Gẹnẹsis 40 - Edo Bible (E Baibol Ẹdo) Version 1996

E Josẹf Rhan otọ Imina Avbe Oleghan

¹ Ọ ghi kpẹe kherhe, odibo ne ọ siẹnro ayọn kevbe ọkaolotu iran ni le ebrẹd ne ọba Igipt keghi fidọn ghe arowa iran.

² Ohu ọruemwi ẹnrẹn eva na keghi mu e Fero,

³ Ọ na rhunmwuda ọnii hẹ iran ku ẹwẹdọ ne ọ rre uwu owa ọkaolotu avbe abodẹ, vbe ehe ọkpa ni ne a mu e Josẹf khui yi.

⁴ Ọkaolotu avbe abodẹ keghi rhie Josẹf ba iran ne ọ gha ruẹmwi ne iran. Iran keghi kpẹẹ vbe uwu eghan ẹsẹse.

⁵ Ẹdẹ ọkpa ghi rre, ke ne ọsiẹnro ayọn kevbe olotu avbe iran ni le ebrẹd ọghe ọba Igipt ke mina. Dọmwadẹ ọghọe keghi mina imina ọghọe ne ovbe mwẹ emwi ne a yae kha.

⁶ Ugbẹn vbe Josẹf ghi sẹ ehe ne iran ye vbe owiẹwiẹmwọkpa, ọ keghi miẹn wẹ aro iran i ma vbe uhunmwu.

⁷ Ọ keghi nọ iran wẹẹ, “Vbe uwa miẹn ẹre na yi?”

⁸ Iran keghi wanniẹn wẹẹ, “Ma eveva ọre ọ wa mina, ma ma miẹn ọmwa ne ọ gha rhan otọ iran ma ima.” E Josẹf keghi wanniẹn wẹẹ, “Osanobua ọ re ọ rhie ẹtin ne a ya rhan imina ne ọmwa, wa tama mwẹ vbene uwa mina hẹ.”

⁹ Ẹre ne ọ siẹnro ayọn na ta imina rẹn, “I ghi rre imina, erhan alimo ayọn kegha rre odaro mwẹ,

¹⁰ ọ kegha mwẹ abọ eha, ọ ghi suẹn gha zẹ ebe, ọ keghi wa mọ, alimo ni keghi gha vbo.

¹¹ Mẹ keghi mu ukpu e Fero mwẹ obọ, ọ re I na viọ alimo nii, I na gha minọ ẹn ye ukpu mu nẹẹn.”

¹² E Josẹf keghi kha wẹẹ, “Emwi ne a yae kha ọre ọ na khin: abọ eha nii, ikpẹdẹ eha nọ.

¹³ Vbe irakhuẹ, e Fero gha tie ruẹ, ọ ghi ya bọọ, ọ ghi dọlegbe rhie ruẹ ye ukpo ne u ka ye ẹghẹ ne u na gha re ne ọ siẹnro evbare.

¹⁴ Sokpan emwi hia gha ma nuẹn nẹ, u ghi ye mwẹ rre o, u ghi vbe ru ọmwa esi sẹrriọ ne u te ẹmwẹ mwẹ ma e Fero, ne a mu mwẹ hin uwu eghan na rre.

¹⁵ Ne I guẹ rẹn nian wẹ te a do mwẹ mu vbe ẹvbo emwa Hibru, kevbe emwa na vbe Igipt I ma ru emwi rhọkpa ne a rhunmwuda ẹre mu mwẹ fi eghan na.”

¹⁶ Ugbẹn vbe ọkaolotu iran ni le ebrẹd ghi miẹn wẹ vbene a rhan otọ imina nii maa, ọ tama e Josẹf wẹẹ, “Mẹ vbe mina imina. Okhuae ebrẹd eha na gha rrọ mwẹ uhunmwu.

¹⁷ Vbe ne ọ ke odukhunmwu vbọ, evbare ughughan ne a ranmwẹ ne Fero kegha rrọọ sokpan avbe ahianmwẹ kegha rriọe.”

¹⁸ E Josẹf keghi wanniẹn wẹẹ, “Emwi ne a yae kha ọ re ọ na khin: okhuae eha nii, ikpẹdẹ eha nọ.

¹⁹ Vbe irakhuẹ e Fero gha tie ruẹ, ọ ghi fian an uhunmwu fua! Ọ ghi si ikun ruẹn rrọ ye uhunmwu erhan, avbe ahianmwẹ ghi gha rri efun egbe ruẹ.”

²⁰ Vbe ikpẹdẹ ne ogieha ne ọ re ẹdẹ ayere ubiẹmwẹ Fero, ọ keghi le evbare ne avbe ọruemwi ẹnrẹn hia, ọ keghi tie ne ọsiẹnro ayọn rẹn kevbe ọkaolotu iran ni le ebrẹd ye odaro avbe ọruemwi ẹnrẹn.

²¹ Ọ keghi rhie ukpo nọ siẹnro ayọn rẹn dọlegbe nẹẹn,

²² sokpan ọ keghi si ọkaolotu e ni le ebrẹd rrọ. Ọ na kegha re emwi ne Josẹf wẹ a ya imina iran kha zẹẹ.

²³ Sokpan nọ siẹnro ayọn ma ghi mu ẹmwẹ Josẹf roro, ọ keghi mianmianẹn.