Gẹnẹsis 7 - Edo Bible (E Baibol Ẹdo) Version 1996

Uromwẹ Amẹ

¹ E Nọyaẹnmwa keghi tama Noa wẹẹ, “La uwe okọ ke uwẹ kevbe ẹgbẹe ruẹ hia. I miẹn wẹ vbe uwe avbe emwa na hia, wẹ ọkpa kẹkan ọre uyinmwẹ ọnrẹn la mwẹ aro vbọ.

² U ghi viọ ọdọ vbe amwẹ ukhukhu ihinrọn ọghe aranmwẹ ne ẹ i mwẹ awua, sokpan avbe aranmwẹ ni mwẹ awua, u ghi viọ iran ọdọ vbe amwẹ kẹkan.

³ U ghi vbe viọ ọdọ vbe amwẹ ukhukhu ihinrọn ọghe dọmwadẹ ahianmwẹ. U ghi ruẹe vberriọ ne avbe aranmwẹ ughughan, kevbe avbe ahianmwẹ ughughan ghẹ fuan ne iran miẹn ehe na dọlegbe gha biẹlẹ ye agbọn.

⁴ Vbe ẹdẹ ne ẹdẹ ihinrọn ẹre, I gha gie amẹ ye avan iyeva kevbe asọn iyeva rhọ ye agbọn, ne ọ miẹn ehe na fuẹn emwi hia ne I yi ni rre agbọn.”

⁵ Noa keghi ru emwi hia ne Osanobua tama rẹn.

⁶ Ukpo arria eha (600) ọre Noa gha ye vbe amẹ do ro ye agbọn.

⁷ Rẹn kevbe amwẹ ọnrẹn, ivbi ẹre nikpia kevbe amwẹ iran keghi la okọ ne iran miẹn ehe na miẹn uhunmwu vbe obọ uromwẹ amẹ.

⁸ Ọdọ vbe amwẹ ọghe dọmwadẹ aranmwẹ ne ẹ i mwẹ awua kevbe ne ọ mwẹ awua kevbe avbe ahianmwẹ kevbe aranmwẹ negiẹrẹ keghi

⁹ lele Noa la okọ zẹ vbene Osanobua khare.

¹⁰ Ikpẹdẹ ihinrọn ghi gberra nẹ, uromwẹ amẹ keghi rre.

¹¹ Ẹghẹ ne Noa na gha rre ukpo arria eha (600), vbe ikpẹdẹ ehairrọvbugie ọghe uki nogieva, uhunmwu ẹzẹ ọghe okun nekhua hia ni rre uwe otọ keghi vuaa, uvun ni rre iso hia keghi kie rua.

¹² Amẹ keghi ye avan iyeva kevbe asọn iyeva rhọ ye agbọn.

¹³ Vbe ẹdẹ ne ẹdẹrriọ nii, e Noa kevbe amwẹ ọnrẹn, ivbi ẹre nikpia eheha Siẹn, Ham kevbe Jafẹt kevbe amwẹ iran keghi la uwe okọ.

¹⁴ Dọmwadẹ aranmwẹ oha ughughan kevbe emwirri, aranmwẹ ni kọnkọn kevbe negiẹrẹ, kevbe ahianmwẹ ughughan hia keghi lele iran.

¹⁵ Ọdọ vbe amwẹ ọghe emwi ughughan ni rre agbọn hia keghi lele Noa la uwe okọ.

¹⁶ Zẹ vbene Osanobua khare. Ẹghẹ nii, ọre Nọyaẹnmwa na khui urho ke Noa yi.

¹⁷ Uromwẹ amẹ keghi ya ikpẹdẹ iyeva vbotọ, amẹ ni keghi do bun sẹ ne ọ gha sẹtin tọn okọ mu vbe otọ.

¹⁸ Amẹ nii kegha dinmwi yọ, okọ ghi na gha lẹ vbe uhunmwu amẹ.

¹⁹ Ọ keghi dinmwi sẹrriọ wẹ, ọ na ro gue avbe oke ne ọ ghi yo sẹ hia.

²⁰ Ọ keghi ye vbe ro akhuẹn obọ isẹnyan ugie vbe udinmwimwẹ ba egbe ne ọ ya yo sẹ uhunmwu avbe oke ni yosẹ hia.

²¹ Emwi hia ni hiọnrọn vbe agbọn keghi wulo, avbe ahianmwẹ, emwirri, avbe aranmwẹ negiẹrẹ kevbe emwa nagbọn hia.

²² Emwi hia ni ghi hiọnrọn ni rre agbọn keghi wulo.

²³ Nọyaẹnmwa keghi fuẹn emwi ni ghi hiọnrọn ni rre otọ agbọn hia a, yasẹ egbe emwa nagbọn, emwirri, aranmwẹ kevbe avbe ahianmwẹ. Noa vbe iran ni lelẹe la uwe okọ ọkpa ọre a ghi sẹrae ne a ma fuan an.

²⁴ Ikpẹdẹ igbe yan ikiọkhọe (150) ọre amẹ ya gha ro yọ vbe otọ agbọn.