Giọgis 11 - Edo Bible (E Baibol Ẹdo) Version 1996

¹ E Jẹfta ne ovbiyokuo ne ọ ke e Giliad rre kegha re ovbiyokuo ne ọ din ẹsẹse. A vbe tie erha ẹe Giliad, iye ẹe kegha re ebabotu.

² Okhuo ne Giliad rhie ye owa kevbe biẹlẹ ne ẹẹn, emọ ne amwẹ ọnrẹn biẹlẹ nẹ ẹn ghi wan rre, iran keghi khu e Jẹfta fua, iran tama rẹn wẹẹ, “Wẹ i ra rri ukhu erha ima rhọkpa rhunmwuda ovbi okhuo ọvbehe ọ re u khin.”

³ E Jẹfta keghi lẹ hin ehe ne avbe etiọnrẹn ye rre, ọ na ya gha rre ẹvbo ne a tie ẹre Tob. Ọ keghi silo avbe irhia yevbe eso ba egbe, iran keghi gba gha hẹ yo hẹ rre.

⁴ Ọ ma ghi kpẹe, emwa Amọn keghi ya gha gu Izrẹl khọn.

⁵ Ọna ghi sunu, avbe ọkaolotu Izrẹl keghi ya rhie Jẹfta ke Tob rre.

⁶ Iran tama rẹn wẹẹ, “Do viọ ima gha khian ne ima miẹn ehe na sẹtin gu Amọn gbinna.”

⁷ Sokpan, e Jẹfta tama iran wẹẹ, “Te imẹ te wẹ te uwa i ghi ho ẹmwẹ mwẹ. Wa khu mwẹ hin owa erha mwẹ rre. Vbe uwa ghi na bu mwẹ gha dee hẹ nian vbe ẹmwẹ vba uwa?”

⁸ Iran tama e Jẹfta wẹẹ, “Te ima bu ruẹ rre rhunmwuda, ma ho ne u lele ima ya gu emwa Amọn gbinna, ne u vbe viọ emwa ni hia gha die Giliad.”

⁹ E Jẹfta keghi tama iran wẹẹ, “A deghẹ wa dọlegbe rhie mwẹ gha die owa ne I do gu emwa Amọn gbinna, ighẹ e Nọyaẹnmwa na gunmwẹ khọn miotọ, te I ra rriọba yan uwa.”

¹⁰ Iran keghi wanniẹn wẹẹ, “Ma gha ru vbene u khare, e Nọyaẹnmwa ọrọre osẹe ima.”

¹¹ Ẹre Jẹfta ghi na lele avbe ọkaolotu nii gha rre Giliad, iran ke ya ẹe ru ne ọ khaemwisẹ kevbe olotu iran. E Jẹfta keghi hẹnhẹn unu emwi hia vbe Mizpa, vbe odaro e Nọyaẹnmwa.

¹² Ẹre Jẹfta na gie uhunmwu gie ọba Amọn wẹẹ, “De ẹzọ ne u gu ima gui yi? Vbọzẹ ne u na mu okuo la ẹvbo mwẹ?”

¹³ Ọba Amọn keghi wanniẹn tama emwa ne Jẹfta gie ẹre uhunmwu wẹẹ, “Rhunmwuda, ẹghẹ ne ivbi Izrẹl na gha ke Igipt dee, iran keghi mu otọe mwẹ, kevbe Ẹzẹ Anọn ya sẹ Ẹzẹ Jabọk kevbe Ẹzẹ Jọdan, banbanna nian, wa ghi hẹko ye aro ne rọkhọ mu ẹn werriegbe mẹ.”

¹⁴ E Jẹfta keghi dọlegbe gie emwa bu ọba Amọn,

¹⁵ ne iran ya wanniẹn ọre ẹmwẹ wẹẹ, “Izrẹl ma mu otọ Moab ra ọghe Amọn. Emwi ne ọ sunu ọrọre wẹ,

¹⁶ ẹghẹ ne ivbi Izrẹl na kpao vbe Igipt, iran na la ato ya sẹ Okun Iranmwiran, iran na do sẹ Kedẹs.

