Giọgis 14 - Edo Bible (E Baibol Ẹdo) Version 1996

E Samsin Kevbe Ọvbokhan Okhuo Vbe Timna

¹ Ẹdẹ ọkpa, e Samsin keghi yo e Timna, ọ keghi ye aro ba ọmọ okhuo e Filistia ọkpa vbe evba.

² Rẹn keghi dọlegbe gha rrie owa, ọ na tama erha ẹe kevbe iye ẹe wẹẹ, “I ye aro ba ọmọ okhuo e Filistia ọkpa vbe Timna, wa rhie ẹre mẹ, I ho ne I rhie ẹre rọnmwẹ.”

³ Sokpan, erha ẹe vbe iye ẹe keghi tama rẹn wẹẹ, “Vbe u a ghi ra ya rhie okhuo hẹ yi vbe ivbi e Filistia ni ga ẹbọ? We ma ghi miẹn ọmọ okhuo rhọkpa vbe avbe ivbi etuẹn ra vbe uwu avbe ivbi emwa ruẹn?” Sokpan Samsin tama erha ẹe wẹẹ, “Rẹn ọre I we ne u rhie mẹ, ẹmwẹ ọnrẹn yẹ mwẹ.”

⁴ Erha ẹe vbe iye ẹe ma rẹn wẹ e Nọyaẹnmwa ọ re ọ ya e Samsin ru emwi na rhunmwuda e Nọyaẹnmwa gualọ odẹ ne ọ gha na gu emwa Filistia khọn. Vbe ẹghẹ ne a kha na, emwa Filistia ọ re ọ gha kha yan ivbie Izrẹl.

⁵ Ẹre Samsin na gha rrie Timna ke irẹn kevbe erha ẹe kevbe iye ẹe. Ugbẹn vbe iran ghi sikẹ ọkpẹn ogba erhan ne a ye ọmọ rẹn ru ayọn ne ọ baa, ọ keghi họn vbe ovbi oduma ọkpa gbọ ẹre.

⁶ Sokpan orhiọn e Nọyaẹnmwa keghi rhie ẹtin ye Samsin iwu. Rẹn keghi ye obọ kẹkan yanghan ovbi oduma nii ye eva vbe ne a miẹn wẹ ovbi ẹwe nọ. Sokpan, ọ ma ta emwi ne irẹn ru ma erha ẹe ra iye ẹe.

⁷ Rẹn keghi gha khian ya gu ọmọ okhuo nii guan, ẹmwẹ ọnrẹn keghi ye ọre.

⁸ Vbe iyeke ikpẹdẹ eso, e Samsin keghi dọlegbe gha khian ne ọ ya rhie ọmọ okhuo nii rọnmwẹ. Rẹn keghi van obọ vbe odẹ ne ọ ya ghe oduma ne irẹn gbe, ọ keghi yan ẹre unu uan vbe ọ miẹn owọn ro ye uwu ẹre.

⁹ Ọ keghi zẹ vbe owọn ni mwẹ obọ ọ na gha rriọe khian. Ọ keghi bu erha ẹe kevbe iye ẹe, ọ na zẹ ne iran vbọ. Iran kevbe rriọe sokpan, e Samsin ma tama iran wẹ uwu egbe oduma ne ọ wu nii ọre irẹn na zẹ ọe.

¹⁰ Erha ẹe kegha rrie owa ọmọ okhuo nii, ọ re Samsin na le evbare tie emwa sẹ owa vbe evba. Erriọ ọ re avbe igbama gha a ru ẹe.

¹¹ Emwa Filistia ghi miẹn ọẹn, iran na viọ igbama ọgban ne iran do gu ẹe tota.

^12-13 E Samsin keghi tama iran wẹẹ, “I ra mu ibo ọkpa ne uwa san. Wa i ra sẹtin san rẹn ikpẹdẹ ihinrọn ọghe iruemwi na te do gberra sokpan deghẹ wa sẹtin, I gha viọ ukhiọnfọ eto ovbiohuẹ ọgban ne mose mose kevbe ẹwu ne mose mose ughughan ọgban ne uwa.” Iran keghi tama rẹn, “Ta ibo ruẹ ma ima, gie ima họn ẹn.”

¹⁴ Rẹn keghi kha wẹẹ, “Uwu emwi ne ọ rri ọmwa, ọ re emwi ne a re ke rre; uwu emwi ne ọ wegbe, ọ re emwi ne ọ rhiẹnrhiẹn ke rre.” Ikpẹdẹ eha gberra, iran ma ye sẹtin san ibo nii.

¹⁵ Ọ ghi sẹ ikpẹdẹ ne ogienẹ, iran keghi tama amwẹ Samsin wẹẹ, “Rẹrẹ ọdafẹn ọn, ne ọ tama ima emwi ne a ya ibo ẹre kha. A deghẹ u ma ru vberriọ, ma gha mu erhẹn ye owa erha a, ma ghi giẹn ruẹn uan ye uwu ẹre. Te uwa eva tie ima sẹ owa ne uwa miẹn ehe na rha ima ra ẹ i re erriọ?”

¹⁶ Ẹre amwẹ Samsin na ye ameve bu ẹre gha khian, ọ tama rẹn wẹẹ, “U i ho ẹmwẹ mwẹ, te ohu mwẹ wa mu ẹẹn, u mu ibo ne avbe ọse mwẹ san, u ma tama mwẹ emwi ne a ya ẹe kha.” Rẹn wanniẹn tama rẹn wẹẹ, “Ne I guẹ rẹn nian wẹ I ma he ta ẹe ma erha mwẹ ra iye mwẹ. Vbọzẹ ne I gha na ta ẹe ma ruẹn?”

¹⁷ Okhuo nii na wa ya ikpẹdẹ ihinrọn ọghe imuemwi nii wa gha viẹ, sokpan, ọ ghi sẹ ikpẹdẹ ne ogihinrọn, ọ keghi san ibo nii ma rẹn rhunmwuda, te ọ ghi te ra ya etalọ gbe ẹe rua ba ẹmwẹ na. Ọ re rẹn na ya tama avbe ọsiọre.

¹⁸ Ọ ghi sẹ ikpẹdẹ ne ogihinrọn, e Samsin ghi te ya lovbiẹ emwa ẹvbo nii keghi tama rẹn wẹẹ, “De emwi ne ọ ra rhiẹnrhiẹn sẹ owọn? De emwi ne ọ ra wegbe se oduma?” Samsin keghi wanniẹn wẹẹ, “Akpawẹ ẹ i re ẹmila mwẹ wa ya gua, Wa ghẹ he rẹn emwi ne a ya ẹe kha nian.”

¹⁹ Ẹre orhiọn e Nọyaẹnmwa na rhie ẹtin ye Samsin iwu, rẹn na gha rhie Askẹlọn. Ọ keghi gbele ikpia ọgban vbe evba, ọ na fu iran emwi viọ, ọ na viọ ukpọn iran ni mose ne emwa ni san ibo ẹre. Rẹn na ghi ya ohu guọn mwẹ egbe gha rrie ba ẹmwẹ emwi ne ọ sunu.

²⁰ Iran na rhie amwẹ Samsin ne okpia ne ọ gha sẹ odibo ne ẹẹn vbe ẹghẹ irhiọha.