Giọgis 19 - Edo Bible (E Baibol Ẹdo) Version 1996

E Livai Kevbe Egbakhian Ẹnrẹn

¹ Vbe ẹghẹ nii, ẹkpo ne Izrẹl i na mwẹ ọba, e Livai ọkpa kegha rrọ vbe odẹ ehe ne ẹvbo oke ọghe Ifreim sẹe fẹẹrẹ, ọ keghi ya zẹ ọse ọkpa vbe Bẹtlẹhẹm ne Juda.

² Sokpan ohu ẹre keghi mu okhuo nii, ọ re ọ na werriegbe gha rrie owa erha ẹe vbe e Bẹtlẹhẹm. Ọ keghi gbe uki enẹ vbe odọ.

³ Ẹre okpia nii na wẹ rẹn gha ya gualọ ẹe ne irẹn rherhe ọe ne ọ gha die owa. Ọ keghi rhie ọguọmwadia ẹre kevbe ekẹtẹkẹtẹ eva ba egbe. Okhuo nii keghi miẹn rẹn yi vbe owa erha ẹe. Ugbẹn vbe erha okhuo nii ghi miẹn ọẹn, ọ keghi ya oghọghọ gbe ọbokhian ne ẹẹn.

⁴ Erha ẹe keghi tua unu mu ẹẹn wẹ ne ọ tota, ọ re irẹn na tota la ikpẹdẹ enẹ. Ọdọ vbe amwẹ na ọ re ọ gba gha rri evbare, iran ọ vbe gba gha lovbiẹ.

⁵ Ọ ghi sẹ owiẹ ikpẹdẹ ne ogienẹ, iran keghi rherhe rhiọrre, iran na mu egbe ne iran kpao. Sokpan erha okhuo nii keghi tama e Livai nii wẹẹ, “Wa ka rri evbare nẹ, erriọ ọ gha na fu egbe sẹ, u sẹtin kpaegbe vbe a gha zẹkpẹe.”

⁶ Erriọ ọ re ikpia eveva na keghi gba gha re, iran na gba gha da. Ẹre erha ọvbokhan okhuo na na tama rẹn wẹẹ, “Lahọ ye gbe asọn na vbe emwa, ne u gie ẹko gha rhẹnrhiọn.”

⁷ E Livai nii keghi suẹn okhian ne ọ kpao, sokpan erha ẹe keghi rherhe ọe ne ọ tota, ẹre ọ na ye gbe asọn nii vbe evba.

⁸ Ọ ghi se ikpẹdẹ ne ogisẹn, ọ keghi kpaegbe vbe owiẹ vbirrivbirri ne ọ gha rrie, sokpan erha ọmọ okhuo na keghi tama rẹn wẹẹ, “Lahọ rri evbare eso ne u gie ẹdẹ gha khian buan nẹ.” Ikpia eva nii kevbe gba rri evbare.

⁹ Ugbẹn vbe okpia na kevbe egbakhian rẹn kevbe ọguọmwadia ẹre ghi suẹn okhian, erha ẹe keghi kha wẹẹ, “U ma miẹn nian ighẹ ota khuẹrhẹ ghi nọ, u ghi wa mudia nẹ vbe asọn na. Ebi ghi ra ro na, tota ne ugha zẹ owẹ vbene ọ khọn ruẹn. U sẹtin kpaegbe vbe owiẹ vbirrivbirri akhuẹ ne u deyan okhian gha rrie owa.”

^10-11 Sokpan, okpia na ma ghi ho ne Ọ ye gbe asọn ọvbehe vbe evba, ọ re irẹn vbe egbakhian na la odẹ. Iran mwẹ ekẹtẹkẹtẹ eva ne a gbalọ emwi ne a ya tota ye ore iyeke. Te ẹdẹ ghi ra mu vbe iran sẹ Jebus (ọnii nọ wẹ Jerusalẹm), ẹre ọguọmwadia nii na tama arowa ẹre wẹẹ, “Gia mudia ne a gbe asọn na vbe Jebus na?”

^12-13 Sokpan, arowa ẹre keghi kha wẹẹ, “Ẹvbo ne ẹ i re ọghe ivbi Izrẹl ọ re ima gha na yakọ ra? Ma gha gberra sikẹ odaro ne a ya gbe asọn na vbe Gibea ra Rama.”

¹⁴ Ẹre iran na gberra Jebus, iran na gha khian. Owẹn ghi ra defua iran na sẹ Gibea. Ewae Bẹnjamin iran ni rre evba ke rre.

¹⁵ Iran keghi van obọ lele odẹ nii ne iran ya gbe asọn nii vbe evba. E Livai keghi ya tota ye adesẹ ughe ẹvbo na, sokpan a ma miẹn ọmwa ne ọ viọ iran la owa ne iran ya gbe asọn nii vbe evba.

