Giọgis 18 - Edo Bible (E Baibol Ẹdo) Version 1996

E Maika Kevbe Ẹwae Dan

¹ Ọba i rre Izrẹl ẹghẹ nii. Vbe ẹghẹ na, ẹwae Dan kegha gualọ otọ ne iran gha mu ne iran yin ẹnrẹn. Rhunmwuda, do sẹ ẹghẹ nii, otọ ma he sẹ iran obọ zẹ vbe ọghe iran vbe ẹbu avbe ẹwae Izrẹl.

² Ẹre ivbi e Dan na zẹ arhin isẹn ni kẹ re vbe avbe ẹgbẹe ni rre ẹwae nii, iran keghi gie iran ke Zora kevbe Estao gha khian wẹ ne iran ya la otọe ni ne iran vbe ba ẹe ghee. Ọ re iran na gha rrie ẹvbo oke ọghe Ifreim, iran na di owa Maika ya.

³ Iran ghi rre evba nii, iran keghi ghe vbene igbama e Livai na ya guan hẹ, iran na rhunmwuda onii mudia iran na nọ rẹn wẹẹ, “Vbe u a ru vbe emwa na yi? Gha ọ rhie ruẹ gha di edinran?”

⁴ Rẹn keghi wanniẹn tama iran wẹẹ, “Mẹ vbe Maika guan kugbe nẹ, te imẹ winna ne ẹẹn zẹ vbe ohẹn, ọ vbe ha mwẹ osa.”

⁵ Iran keghi tama rẹn wẹẹ, “Lahọ, nọ Osanobua a deghẹ okhian ne ima rrie na gha de ẹse.”

⁶ Ohẹn keghi wanniẹn, “Wa ghẹ zẹdẹ mu udu kei ye emwi rhọkpa, e Nọyaẹnmwa wa su uwa khian vbe okhian na.”

⁷ Ẹre ikpia ihinrọn ni ghi na kpao, iran na gha rrie Lais. Iran keghi miẹn vbene ẹkun wa sẹ emwa ni rre ẹvbo nii otọ hẹ zẹ vbe emwa Saidọn, ọmẹhẹ ọ re iran wa khin, iran i gu emwa rhọkpa muan ẹmwẹ. Iran mwẹ emwi ne iran ho hia. Iran wa khian rrei ne ivbi e Saidọn. Iran i vbe mwẹ emwa ne iran gba ru hiehie.

⁸ Ikpia isẹn na ghi werriegbe gha rrie Zora kevbe Estao nẹ, emwa ẹvbo iran keghi nọ iran emwi ne iran ghi miẹn.

⁹ Iran wanniẹn wẹẹ, “Giẹgiẹ, wa gia ya khọn Lais. Ma miẹn otọe vbe evba, ọ keghi wa vbe maa ẹsẹse. Wa ghẹ tota vbe emwa vbe na i na ru emwi rhọkpa, ẹgiẹgiẹ! Wa la rọ ne uwa ya mu ẹẹn.

¹⁰ Wa gha sẹ evba, wa gha miẹn wẹ emwa nii i vbe mu idandan rhọkpa. Ẹvbo nọkpọlọ nọ. Emwi ne ọ mwa ghi ho hia rrọọ. Osanobua vbe mu ẹẹn ne uwa nẹ.

¹¹ Ẹre arhin uri eha vbe ẹwae Dan na kpao vbe Zora kevbe Estao, iran na mu egbe igbinna.

¹² Iran kegha khian, iran na bu agọ ye odẹ orrie ọghe kirriat Jearim vbe Juda. Ọnii ọ si ẹe ne a na ye tie evba nii Agọ e Dan.”

¹³ Iran ghi ke evba kpao iran na sẹ owa e Maika vbe ẹvbo oke Ifreim.

¹⁴ Ẹre iran isẹn ni ya ba ẹvbo ni rre odẹ Lais ghi na tama ihua iran wẹẹ, “Wa rẹnrẹn nian ighẹ amazẹ erhan ne a ya esiliva rhu rre uwu owa na? Amazẹ ọvbehe ye vbe rrọọ deba adaghọ. Vbe uwa ro ighẹ a gha ru ẹe hẹẹ?”

¹⁵ Rhunmwuda ọnii, iran keghi na werriegbe iran na gha rri owa e Maika, ehe ne igbama Livai nii ye. Iran keghi nọ rẹn vbene emwi hia ye ẹe hẹ.

