Gẹnẹsis 49 - Edo Bible (E Baibol Ẹdo) Version 1996

Ẹmwẹ Okiekie Ọghe Jekọb

¹ E Jekọb keghi tie avbe ivbi ẹre, ọ tama iran wẹẹ, “Wa do si koko ye emwa ne I tama uwa emwi ne ọ gha sunu vbe egbe uwa vbe ẹghẹ nọdee:

² “Wa si koko ne uwa danmwehọ ivbi e Jekọb. Wa danmwehọ Izrẹl ne erha uwa.

³ “E Riubẹn ovbi mwẹ nọdiọn, wẹ ọrọre ẹtin mwẹ, ke ọmọ okaro ne I biẹe zẹ vbe ẹghele, ne ọ zọmọ sẹẹ, kevbe ne ọ wegbe sẹẹ vbe uwu avbe ivbi mwẹ nikpia.

⁴ Te u yevbe ogbigbi amẹ ne ọ hẹ yo hẹ rre, sokpan wẹ i ra gha re ne ọ hiunkhuan sẹẹ, rhunmwuda u gu amwẹ erha ru emwi awua. U ru ukpo orọnmwẹ mwẹ awua, u keghi muẹn hin.

⁵ Etẹn ọre Simiọn kevbe Livai khin. Iran ye abẹkpẹn iran zẹ uza.

⁶ Mẹ i ra mwẹ obọ vbe uma ẹkhokho iran mẹ i ra yo iko ne iran ko rhunmwuda, iran gbele emwa vbe ohu mu iran, iran keghi kun avbe ẹkhuia ẹmila use ya gha gbogiẹ.

⁷ I hẹn nọ ne ohu ne ọ mu iran rhunmwuda ọ wegbe gbe, ke vbene okuosu iran, rhunmwuda ọ kan gbe. I gha zagha iran la otọ e Jekọb hia I gha duẹ iran an ye uwu ivbi Izrẹl.

⁸ E Juda, avbe etuẹn gha tian ruẹn. We gba avbe eghian ruẹn ẹho mwẹ, avbe etuẹn gha ghughẹrre nuẹn.

⁹ Te Juda yevbe oduma, ọ gha gbe emwi nẹ, ọ ghi dọlegbe la irhu. Ọ gha niẹn egbua, ọ ghi lovbiẹ a i miẹn ne ohan giẹe rrẹrrọe.

¹⁰ E Juda gha mu ọkpọ ọba mwẹ uniẹn ọnrẹn ọ ra gha rriọba khian. Avbe okpẹvbo gha ya imuohan giẹẹ iran ghi ye a họn ẹmwẹ gbe uhunmwu kotọ nẹẹn.

¹¹ Ọ ghi de ovbi ekẹtẹkẹtẹ mu ovbi alimo. Ye erhan alimo ne ọ maa sẹẹ vbọ. Ọ ghi ye ayọn họ ukpọn rẹn vbe uwu ayọn ne ọ baa vbe esagiẹn.

¹² Aro ẹre viẹn uan kpaan ne ayọn akọn rẹn fuọfua ne ọ ya wọn ewẹn ẹmila

¹³ Ọkpẹn okun ọre Zẹbulọn ra yin. Avbe emwiokọ gha yakọ vbe eghute ẹre otọe ẹre gha niẹn sẹ Saidọn, Isaka ma maa sẹẹ ekẹtẹkẹtẹ

¹⁴ Ẹkhuia nọ wegbe ọ re Isaka khin. Sokpan ọ lovbiẹ lọlọọlọ ye ẹkpo emwi ne ẹsin ẹnrẹn ya kun ihẹ.

¹⁵ Ọ ghi miẹn vbe ehe ne ọ na kẹtin maa hẹ, ke vbe ne otọe nii mose hẹ, ọ keghi vbẹrre ne ọ mu ihẹ, ọ na khian ọviẹn nọ miẹn ẹsọn.

¹⁶ Enogie ọre Dan ra gha khin ne emwa rẹn te irẹn ra vbe gha ye vbe ẹvbo nekpa vbe Izrẹl.