¹⁶ Vbe ẹghẹ ne a kha na, ediọnmwa ọkpa kegha dee, ọ winna iwinna ẹdẹ hoho nẹ vbe ugbo. Ẹvbo oke Ifreim ọ re ọ ke rre vbe okaro, sokpan Gibea ọ re irẹn ghi yin. (E Bẹnjamin ọre emwa ni rre evba ke rre.)

¹⁷ Ediọnmwa keghi bẹghe avbe ekhẹn na vbe adesẹ ughe, ọ keghi nọ iran wẹẹ, “Vbe uwa ke dee? Vbe uwa rrie?”

¹⁸ E Livai ni keghi wanniẹn wẹẹ, “E Bẹtlẹhẹm ne Juda ọ re ima ke dee. Uwu ẹvbo oke Ifreim gban an, ne imẹ ye ọ re ima rrie. I ma he miẹn ọmwa ne ọ rhie mwẹ la owa.

¹⁹ Ma mwẹ evbare kevbe irunmwu ne ekẹtẹkẹtẹ mwẹ gha re, ebrẹd kevbe ayọn ne imẹ vbe ọse mwẹ gha re kevbe ọguọmwadia mwẹ. Emwi ne ima gha lo hia wa gue ima.”

²⁰ Ediọnmwa nii keghi kha wẹẹ, “I gha miẹn uwa yi vbe owa mwẹ. I gha gbe aro ghe uwa, lahọ wa ghẹ vbiẹ adesẹ ughe.”

²¹ Ọ keghi viọ iran gha rrie, ọ keghi rhie evbare ne ekẹtẹkẹtẹ iran. Avbe orhunmwuyẹn nii keghi kpe owẹ iran, iran na re, iran da ẹe.

²² Iran ghi rre uwu ọyẹnmwẹ nii, vbe udomwurri, emwa oya eso keghi ke ẹvbo nii rre, iran lẹga owa nii, iran na kpe ẹkhu gbigbigbi. Iran keghi tama ediọnmwa nii wẹẹ, “Rhie okpia ne ọ leluẹ gha die owa han ladian, ma ra gu ẹe ru emwi ọdọ vbe amwẹ.”

²³ Sokpan, ediọnmwa ni tama iran wẹẹ, “Ẹ i re erriọ, wa ne ọse mwẹ! Wa lahọ, wa ghẹ zẹ iba ukẹkẹmwẹ vbe nian! Orhunmwuyẹn mwẹ ọ re okpia na khin!

²⁴ Wa ghe ọsiọre kevbe ovbi mwẹ ne ọ ma he rẹn okpia. I ra ya viọ iran ladian gie uwa, wa sẹtin ru emwi ne ọ khọn uwa ghe iran, sokpan wa ghẹ ru emwi ohan vberriọ ghe okpia na!”

²⁵ Sokpan avbe ikpia nii ma danmwẹ ehọ ẹre. Ẹre e Livai nii ghi na rhie ọsiọre, ọ na rhie ẹre fi ore deba iran. Iran keghi ye ẹtin vbe iwegbe gha gu ẹe ru emwi, iran na ru ẹre emwi oya vbe asọn nii hia, iran ma vbe dobọ yi ẹdẹ te do gbe.

²⁶ Ẹdẹ ghi gbe, okhuo nii kegha dee, ọ na de gbe otọ vbe onurho okpia nii, vbe ehe ne ọdọ ẹre ye. Evba ọ re ọ gha ye ẹdẹ te gbe.

²⁷ Ọdafẹn ọnrẹn keghi kpaegbe vbe owiẹ nii, ugbẹn vbe ọ ghi kie urho ne ọ la okhian ẹnrẹn, ọ keghi miẹn ọse irẹn lovbiẹ ye onurho, ọ keghi niẹn obọ ya gha gualọ ẹkhu.

²⁸ Okpia nii keghi kha wẹẹ, “Kpaegbe ne u gie ima gha khian.” Sokpan, ọ ma rhie ewanniẹn yọ. Rhunmwuda ọnii, ọ keghi mu ikun ẹnrẹn gba yan ekẹtẹkẹtẹ, ọ na suẹn okhian.

²⁹ Rẹn ghi sẹ owa, ọ keghi la owa, ọ na ya rhie erọ. Ọ keghi mu ikun ọsiọre, ọ keghi giagia ẹe ye ukhiọnmwẹ iweva, ọ na viọ ẹre gie dọmwadẹ ẹwae hia ni rre Izrẹl.

³⁰ Ọmwa ne ọ rhirhi miẹn ọẹn ghi kha wẹẹ. “Ma ma miẹn egbe emwi vberriọ ẹdẹ. Egbe emwi vbenian ma he sunu ke ne ivbi Izrẹl ya kpa hin Igipt rre. Wa roro ẹe! De emwi ne ọ kere ne a ru yọ?”