¹⁶ Vbe ẹghẹ ne a kha na arhin uri eha ne ivbi iyokuo e Dan, ni mu egbe ne iran gha ya gbinna mudia vbe onurho.

¹⁷ Avbe ọrhẹ nisẹn nii keghi la owa, iran keghi mu amazẹ erhan nii ne a ya esiliva rhu, kevbe avbe amazẹ nekpa kevbe adaghọ. Ohẹn keghi gu arhin uri eha ni mu egbe okuo nii gha rre onurho.

¹⁸ Ugbẹn vbe ikpia nii ghi la owa e Maika ya viọ avbe emwi itaemwi ni nẹ, ohẹn keghi tama iran wẹẹ, “Vbe uwa ru na yi?”

¹⁹ Iran tama rẹn wẹẹ, “Ye obọ gue unu ruẹn. Ghẹ zẹdẹ guan, lele ima kpao ne u do ya gha re ne ọ gu ima zẹ iro kevbe ohẹn mwa. Ẹre u re ohẹn ne ohoho ẹwae Izrẹl ọ re ọ maa sẹẹ u do gha re ohẹn ne ẹgbẹe orhunmwu ọkpa kẹkan.”

²⁰ Ọna keghi ya ẹko ohẹn nii rhiẹnrhiẹn, ọ re ọ na rhọ avbe emwi itaemwi nii, ọ na lele iran.

²¹ Iran keghi werriegbe, iran na si okhian ghe odieke, iran keghi viọ ivbi iran, ẹmila iran kevbe emwi ne iran mwẹ ke odaro.

²² Iran khian rrei nẹ vbe owa e Maika iran ke tie ẹdogbo ẹre ladian ne iran do gbinna. Iran keghi do vba emwa e Dan na.

²³ Iran na go yan iran. Ẹre emwa e Dan na fi egbe werrie, iran nọ e Maika wẹẹ, “Vbe ọ khin na yi? Vbe iran na si ọbọbọ rrie?”

²⁴ E Maika keghi kha wẹẹ, “Vbe uwa ta na yi, ‘Wẹ vbe ọ khin?’ Wa rhie ohẹn mwẹ kevbe avbe ẹbọ ne I mannọẹn, wa kevbe ladian. De emwi ne I ghi ye mwẹ?”

²⁵ Emwa e Dan nii keghi tama rẹn wẹẹ, “Ghẹ ghi guan gberra evba ne a ghẹ miẹn wẹ ohu mu emwa na, iran ghi do guẹ gbinna. Wẹ kevbe ẹgbẹe ruẹ hia ghi wulo.”

²⁶ Ẹre ivbi e Dan na gha khian. E Maika miẹn wẹ iran wa wegbe sẹ irẹn gbe, rhunmwuda ọnii, ọ na werriegbe, ọ na gha rrie owa.

^27-28 Avbe ivbi e Dan na keghi viọ emwi ne Maika gho ke ẹe kevbe ohẹn ọnrẹn. Iran na gha khian ya khọn Lais ne ẹvbo emwa ọmẹhẹ ne khuẹrhẹ, ne ọ rre iya ne Bẹtẹhọb vbe ye. Iran keghi gbele emwa ni rrọọ, iran na giẹn ẹvbo nii uan. A ma miẹn ọmwa ne ọ miẹn iran fan rhunmwuda ẹvbo ni rrei vbe Saidọn, emwa ne iran vbe gba ru kugbe ẹ i rrọọ. Ivbi e Dan keghi dọlegbe bọ ẹvbo nii, iran na yin ẹnrẹn.

²⁹ Iran keghi fi eni ẹvbo nii werriẹ hin Lais rre gha tie ẹre Dan zẹ vbene a tie erha iran odede ighẹ Dan ne ovbi e Jekọb.

³⁰ Ivbi e Dan na do mu amazẹ nii ye otọ ne iran gha gho ẹre. E Jonatan ne ovbi Gẹsiọn ne ovbi e Mosis keghi gha ru ohẹn ne emwa e Dan na, uniẹn ọnrẹn ọ re ọ gha ru ohẹn a te do miẹn wẹ a hẹ iran gha rrie iwe.

³¹ Amazẹ ọghe Maika kegha rre evba vbe ẹghẹ hia ne Owa Ukpọn ọghe Osanobua vbe ya gha rre e Silo.