Giọgis 1 - Edo Bible (E Baibol Ẹdo) Version 1996

Ewae Juda Kevbe Simiọn Khọn Mu Adonibẹzẹk

¹ Ugbẹn vbe Jọsua ghi wu nẹ, ivbi Izrẹl nọ e Nọyaẹnmwa wẹẹ, “De ẹwae ne ọ gha ka gha khian ne ọ ya gu ivbi Kenan gbinna vbe uwu ima?”

² E Nọyaẹnmwa keghi wanniẹn wẹẹ, “Ivbi e Juda ọ re ọ gha ka gha khian. Mẹ gha rhie otọe nii ne iran, ne iran gha khaemwisẹ yan iran.”

³ Ivbi Juda keghi tama ivbi e Simiọn wẹẹ, “Wa lele ima gha rrie otọ ne a ghae ne ima, ne ima ya gba gu ivbi e Kenan gbinna. Iyeke onii ma gha vbe lele uwa gha rrie otọe ne a ghae ne uwa.” Rhunmwuda ọnii, ẹwae ọghe Simiọn,

⁴ ke Juda ke gba gha rrie okuo. E Nọyaẹnmwa keghi gie iran khọnmiotọ vbe uhunmwu ivbi e Kenan ke Pẹriz, iran keghi khọn arhin arriaisẹn igbe (10,000) muotọ vbe Bẹzẹk.

⁵ Iran keghi miẹn Adonibẹzẹk vbe evba, iran na vbe gu ẹe gbinna. Iran keghi khọn ivbi Kenan kevbe Pẹriz muotọ.

⁶ Adonibẹzẹk keghi lẹ, sokpan iran keghi khu ẹe, iran mu ẹẹn, iran na giagia ẹre ikpinhianbọ nogie kevbe ikpinhianwẹ nogie kua.

⁷ Adonibẹzẹk keghi kha wẹẹ, “Ọba ekigbesiyenẹ ne a giagia ẹre ikpinhianbọ nogie kevbe ikpinhianwẹ nogie kua ọre ọ rhọ iku evbare re vbe ototọ eteburu mwẹ. Te Osanobua vbe ru imẹ emwi ne I ru iran ẹre.” Iran na mu ẹẹn gha rrie Jerusalẹm, odọ nii ọ re ọ ghi na wu.

Ẹwae Juda Khọn Jerusalẹm Kevbe Hibrọn

⁸ Ivbi e Juda keghi mu okuo la e Jerusalẹm, iran na khọn rẹn. Iran gbele emwa ni rrọọ, iran mu erhẹn ye ẹvbo nii.

⁹ Vbe iyeke ọnii, iran keghi mu okuo gie ivbi e Kenan ni rre ẹvbo oke kevbe ẹvbo ni vbe yerre uye ni gbe ghe otọ.

¹⁰ Iran keghi khọn mu ivbi e Kenan ni rre Hibrọn ne a te tie ẹre kirriat Aba. Iran keghi khọn ẹwae Siẹsiai, Ahiman kevbe Talmai.

Otniẹl Khọn Ẹvbo Debe

¹¹ Evba ọ re iran ne ivbi e Juda keghi khọn gha rrie ore Debe ne a te tie ẹre kirriat Sefẹ ẹghẹ nii.

¹² Ọkpa ne a tie ẹre Kelẹb vbe uwu iran keghi kha wẹẹ, “I gha rhie ovbi mwẹ ne okhuo ighẹ Aksa ne ọmwa ne ọ sẹtin khọn kirriat Sefẹ muotọ.”

¹³ Otniẹl ne ovbi Keniz ne ọtẹn Kelẹb ne okpia ne kherhe keghi khọn ẹvbo nii. Ẹre Kelẹb na rhie Aksa ne ovbi ẹre ne okhuo ne ẹẹn ne ọ rhie rọnmwẹ.

¹⁴ Vbe ẹdẹ irhiọha, Otniẹl keghi ya tua ẹre wẹ ne ọ nọ erha ẹe wẹ ne ọ mu otọe eso ne ẹẹn. Rẹn keghi rhunmwuda onii bu Kelẹb gha khian, ọ ghi tuorre vbe ekẹtẹkẹtẹ, ọ keghi nọ ẹnrẹn emwi ne ọ gualọ.

¹⁵ Ọmọ okhuo nii keghi wanniẹn wẹẹ, “Ihaoko, vbene u ghi na rhie mwẹ ye ato nẹ, mu uhae amẹ eso mẹ.” Ọ re Kelẹb na mu ovbi ẹzẹ ne ọ ke otọ kevbe ne ọ ke ukhunmwu ne ẹẹn.