¹⁷ Ẹre iran na gia uhunmwu gie ọba Idọm wẹ ne ọ gie iran la otọ ẹre gberra. Sokpan ọba Idọm ma kue ye iran ẹre. Iran vbe nọ ọba Moab, rẹn ma vbe kue ye iran ẹre. Rhunmwuda ọnii, ivbi Izrẹl ke gha rre Kedẹs.

¹⁸ Ẹre iran na ye gha khian vbe uwu ato. Iran keghi bi egbe ne otọe Idọm kevbe Moab, iran keghi do sẹ odẹ ahọ ọghe Moab vbe obọ nọkpa ọghe Ẹzẹ Anọn. Iran keghi bu agọ ye evba sokpan, iran ma fian Ẹzẹ Anọn rra rhunmwuda evba ọrọre uwu Ọghe Moab.

¹⁹ Ẹre ivbi Izrẹl na gie emwa bu Saihọn, ne ọba Amọri ne ọ rre Hesbọn wẹ ne ọ gie iran la ẹvbo ẹre gberra gha rrie otọ ọghe iran.

²⁰ Sokpan e Saihọn ma gie ivbi Izrẹl ru ẹẹ. Ọ keghi si ivbi iyokuo ẹre hia koko, iran na bu agọ ye Jahaz, iran na dekun Izrẹl.

²¹ Sokpan e Nọyaẹnmwa ne Osanobua Izrẹl keghi rhie akhọnmiotọ ne iran vbe uhunmwu e Saihọn kevbe emwa rẹn hia. Ẹre Izrẹl ghi na mu otọe ni re ọghe emwa Amọri vbe ẹvbo nii.

²² Iran keghi wa mu otọe emwa Amọri hia kevbe Anọn vbe odẹ ekẹn ya sẹ Jabọk vbe odẹ okuọ kevbe ato kpao vbe odẹ ahọ ya sẹ Jọdan vbe odẹ orrie.

²³ Erriọ a na miẹn wẹ e Nọyaẹnmwa ne Osanobua Izrẹl ọ re ọ khu ivbi Amọri ladian ne emwa irẹn ighẹ Izrẹl.

²⁴ Te uwẹ ghi ho ne u mu ẹẹn werriegbe na? Wẹ sẹtin gba emwi ne Kemọs ne ẹbọ rua rhie nuẹn mwẹ obọ. Sokpan emwi hia ne Nọyaẹnmwa Osanobua mwẹ viọ ne ima nẹ, te ima ra gba mwẹ obọ.

²⁵ Wẹ yayi ighẹ uwa maa sẹẹ Balak ne ovbi Zipọ ne ọba Moab? Ọ ma si Izrẹl evẹn, ohoghe nọ ra? Ọ zẹdẹ gu ima gbinna hiehiere ra?

²⁶ Ukpo iyisẹn yan uri (300) ọ re Izrẹl kegha rre Hesbọn kevbe Aroa kevbe ẹvbo ni lẹga iran do deba ẹvbo hia ni rre eghute Ẹzẹ Anọn. Vbọzẹ ne u na ma mu ẹẹn werriegbe ke ẹghẹ nii gha dee?

²⁷ Ẹn o, I ma mwẹ emwi ne I ruẹ re. Emwi dan u ya ẹe ru ne u na mu okuo gun mwẹ. E Nọyaẹnmwa ọ re ọ ra bu ohiẹn. Ọ gha bu ohiẹn ivbi Izrẹl kevbe ivbi Amọn ẹre na.”

²⁸ Sokpan ọba ivbi Amọn ma zẹ ye uhunmwu ne Jẹfta gie gie ẹe.

