Gẹnẹsis 5 - Edo Bible (E Baibol Ẹdo) Version 1996

Uniẹn Adam

¹ Eni uniẹn Adam ọre ena khin. (Ẹghẹ ne Osanobua na yi emwa nagbọn, ọ keghi yi iran zẹ vbe ama egbe irẹn.

² Ọ keghi yi iran okpia kevbe okhuo. Rẹn keghi fiangbe iran, ọ keghi tie iran “Emwa.”)

³ Ugbẹn vbe Adam ghi rre ukpo igbe yan iyehan (130), Ọ keghi biẹ ọmọ okpia ọkpa ne ọ ye vbe irẹn, ọ keghi he ẹre Sẹt.

⁴ Vbe iyeke ọnii Adam gbe ukpo arria enẹ (800) vbe agbọn, ọ keghi biẹlẹ emọ ọvbehe.

⁵ Ọ keghi wu vbe ọmọ ukpo igbe yan iyehan yan arriaenẹ (930).

⁶ Ugbẹn vbe Sẹt ghi rre ọmọ ukpo isẹn-yan iyisẹn (105), ọ keghi biẹ ọmọ okpia ọkpa ne a tie ẹre Inọsi.

⁷ Ọ keghi yevbe ya ukpo ihinrọn yan iyienẹ (87) vbe agbọn ọ keghi biẹlẹ emọ ọvbehe,

⁸ ọ keghi wu vbe ọ rre ukpo iweva yan iyisẹn yan arriaenẹ (912).

⁹ Inọsi ghi rre ukpo ekigbe siyisẹn (90), ọ keghi biẹ ọmọ okpia ne a tie ẹre Kenan.

¹⁰ Vbe iyeke ọnii, ọ ke yevbe ya ukpo ekesugie yan arriaenẹ (815). Ọ keghi yevbe biẹlẹ emọ ọvbehe.

¹¹ Ọ keghi wu vbe ọ rre ukpo isẹn yan iyisẹn yan arriaenẹ (905).

¹² Ugbẹn vbe Kenan ghi rre ukpo ekigbesiyenẹ (70), ọ keghi biẹ ọmọ okpia ọkpa ne a tie ẹre Mahalalẹ.

¹³ Ọ na yevbe gbe ukpo iyeva yan arriaenẹ (840). Ọ keghi yevbe biẹlẹ emọ ọvbehe.

¹⁴ Ọ keghi wu vbe ọ rre ukpo igbe yan iyisẹn yan arriaenẹ (910).

¹⁵ Mahalalẹ ghi rre ukpo isẹn yan iyeha (65), ọ keghi biẹ ọmọ okpia ọkpa ne a tie ẹre Jarẹd,

¹⁶ ọ na yevbe gbe ukpo ọgban yan arriaenẹ (830). Ọ yevbe biẹlẹ emọ ọvbehe.

¹⁷ Ọ keghi wu vbe ọ rre ukpo isẹn yan ekigbe siyisẹn yan arriaenẹ (895).

¹⁸ Ugbẹn vbe Jarẹd ghi rre ukpo eva yan iyerẹnrẹn (162), ọ keghi biẹ ọmọ okpia ọkpa ne a tie ẹre Inọk,

¹⁹ ọ keghi yevbe gbe ukpo arriaenẹ (800), ọ yevbe biẹlẹ emọ ọvbehe,

²⁰ ọ keghi wu vbe ọ rre ukpo eva yan iyerẹnrẹn yan arriaenẹ (962).

²¹ Inọk ghi rre ukpo isẹn yan iyeha (65), ọ keghi biẹ ọmọ okpia ọkpa ne a tie ẹre Mẹtusẹla.

²² Inọk keghi ye gu Osanobua gha yin vbe ukpo iyisẹn yan uri (300), ọ na yevbe biẹlẹ emọ ọvbehe

²³ ọ te do sẹ ukpo iyisẹn yan ọgban irrọ vbe uri eva (365).

²⁴ Ẹdagbọn rẹn hia ọre ọ wa ya gu Osanobua yin, ọ keghi ru gbẹnnẹ rhunmwuda Osanobua rhie ẹre kpao.

²⁵ E Mẹtusẹla ghi rre ukpo iwera-irrọ-vburi (187), ọ keghi biẹ ọmọ okpia ọkpa ne a tie ẹre Lamẹk,

²⁶ ọ ke ye vbe gbe ukpo evairrọvbugie irrọ vbe arriaenẹ (782), ọ keghi biẹlẹ,

²⁷ ọ keghi wu vbe ọ rre ukpo ihinrin yan iyerẹnrẹn yan arriaenẹ (969).

²⁸ Lamẹk ghi rre ukpo eva yan iyihinrin (182), ọ keghi biẹ ọmọ okpia ọkpa,

²⁹ ọ na kha wẹẹ, “Ọmọ na gha do fan mwa vbe obọ ẹsọn vbe otọe nii ne Nọyaẹnmwa ye amunu na.” Ọ keghi he ẹre Noa,

³⁰ E Lamẹk keghi ye vbe gbe ukpo isẹn irrọ vbe uri eha (595), ọ ye vbe biẹlẹ emọ ọvbehe,

³¹ ọ keghi wu vbe ọ rre ukpo eha yan ugie irrọ vbe iyerẹnrẹn (777).

³² Ugbẹn vbe Noa ghi rre ukpo iyisẹn yan uri eva (500), ọ keghi biẹlẹ emọ eha Siẹm Ham kevbe Jafẹt.