Avbe Ẹvbo Ne Ẹwae Juda Kevbe Bẹnjamin Khọnrẹn

¹⁶ Ivbi orruan e Mosis, nokpia ne ivbi e Ken keghi lele ivbi e Juda ke Jẹriko ne, ẹvbo udin kpao gha rrie ẹgbo Juda vbe odẹ ekẹn Arad. Iran keghi gu emwa Amẹlẹk yin evba.

¹⁷ Ivbi e Juda keghi lele ivbi e Simiọn gha khian, iran ke koko khọnmiotọ ivbi Kenan ni rre ẹvbo ne a tie ẹre Zẹfat. Iran keghi fi ẹvbo nii unu, iran na dunmwu ẹ ruan. Iran keghi fi ẹvbo nii eni werrie ghe Họma.

^18-19 Iran ma khọn Gaza, Askẹlọn ra Ẹkrọn kevbe ẹvbo ni lẹga iran. E Nọyaẹnmwa keghi ye Juda obọ, iran ma mu avbe ẹvbo oke ya khian ọghe iran. Sokpan iran ma sẹtin khulo avbe emwa ni yin eghute kua rhunmwuda avbe emwa nii mwẹ ikẹkẹ okuo ematọn.

²⁰ A keghi mu Hibrọn ne Kelẹb zẹ vbene Mosis kha re. Ọ keghi khulo ivbi Anak eha ladian vbe evba.

²¹ Sokpan ivbi ẹwae Bẹnjamin ma khulo emwa Jebus ni rre Jerusalẹm ladian. Wa ke ẹghẹ nii gha dee, te ivbi Jebus deba ivbi e Bẹnjamin gha rre Jerusalẹm.

Ewae Ifreim Kevbe Manasẹ Khọn E Bẹtẹl

^22-23 Emwa ẹwae Ifreim kevbe Manasẹ keghi mu okuo gha rrie Bẹtẹl ne a te tie ẹre Luz. E Nọyaẹnmwa keghi yi iran obọ. Iran keghi gie avbe ọrhẹ gha rrie ẹvbo nii.

²⁴ Iran ghi miẹn okpia ọkpa ne ọ ladian, iran keghi tama ẹnrẹn wẹẹ, “Tama ima ehe ne a la la ẹvbo na, ma i ra vbe ruẹ emwi ikuan egbe rhọkpa.”

²⁵ Ọ keghi gele ma iran ẹre. Ẹre ivbi Ifreim kevbe Manasẹ na gbele emwa hia ni rre ẹvbo nii uan, sokpan amawẹ okpia na ke ẹe kevbe ẹgbẹe ọre hia.

²⁶ Ọ kegha rrie ẹvbo emwa Hiti, ọ keghi bu ẹvbo ọkpa yọ. Ọ na gha tie ẹre Luz. Erriọ ọre a ye tie ẹre na.

Emwa Ne Ivbi Izrẹl Ma Khulo Kua

²⁷ Ivbi ẹwae Manasẹ ma khulo emwa ni rre avbe Bẹt-Sian, e Tanak, e Dọ, Ibleam, e Mẹgido kevbe ẹvbo ni lẹga iran kua. Ivbi e Kenan keghi ye gha rre evba.

²⁸ Ivbi Izrẹl ghi wegbe sayọ nẹ, iran keghi ya ivbi e Kenan gha ga egbe sokpan iran ma khulo iran ladian.

²⁹ Ẹwae Ifreim ma vbe khulo ivbi e Kenan ni rre Gẹza ladian, ẹre ivbi Kenan na gu iran gha yin khian.

³⁰ Ẹwae Zẹbulọn ma khulo avbe emwa ni rre Kitron kevbe Nahalal kua. Avbe ivbi Kenan kevbe gu iran gha rrọọ. Iran na ya iran gha ru enegbe iran.

³¹ Ẹwae Asia ma khulo emwa ni rre Ako, Saidọn, Alab, Akzib, Hẹlba, Afẹk kevbe Rehọb kua.

³² Ivbi Asia keghi gu ivbi e Kenan gha rre evba vbe ne iran ma na khulo iran kua.

³³ Ẹwae Naftali ma khulo emwa ni rre Bẹt Siemẹs kevbe Batanat kua. Iran kevbe ivbi Kenan ni rre evba keghi gha rrọọ, sokpan ivbi Naftali keghi ya iran gha ru enegbe iran.

³⁴ Ivbi Amọri keghi khuakhua ẹwae Dan la uhunmwu oke, iran ma gie iran tuorre la otọe ne ọ rriẹe.

³⁵ Ivbi Amọri keghi ye gha rre Oke Hẹrẹs, Aijalọn kevbe Siabim sokpan emwa Ifreim kevbe Manasẹ kevbe gha khaemwisẹ yan iran, iran na ya iran gha ru enegbe iran.

³⁶ Ehe ne otọe Idọm lae keghi ke Ada Akrabim kpao la ghe odukhunmwu gha rrie okuo e Sẹla.