Gẹnẹsis 48 - Edo Bible (E Baibol Ẹdo) Version 1996

E Jekọb Fiangbe Ifreim Kevbe Manasẹ

¹ Ọ ghi kpẹe fua kherhe, a keghi do tama e Josẹf wẹẹ, “Egbe ma rran erha a.” Rẹn keghi viọ ivbi ẹre eveva Manasẹ kevbe Ifreim, ọ na ya miẹn e Jekọb.

² Iran tama e Jekọb wẹẹ e Josẹf ne ovbuẹ do miẹn ọn. Ọ keghi si orhiọn koko, ọ na kpaegbe tota ye ukpo.

³ E Jekọb keghi tama e Josẹf wẹẹ, “Osanobua Noghodua rhie egbe ma mwẹ vbe Luz, vbe otọe Kenan, ọ keghi fiangbe mwẹ.

⁴ Ọ keghi tama mwẹ wẹẹ, ‘I viọ emọ nibun nuẹn sẹrriọ wẹ ivbuẹ gha khian okpẹvbo nibun, I gha mu otọe na ne uniẹn ivbuẹ ne ọ gha re ọghe iran ẹdẹdẹmwẹdẹ.’

⁵ E Josẹf, emọ ikpia eva ne iran biẹlẹ nuẹn vbe Igipt na vbe I te rre, ọghomwẹ iran vbe khin. Zẹ vbene Riubẹn kevbe Simiọn re ọghomwẹ, erriọ zẹ ọre Ifreim kevbe Manasẹ gha vbe re ọghomwẹ.

⁶ Sokpan avbe emọ ne a ghi biẹlẹ nuẹn vbe iyeke ọnii, ẹ i re mẹ ọ yan iran, te a ra ku iran gbe ba etẹn iran Ifreim kevbe Manasẹ, ne ukhu sẹtin la evba sẹ iran obọ.

⁷ Emwi ne ọ ya mwẹ ru ọna ọrọre, ẹmwẹ Rekiẹl ne iyuẹ, ẹghẹ vbe I ke Mẹsopotamia dee, ọ keghi da mwẹ ẹsẹse wẹ, rẹn keghi wu vbe otọe Kenan, vbe a ma he sẹ Efrat. I na re ẹnrẹn ye evba vbe otọe Efrat (Efrat ọrọre Bẹtlẹhẹm).”

⁸ Ugbẹn vbe Izrẹl ghi bẹghe ivbi e Josẹf, ọ keghi nọ wẹẹ, “De ibiẹka ne ena khin yi?”

⁹ E Josẹf wanniẹn wẹẹ, “Ivbi mwẹ nikpia ne Osanobua viọ mẹ vbe Igipt mwana ọre nọ.” E Jekọb keghi kha wẹẹ, “Lahọ viọ iran gunmwẹ ne I miẹn ehe na fiangbe iran.”

¹⁰ Te aro Izrẹl ghi ghe vbirrivbirri rhunmwuda ne ọ na khian ọmaẹn, ẹ i ghi bẹghe ẹse. E Josẹf keghi viọ emọ ni bu ẹre rre, rẹn keghi gba iran ginna egbe, ọ na ye unu soso iran unu.

¹¹ E Jekọb keghi tama e Josẹf wẹẹ, “Mẹ ma te kha ighẹ I gha ye miẹn uwẹ aro ọvbehe, sokpan, wanwanna nian, te Osanobua ghi vbe gunmwẹ bẹghe ivbuẹ.”

¹² Ẹre Josẹf na tọn iran mu hin ekuawẹ e Jekọb rre, ọ na mu ẹko rhu otọ vbe odaro ẹre.

¹³ E Josẹf keghi viọ iran obọ, Ifreim vbe obọ erha ọmwa irẹn, vbene ọ gha na gha rre obọ iye ọmwa Izrẹl kevbe Manasẹ vbe obọ iye ọmwa irẹn, vbene ọ gha na gha rre obọ erha ọmwa Izrẹl, ọ na viọ iran bu ẹre gha dee.

¹⁴ Sokpan Izrẹl keghi gbe obọ ẹre akinnọ, ọ na rhie obọ erha ọmwa rẹn yan Ifreim uhunmwu, rẹn ne ọ re ọvbokhan kevbe obọ iye ọmwa rẹn yan Manasẹ uhunmwu, rẹn zẹ ọ re ọdiọn.

¹⁵ Ọ keghi fiangbe iran. “Te Osanobua gha fiangbe emọ na! Osanobua ne Ebraham kevbe Aizik ne erhamwẹ gae! Te Osanobua ne ọ su mwẹ sẹ ẹdẹnẹrẹ na, gha fiangbe iran!

¹⁶ Te Odibosa ne ọ fanmwẹ hin uwu ẹbe hia rre gha fiangbe iran! Te eni mwẹ deba eni avbe Ebraham kevbe Aizik ne erhamwẹ gha rrọọ khian vbekpa emọ na! Te iran gha biẹlẹ emọ nibun ne iran do khian ọrhẹnrhẹn.”

¹⁷ Ẹko ma rhiẹnrhiẹn e Josẹf vbe ọ miẹn wẹ erha ẹe rhie obọ erha ọmwa yan Ifreim, rẹn keghi rhie ẹre obọ hin uhunmwu Ifreim rre ne ọ rhie ẹre ye uhunmwu e Manasẹ.

¹⁸ Ọ keghi tama erha ẹe wẹẹ, “Ẹ i re erriọ Evbavba, ọna ọrọre ọdiọn, rhie obọ erha ọmwa ruẹn yan ẹnrẹn uhunmwu.”

¹⁹ Erha ẹe keghi he, ọ wẹẹ, “I rẹnrẹn ovbi mwẹ, I rẹnrẹn ivbi uniẹn Manasẹ gha vbe khian okpẹvbo, sokpan ọtiọnrẹn nekherhe gha kpọlọ sẹ ọre, ivbi uniẹn ọnrẹn gha vbe khian ẹvbo ni kpọlọ.”

²⁰ Rhunmwuda ọnii, ọ keghi fiangbe iran ẹdẹ nẹdẹrriọ ọ wẹẹ, “Ivbi Izrẹl gha ya eni uwa gha na erhunmwu, iran gha kha wẹẹ, ‘Te Osanobua gha gie uwa gha yevbe Ifreim kevbe Manasẹ.’ ” Erriọ ọre ọ na rhie Ifreim kodaro ne Manasẹ.

²¹ E Jekọb keghi tama e Josẹf wẹẹ, “Ghe, ẹghẹ uwu mwẹ sikẹ otọ fo. Sokpan Osanobua gha yaba ruẹ, ọ ghi vbe dọlegbe rhie ruẹ gha die otọe avbe erha a odede.

²² Wẹ ọ re I rhie Siẹkẹm na ighẹ ẹ i re avbe etuẹn, otọe esiesi nii ne I ya umozo mwẹ kevbe uhanbọ mwẹ miẹn iran re ighẹ emwa Amọri.”