran gha na viọ aro da ẹvbo nii.

²¹ Ivbi iyokuo e Bẹnjamin keghi ke adesẹ ore ẹvbo ladian vbe ẹdẹ ghi te gbe, iran keghi gbele arriaisẹn eva yan ugie (22,000) vbe ivbi iyokuo Izrẹl.

^22-23 Ivbi izrẹl kegha rrie owa ugamwẹ, iran na ya khiẹ vbe odaro e Nọyaẹnmwa rhinrin ya sẹ ota. Iran nọ rẹn wẹẹ, “Ne ima ye ya gu etẹn mwa ighẹ ivbi e Bẹnjamin gbinna ra?” E Nọyaẹnmwa keghi wanniẹn, “Ẹn.” Ẹre ẹtin ghi na la ivbi Izrẹl iwu, iran na dọlegbe mwamwa ivbi iyokuo iran ye ihe enẹ ne iran ka vbe gha ye vbe ikpẹdẹ enẹ ne ọ gberra.

²⁴ Ivbi Izrẹl keghi dọlegbe mu bu ivbi Bẹnjamin ukpogieva.

²⁵ Vbe ukpogieva na, emwa Bẹnjamin kevbe ladian ke Gibea gha dee, iran kevbe gbele arriaisẹn eva i rrọvbugie (18,000) vbe ivbi iyokuo ne a ma re emwi vbe ivbi Izrẹl.

²⁶ Ivbi Izrẹl hia kevbe gha rrie Bẹtẹl ya khiẹ. Iran keghi tota ye odaro e Nọyaẹnmwa vba, iran ma rri evbare ọ te ya sẹ ota. Iran si sara, iran keghi giẹn emwi ne a ya zọ ese eso ohoho vbe odaro e Nọyaẹnmwa.

^27-28 Iran kevbe nọ e Nọyaẹnmwa ọta (Ẹkpẹti Ile ọghe Nọyaẹnmwa, e Bẹtẹl ọ re ọ gha ye vbe ẹghẹ ne a kha na. E Finihaz ne ovbi Eliaza ne ovbi Errọn ọ re ọ gha gbearoghe ẹre.) Iran keghi nọ wẹẹ, “Ne ima ye ya gu etẹn ima ighẹ ivbi Bẹnjamin gbinna ra ne ima ghẹ ghi yo?” E Nọyaẹnmwa keghi kha wẹẹ, “Ẹdẹ ne akhuẹ, I gha gie uwa khọnmiotọ vbe uhunmwu iran. Wa ya gbinna.”

²⁹ Ẹre ivbi Izrẹl na viọ ivbi iyokuo eso lẹro lẹga Gibea.

³⁰ Vbe ikpẹdẹ ne ogieha, iran keghi mu bu ivbi iyokuo e Bẹnjamin gha khian, iran na mwamwa ivbi iyokuo iran ye ihe, iran na viọ aro da e Gibea vbene iran ka ru ẹe yi.

³¹ Ivbi e Bẹnjamin keghi ladian ne iran do gbinna, iran na gie iran ladian hin adesẹ ore ẹvbo ni rre, iran keghi suẹn gha gbele emwa eso vbe odẹ Bẹtẹl, odẹ ne a la ye Gibea kevbe avbe uwu oha. Iran keghi gbele omwa ivbi Izrẹl ọgban.

³² Ivbi e Bẹnjamin keghi kha wẹẹ, “Obọ mwa vba iran vbene ọ ka ye ẹdẹ.” Sokpan ivbi Izrẹl keghi kha wẹẹ, “Wa gie ima lẹ, ne a miẹn ehe na silo iran ladian vbe ore ẹvbo la odẹ.”

³³ Ẹre iran ni bun sẹ vbe ivbi iyokuo Izrẹl na lẹ ladian, iran na ya dọlegbe mwamwa egbe vbe Baaltama, sokpan iran ni lẹga ẹvbo nii keghi wa sannọ ladian vbe udomwurri vbe ehe ne iran lẹre yi vbe ẹvbo oke ni lẹga ẹvbo nii.

³⁴ Arhin arriaisẹn igbe (10,000) ne a mobọ wa hannọ vbe ivbi Izrẹl keghi dekun Gibea, okuo keghi lọmwa. Ivbi e Bẹnjamin ma rẹn wẹ te a ra fuẹn iran an.

