Giọgis 2 - Edo Bible (E Baibol Ẹdo) Version 1996

Odibo E Nọyaẹnmwa Vbe Bokim

¹ Odibo e Nọyaẹnmwa keghi ke Gilgal kpao gha rrie Bokim, ọ Keghi tama ivbi Izrẹl wẹẹ “I viọ uwa ke Igipt ladian, I keghi viọ uwa gha die otọ ne I ve avbe erha uwa odede re. I keghi kha wẹẹ, ‘Mẹ I ra rra ile ne I gu uwa ta.

² Wa ghẹ gu emwa otọ na ta ile rhọkpa, wa guọghọ aka iran sotọ.’ Sokpan wa ma he ru vbene I tama uwa. Iyeke ẹre ọ re uwa ghi ru ye ihe ẹre.

³ Te ime ghi tama uwa na wẹ mẹ I ghi khulo emwa na ladian vbene uwa ya nana ghe odaro. Eghian uwa iran ra gha khin, ẹbọ iran ghi vbe gha re edanmwẹ nọ wegbe ne uwa.”

⁴ Odibosa nii ghi ta ọna nẹ, ivbi Izrẹl hia keghi gbe eve ua

⁵ (ọnii ọ si ẹe ne a na tie evba Bokim.) Iran keghi zọ ese ghe Nọyaẹnmwa vbe evba.

Uwu E Jọsua

⁶ E Jọsua keghi zẹ ivbi Izrẹl hia urrie, dọmwadẹ ọghe ọe keghi kpao ne ọ ya mu otọ ne a ghae sẹ ọre obọ ya khian ọghe ọe.

⁷ Ivbi Izrẹl kegha ga e Nọyaẹnmwa vbe ẹghẹ ne Jọsua ya vbe agbọn hia kevbe iyeke vbe ọ wu nẹ, iran keghi ye vbe gha ga e Nọyaẹnmwa vbe omwa ẹghẹ ne avbe ekaolotu ne aro ẹre sẹ emwi hia ne Nọyaẹnmwa ru ne Izrẹl he ye gha rrọọ.

⁸ Ẹre Jọsua ne ovbi e Nọn ne ọ vbe re ọguọmwadia e Nọyaẹnmwa na wu vbe ukpo igbe yan iyisẹn (110).

⁹ A keghi re ẹre ye obọ ọghe ọe vbe otọe nii, vbe Timnat Sera vbe Ifreim ne ẹvbo oke vbe odẹ okuọ ọghe Oke Gaas.

¹⁰ Orre ni hia keghi wulo, orre ne ọ ghi lele ẹe keghi mianmian e Nọyaẹnmwa kevbe emwi ne ọ ru ne Izrẹl.

Izrẹl Fi Iyeke Gbe Ugamwẹ E Nọyaẹnmwa

¹¹ Ẹghẹ nii ivbi Izrẹl keghi ru orukhọ ghe Nọyaẹnmwa, iran na ya gha gho e Bal.

¹² Iran keghi fi iyeke gbe ugamwẹ e Nọyaẹnmwa ne Osanobua avbe erha iran odede, Osanobua ne ọ viọ iran ke otọe Igipt ladian. Iran keghi suẹn gha gho avbe ẹbọ ọvbehe, ẹbọ avbe emwa ni lẹga iran. Iran kegha ya uhunmwu rhanmwẹ otọ ne avbe ẹbọ na, iran na ya ohu mu e Nọyaẹnmwa.

¹³ Iran fi iyeke gbe ugamwẹ e Nọyaẹnmwa, iran na ya gha gho avbe Bal kevbe Astat.

¹⁴ Ohu Izrẹl keghi kakabọ mu e Nọyaẹnmwa, ọ na gie avbe ikpata gha mu bu iran yo ne iran vbe gha rha iran. Ọ keghi gie obọ avbe eghian ni lẹga iran gba iran. Ivbi Izrẹl ma ghi sẹtin da egbe iran yi hin obọ ẹbe.

¹⁵ Ẹghẹ hia ne iran ya yo okuo, e Nọyaẹnmwa ghi mu aro ne ọ khọ da iran zẹ vbe ne ọ tama iran zẹ wẹ rẹn gha ru. Iran keghi do gha rre uwu ọlọghọmwa nọkhua.

¹⁶ Ẹghẹ nii ẹre e Nọyaẹnmwa na viọ avbe ọkaolotu ni wegbe ne Izrẹl, iran ni do miẹn iran fan vbe obọ avbe ikpata.

¹⁷ Sokpan, iran ma zẹye avbe ọkaolotu na ẹre. Iran ma rhie ekhọe lele Nọyaẹnmwa, iran na ya gha gho avbe ẹbọ ọvbehe. Avbe erha iran te lele uhi e Nọyaẹnmwa, sokpan orre na ke wa dobọ ẹre yi vbe ọ ma ghi kpẹe.

¹⁸ Ẹghẹikẹghẹ ne Nọyaẹnmwa ya rhie ọkaolotu ne iran, ọ ghi yi ẹre obọ, ọ ghi miẹn emwa rẹn fan vbe obọ avbe eghian iran vbe ẹghẹ ne ọkaolotu gha ya vbe agbọn. E Nọyaẹnmwa keghi tohan iran rhunmwuda, iran da tie ẹre vbe ẹghẹ oya kevbe ukpokpo.

¹⁹ Sokpan ọkaolotu ghẹ ghi wu nẹ, emwa nii ghi vbe werriegbe la odẹ nẹdẹ, iran ghi vbe ru emwi ne o khọrhiọn sẹ orre ne iran lele. Iran ghi lele avbe ẹbọ ọvbehe, iran ghi ga iran vbe ya uhunmwu rhanmwẹ otọ ne iran. Iran keghi ye izevbudu gha ru emwi dan iran khian.

²⁰ Ohu Izrẹl keghi kakabọ mu e Nọyaẹnmwa, ọ na kha wẹẹ, “Avbe emwana rra uhi ne I rhie ne avbe erha iran odede ne iran ya gha ru emwi.

²¹ Rhunmwuda ne iran ma na họn ẹmwẹ mẹ, I i ghi khu avbe okpẹvbo ne Jọsua sẹrae ye otọe nii vbe ọ wu.

²² Odẹ vbe nian ọre I gha ya rẹn a deghẹ ivbi Izrẹl gha rhie uhi mwẹ mwẹ vbene avbe erha iran ru ra ẹn o.”

²³ Rhunmwuda ọnii, e Nọyaẹnmwa keghi sẹ avbe ẹvbo ne ọ ma viọ ye ototọ asẹ, e Jọsua rae ọ ma khulo iran ladian vbe ọwarọkpa.