²⁹ Ẹre orhiọn e Nọyaẹnmwa na hin yan Jẹfta. Ọ keghi la Giliad ya sẹ Manasẹ, ọ na vbe werriegbe gha die Mizpa, vbe Giliad. Ọ na ke evba gha rrie Amọn.

³⁰ E Jẹfta keghi yan ma e Nọyaẹnmwa wẹẹ, “U gha gun mwẹ khọn Amọn miotọ,

³¹ I gha ke okuo nii dee, ọmwaikọmwa ne ọ ka ke owa mwẹ ladian do khian vba mwẹ, I gha giẹn ọnrẹn uan ya zọ ese nuẹn.”

³² Ẹre Jẹfta na fian ẹzẹ rra ne ọ ya gu emwa Amọn gbinna. E Nọyaẹnmwa keghi rhie akhọnmiotọ nẹ ẹn.

³³ Rẹn keghi ke Aroa dunmwu iran an ya sẹ ikinkin e Minit, ehia kegha re iya ẹvbo ugie rhinrin ya sẹ Ebẹl Keramim. Obọ keghi wa da otọ ẹsẹse. Izrẹl keghi khọn miẹn emwa Amọn otọ.

Ovbi E Jẹfta Ne Okhuo

³⁴ E Jẹfta ghi dọlegbe die Mizpa ovbi ẹre ne okhuo keghi ladian, ọ na rhie ukusẹ ọ na gha ku bu ẹre dee. Ọmọ ọkpa kẹkan ne ọ mwẹ ọ re wa nọ, ẹ i ghi mwẹ ọmọ okpia ra ọmọ okhuo ọvbehe.

³⁵ Rẹn keghi bẹghe ẹre, ọ keghi ye akhiẹ yanghan ukpọn ye egbe ẹre urhu, ọ na kha wẹẹ, “Eu, ovbi mwẹ! U kpan mwẹ udu nẹ, vbe a ghi na miẹn hẹ ighẹ wẹ ọ re ọ do si obalọ vbenian yọ mwẹ egbe. I ye ekhọe hia yan ma e Nọyaẹnmwa nẹ, ẹ i mwẹ I ma mu ẹẹn sẹ.”

³⁶ Ọmọ okhuo nii keghi wanniẹn tama rẹn wẹẹ, “A deghẹ u yan ma e Nọyaẹnmwa ru mwẹ emwi ne u khare ighẹ u gha ru. E Nọyaẹnmwa rria emwa Amọn ne avbe eghian ruẹn ikhi nẹ.”

³⁷ Sokpan rẹn keghi nọ erha ẹe wẹẹ, “U ghi ru emwi ọkpa na mẹ. Sẹ mwẹ rae la uki eva, ne I viọ avbe ọse mwẹ mwẹ obọ gha zozo khian kevbe ne I ya khiẹ vbe uhunmwu oke rhunmwuda uvbi ne ọ ma he rẹn okpia ọ re I ra wu yi?”

³⁸ Rẹn keghi tama rẹn ne ọ gha khian, ọ keghi gie ẹe gha khian vbe uki eva. Ke irẹn kevbe avbe esiọre kegha rrie uhunmwu oke, iran keghi ya khiẹ rhunmwuda, uvbi ne ọ ma rẹn okpia ọre ọ ra wu yi.

³⁹ Uki eva ghi gba nẹ, rẹn keghi dọlegbe bu erha ẹe gha dee. Rẹn keghi ru vbene ọ yan ma e Nọyaẹnmwa. Ọmọ okhuo nii keghi wu ye uvbi ne ọ ma rẹn okpia. Erriọ ọ re ọ ya suẹn vbe Izrẹl ne a na miẹn wẹẹ,

⁴⁰ ukpukpo ọ re ikhuo vbe Izrẹl ya gha gbe ikpẹdẹ enẹ vbe uhunmwu oke gha khiẹ ne ovbi e Jẹfta ne ovbi Giliad.