¹⁷ E te Dan ra gha ye vbe ẹyẹn ne ọ rre ọkpẹn odẹ, ẹyẹn ne ọ mwẹ obi vbe ọkpẹn ovbi odẹ, ne ọ sa ẹsin vbe ighinghian owẹ, nọhin ẹnrẹn ghi khian ne a fi la odieke fua.

¹⁸ I diakhẹ ẹghẹ imiẹnfan ruẹn Osanobua.

¹⁹ Otu izigan gha gu Gad gbinna, sokpan rẹn gha dekun iran, ọ ghi zẹ iran khu.

²⁰ Otọe Asia gha mọ ọmọ esiesi ladian, ọ gha mọ emwiokọ ne ọ ke ye evbare ọba.

²¹ Ẹrhuẹ ne ọ fe fua ọre Naftali khin, ne ọ ye egbe gunnọ ọmwa ẹsẹse.

²² Ekẹtẹkẹtẹ oha ọre Josẹf khin, ekẹtẹkẹtẹ oha ne ọ rre ọkpẹn ẹzẹ, ivbi e ekẹtẹkẹtẹ ni rre ọkpẹn oke.

²³ Avbe eghian rẹn lelẹe vbọ ọghe edan iran ye uhanbọ kevbe ifẹnmwẹ iran khuẹe

²⁴ sokpan uhanbọ irẹn ma bẹghe, a ya ekuabọ iran wegbe vbekpa ẹtin ọghe Osanobua Noghodua ọghe Jekọb, vbe obọ Osanobua nii, ọmwa ne ọ degue Izrẹl.

²⁵ Osanobua erhaa ọrọre ọmwa ne ọ yuẹ obọ, Osanobua Noghodua, ọrọre ọmwa ne ọ fiangbuẹ. Afiangbe ọghe amẹ ke odukhunmwu rre kevbe ọghe avbe odin amẹ kevbe uwu otọ gha dee, afiangbe ọghe ẹmila nibun kevbe emọ.

²⁶ A fiangbe ọghe ọka kevbe obobo afiangbe ọghe avbe oke nẹdẹdẹ emwi ose ọghe avbe oke etẹbitẹghori te ehia gha mudia vbe uhunmwu e Josẹf ye uharo ọmwa ne a zẹ ọre ughaẹn, vbe ẹbu avbe etiọnrẹn nikpia.

²⁷ Oduma ne ọ gbe emwi ọre Bẹnjamin khin, ota vbe owiẹ ọ re ọ ya gbe emwi re.”

²⁸ Enena ọrọre ẹwae iweva ni rre Izrẹl, ena ọ vbe re ẹmwẹ ne erha iran tama iran. Vbe ehe ne ọ na ya ẹmwẹ ne ọrhiẹnrhiẹn gbe ọ khian ẹdẹ hia ne iran.

Uwu Kevbe Uremwẹ Josẹf

²⁹ Ẹre Jekọb na yi iyi ne iran wẹẹ, “Te I ghi ra ya deba avbe emwa mwẹ ni wu nẹ nian, wa ghi ya re mwẹ ba avbe erha mwẹ vbe uvun okuta ne ọ rre ako oha Efrọn ne ọmwa Hiti.

³⁰ Vbe Makpẹla, ne olarre ovẹn Mamrẹ, vbe otọ Kenan. Ebraham ọre ọ gu Efrọn ne ọmwa Hiti de uvun okuta na kevbe otọe na ne a gha re emwa yọ.

³¹ Evba nii i ọ re iran re Ebraham kevbe Sera ne amwẹ ọnrẹn yi, evba iran re Aizik kevbe Ribẹka ne amwẹ ọnrẹn yi, evba nii ọre I vbe re Lia yi.

³² Emwa Hiti ọre a gu dẹ uvun okuta nii kevbe otọe nii.”

³³ E Jekọb ghi ru igiodẹ ma ivbi ẹre nẹ, ọ keghi ya iyeke ho otọ, ọ na zẹ ukpọn obọ.