Giọgis 17 - Edo Bible (E Baibol Ẹdo) Version 1996

Amazẹ E Maika

¹ Okpia ọkpa kegha rrọọ ne a tie ẹre Maika, ọ kegha rre ẹvbo uhunmwu oke Ifreim.

² Ọ keghi tama iye ẹe wẹẹ, “Ẹghẹ ne iran na do igho esiliva iyisẹn yan arriaisẹn (1,100) hẹ, u na ya mu ẹbọ gbe nene oyi. I họn ẹn ighẹ erriọ u ru ẹe. Ne I tama ruẹn nian, avbe igho nii gue mwẹ. Mẹ ọ re ọ viọ ẹre.” Iye ẹe keghi kha wẹẹ, “Te e Nọyaẹnmwa gha fiangbuẹ ovbi mwẹ!”

³ Ọ keghi viọ igho esiliva iyisẹn yan arriaisẹn nii gie iye ẹe. Iye ẹe keghi kha wẹẹ, “Ovbi mwẹ, ne ihẹn ni ghẹ miẹn ehe na sẹ uẹ egbe, mẹ ra tobọ mwẹ ya ọghọ vbute ya ẹe fi ohan ne Nọyaẹnmwa. A gha ya ka amazẹ erhan, a ghi ya esiliva rhu ẹe. Rhunmwuda ọnii nian, I gha dọlegbe viọ ẹre nuẹn.”

⁴ Sokpan rẹn kevbe dọlegbe viọ ẹre ne iye ẹe. Okhuo nii keghi viọ uri vbe igho nii, ọ keghi viọ ne igun ẹrọnmwọ, ọ keghi ya ẹe ru amazẹ ne a ya erhan ka ẹe, a keghi ya esiliva rhu ẹe. A keghi mu ẹẹn ye owa e Maika.

⁵ Okpia na ighẹ e Maika mwẹ ehe ne a na ga ọghe obọ ẹre ọ keghi mannọ avbe amazẹ, ọ kevbe mwẹ adaghọ, ọ na rhi ovbi ẹre ọkpa yọ ne ọ gha re ohẹn ọnrẹn.

⁶ Ọba i rre Izrẹl ẹghẹ nii, dọmwadẹ ọghọe keghi wa gha ru vbene ọ khọn rẹn.

⁷ Igbama ọkpa kegha rre Bẹtlẹhẹm vbe Juda, e Livai ne ọ ke Juda rre nọ.

⁸ Ọ keghi si kpao vbe Bẹtlẹhẹm rre, ne ọ ya gualọ ehe ne ọ gha dia. Ehe ne ọ na khian nii, ọ keghi do sẹ owa Maika vbe ẹvbo oke Ifreim.

⁹ E Maika keghi nọ rẹn wẹẹ, “Vbe u a ke rre?” Rẹn keghi wanniẹn wẹẹ, “E Livai ne ọ ke Bẹtlẹhẹm ne ọ rre Juda rre ọ re I khin, ehe ne I gha dia ọ re I gualọ.”

¹⁰ E Maika keghi kha wẹẹ, “Tota ke mwẹ, gha re ne ọ gunmwẹ zẹ iro kevbe ohẹn, I gha ha ruẹ igho erọnmwọ igbe vbe ukpo kevbe ukpọn eso deba evbare ruẹ.”

¹¹ Igbama e Livai na keghi kue yọ ne ọ tota ke Maika ne ọ vbe gha ye vbe ọmọ nẹ ẹn.

¹² E Maika keghi ya ẹe ru ohẹn ọnrẹn, rẹn kegha rre owa e Maika.

¹³ E Maika keghi kha wẹẹ, “Banbanna nian, I rẹnrẹn wẹ e Nọyaẹnmwa gha gie agbọn ma mwẹ vbene I ghi na mwẹ ohẹn ne ọ re e Livai na.”