³⁵ E Nọyaẹnmwa keghi rhie akhọnmiotọ ne ivbi Izrẹl vbe uhunmwu ivbi e Bẹnjamin. Ivbi Izrẹl keghi gbele arhin iyisẹn yan arriaisẹn ekesọgban (25,100) vbe avbe eghian iran vbe ẹdẹ nẹdẹrriọ.

³⁶ Ẹre emwa Bẹnjamin na do rẹn wẹ a khọn iran mutan nẹ. Ivbi Izrẹl keghi lẹ ne emwa Bẹnjamin rhunmwuda iran mu ẹtin yan emwa ne iran hẹ lẹre lẹga Gibea.

Vbene Obọ Izrẹl Ya Ke Ukhunmwu Hẹ

³⁷ Iran na keghi zẹgiẹgiẹ rhulẹ ghe odẹ Gibea; iran na wa obọ gba ehe hia, iran na gbele emwa hia ni rre ẹvbo nii.

³⁸ Ivbi iyokuo Izrẹl kevbe emwa ne a hẹ lẹre keghi gba mwamwa ama ne egbe iran. Iran gha bẹghe ighẹ ighogho nọkhua gbe vbe adesẹ ore ẹvbo.

³⁹ Ivbi Izrẹl ni gbinna vbe odaro okuo ghi fi egbe werriẹ, vbe ẹghẹ na, emwa Bẹnjamin gbele sẹ arhi ọgban nẹ vbe ivbi Izrẹl. Iran na gha tama egbe iran wẹẹ, “Obọ mwa vbe vba iran nẹ vbene ọ ka ye ẹdẹ.”

⁴⁰ Ẹghẹ nii, ama nii ke rhie egbe ma. Ighogho nọkhua kegha gbe vbe adesẹ ore ẹvbo. Emwa Bẹnjamin keghi gbe aro ghe odieke, ọ keghi yan iran unu uan vbe iran miẹn wẹ ẹvbo nii hia wa mu erhẹn.

⁴¹ Ẹre ivbi Izrẹl na fi egbe werriẹ, otighi nọkhua na gba ivbi e Bẹnjamin egbe rhunmwuda iran miẹn ọẹn wẹ te a ra fuẹn iran nii.

⁴² Iran keghi lẹ hin odaro ivbi Izrẹl rre, iran na lẹ la ato, sokpan iran ma sẹtin lẹ fe. Ivbi iyokuo ne ọ wa gbinna ni rrọọ, kevbe ivbi iyokuo ni ghi ke ẹvbo ni ladian keghi ke iran ye ako, iran keghi fuẹn iran an.

⁴³ Ivbi Izrẹl keghi ke iran ye ako, iran na khu iran vbe ne a i na vbe yakọ ya sẹ ihe ọkpa vbe a ghi bu e Gibea, iran na gha gbele iran vbene iran khian nii.

⁴⁴ Iran keghi gbele arriaisẹn eva irrọvbugie (18,000) vbe avbe ivbi iyokuo e Bẹnjamin ni maa sẹ.

⁴⁵ Iran ni dekẹe keghi werriegbe, iran na lẹ la ato, gha rrie okuta nọkhua ọghe Rimọn. Iran kevbe gbele arriaisẹn isẹn vbe odẹ. Ivbi Izrẹl keghi khulo eni dekẹe, iran na gha hele iran ike. Iran na gbele arriaisẹn eva.

⁴⁶ Inu emwa Bẹnjamin ne iran ghi gbele ẹdẹrriọ kegha re arriaisẹn ekesọgban (25,000), ehia keghi wa re ivbi iyokuo ni din.

⁴⁷ Sokpan, uri eha keghi fi egbe werriẹ, iran na lẹghe uwu ato gha rrie okuta nọkhua ọghe Rimọn, iran na gbe uki enẹ vbe evba.

⁴⁸ Ivbi Izrẹl na werriegbe, iran na mu aro da ni ghi kẹe vbe ivbi e Bẹnjamin, iran na gha gbele iran an, ikpia kevbe ikhuo ni rre ẹvbo ni ke ẹe kevbe aranmwẹ kevbe avbe emwi ọvbehe hia ne iran ghi miẹn. Iran keghi giẹn ẹvbo hia ni ghi re eni uan.