Giọgis 12 - Edo Bible (E Baibol Ẹdo) Version 1996

E Jẹfta Kevbe Ivbi Ifreim

¹ A keghi tie ivbi Ifreim ladian, I iran na fian Ẹzẹ Jọdan rra la Zafọn, iran na tama Jẹfta wẹẹ, “Vbe u a na rhie gberra ya khọn ivbi Amọn hẹ yi vbe ne u ma na tie ima? Te ima ra giẹn owa na yan ruẹn uhunmwu!”

² Sokpan, e Jẹfta tama iran wẹẹ, “Mẹ kevbe emwa mwẹ keghi wa gha mwẹ ẹzọ nọkhua vbe obọ ivbi Amọn. I tie uwa sokpan, wa ma fan mwẹ hin obọ ẹre rre.

³ I ghi miẹn ighẹ wa i ra miẹn mwẹ fan, I keghi rhie uhunmwu mwẹ atataobọ, I na fian ẹzẹ rra ya gu emwa Amọn gbinna. E Nọyaẹnmwa keghi gun mwẹ khọn miotọ vbe uhunmwu iran. De ne uwa ghi ra do gu mwẹ gbinna yi nian?”

⁴ Ẹre Jẹfta na viọ ivbi Giliad hia ladian, ọ na gu Ifreim gbinna, ọ keghi khọn miotọ vbe uhunmwu iran. (Emwi ne Ifreim gha ta ọrọre wẹẹ, “Wa ne ivbi Giliad ni rre Ifreim kevbe Manasẹ, te uwa lẹkua hin Ifreim rre.”)

⁵ Ivbi e Giliad keghi khọn mu ehe ne a gha na sẹtin fian Jọdan rra, ne ivbi Ifreim ghẹ miẹn ehe na fian ẹn rra. Ovbi Ifreim ghẹ ghi sẹ evba, ọ na gha ho ne irẹn lẹ fua, ọ na wẹ ne iran gie irẹn gberra, iran ghi nọ rẹn wẹẹ, “Ovbi Ifreim we khin ra.” Ọ gha kha wẹ “Ẹn ẹn,”

⁶ iran ghi wẹ ne ọ kha wẹẹ “Sihibolẹt” Sokpan rẹn ghi kha wẹẹ “Sibolẹt” rhunmwuda, ẹ i guara ta ẹe ẹse. Iran ghi mu ẹẹn piẹnkhẹnrhẹn, iran ghi gbe ẹe rua ye evba vbe ehe ne a na fian Ẹzẹ Jọdan rra. Ivbi Ifreim ne a gbele vbe ẹghẹ nii kegha re arriaisẹn eva yan iyeva (42,000).

⁷ E Jẹfta keghi ya ukpo ehan su ivbi Izrẹl, rẹn keghi wu, a na re ẹre ye ẹvbo ẹre vbe Giliad.

Ibzan, Elọn Kevbe Abdọn

⁸ E Jẹfta ghi ru ọghe ọe gberra nẹ Ibzan ne ovbi Bẹtlẹhẹm keghi do gha re ọkaolotu Izrẹl.

⁹ Rẹn kegha mwẹ emọ ikpia ọgban. Ọ keghi viọ ivbi ẹre nii ikhuo ọgban ne emwa ọvbehe ne i re ivbi ẹwae irẹn, ọ keghi viọ emọ ikhuo ọgban kevbe ẹwae ọvbehe rre do viọ ne ivbi ẹre hẹ rọnmwẹ, ukpo ihinrọn ọre Ibzan su Izrẹl la.

¹⁰ Rẹn keghi wu, a na re ẹre ye Bẹtlẹhẹm.

¹¹ Ibzan ghi vbe ru ọghe ọe gberra nẹ, Elọn, ne ovbi e Zẹbulọn keghi su Izrẹl la ukpo igbe.

¹² Rẹn keghi wu, a na re ẹre ye Aijalọn vbe otọe Zebulọn.

¹³ Vbe iyeke Elọn, Abdọn ne ovbi e Hilẹl, ọmwa Piratọn kegha su Izrẹl.

¹⁴ Rẹn kegha mwẹ emọ ikpia iyeva kevbe eyẹ ọgban, ni ghi gha hin ekẹtẹkẹtẹ ekigbesiyenẹ (70). Ukpo erẹnrẹn ọre Abdọn su Izrẹl la,

¹⁵ rẹn keghi vbe wu, a na re ẹre ye Piratọn vbe otọe Ifreim vbe ẹvbo oke ọghe emwa Amẹlẹk.