Gẹnẹsis 4 - Edo Bible (E Baibol Ẹdo) Version 1996

E Keni Kevbe Ebẹl

¹ Adam keghi tie amwẹ ọnrẹn ovbe, ọ na gha hanmwa. Rẹn keghi biẹ ọmọ okpia, ọ ke kha wẹẹ, “Mẹ mwẹ ọmọ okpia vbekpa iyobọ Nọyaẹnmwa.” Rẹn keghi rhunmwuda ọnii he ẹre Keni.

² Vbe iyeke ọnii, ọ keghi biẹ ọmọ okpia ọvbehe ọna ọre Ebẹl. Ebẹl ke do gha re Ọsuohuan, sokpan Keni kegha re ọwẹe.

³ Iyekọnii, Keni keghi viọ emwiokọ eso rre do ya zọ ese ghe Nọyaẹnmwa.

⁴ Iyekọnii, Ebẹl ke mu oteghe ohuan aranmwẹ ne emwi irri ẹre ka gha biẹ rre, ọ ke gbẹe, ọ ke ya ehe ne ọ maa sẹ vbọ zọ ese. Ẹko ke rhiẹnrhiẹn Nọyaẹnmwa ghe Ebẹl ke ese ne ọ zọ re.

⁵ Sokpan ọ ma rhan obọ miẹn Keni ke ese ẹre. Okuosu ke rrie Keni, aro ẹre ke khọrhiọ uan vbe uhunmwu ne ohu.

⁶ Ẹre Nọyaẹnmwa na khama Keni wẹẹ, “Vbọzẹ ne ohu na muẹn yi? Ne aro ruẹ na khọrhiọ uan vbe uhunmwu?

⁷ Akpawẹ te u ru ẹse, te u ghẹ gha mumu ogiẹ nian. Sokpan, vbe ne u ghi na ru emwi dan nẹ nian, orukhọ ye vbe aranmwẹ ne ọ si rhuẹ khẹ ruẹ ne ọ gua a rhie vbe onurho. Ọ ho ne ọ gha kha yan ruẹn sokpan ọ kere ne obọ ruẹ ke odukhunmwu nẹẹn.”

⁸ Ẹre Keni na khama Ebẹl ne ọtiọnrẹn nokpia wẹẹ, “Gie ima khian ladian ghe oha.” Ugbẹn vbe iran ghi sẹ uwe oha, Keni ke ye emwi yan ọtiọnrẹn nokpia, ọ na gbẹe rua.

⁹ Nọyaẹnmwa ke nọ e Keni wẹẹ, “Ọtuẹn nokpia ighẹ Ebẹl vbo?” Rẹn ke wanniẹn wẹẹ, “I ma rẹn. Mẹ ọre a wẹ ne ọ gha gbearoghe ọtẹn mwẹ ra?”

¹⁰ E Nọyaẹnmwa ke kha wẹẹ, “Vbọzẹ ne u na ru emwi ne ọ muohan na yi? Esagiẹn ọtuẹn wa tu ma mwẹ ke uwe otọ gha dee zẹ vbe urhu ne ọ ho ne a rria ikhi.

¹¹ A ye amẹ unu nuẹn nẹ, u i ghi ra ye gha kọ emwi ye otọ. Ọ rhie esagiẹn ọtuẹn wọn nẹ, zẹ vbe ne a miẹn wẹ te ọ rhan unu ẹnrẹn ya miẹn ruẹn re vbe obọ ruẹ vbe u gbẹe rua.

¹² U gha mu ugbo, u na kọ emwi yọ, otọe, ẹi gha ma ẹnrẹn. Ehevbehevbe ke enọkpolugho ọre u gha khian vbe agbọn.”

¹³ E Keni keghi tama Nọyaẹnmwa wẹẹ, “Oya ne u rriọ mwẹ re na wegbe gbe ne egbe mwẹ gha sẹtin rrọọ.

¹⁴ Te u ghi khu mwẹ hin otọ na rre na, kevbe hin odaro ruẹ rre. I ghi khian ehevbehevbe ke enọkpolugho vbe agbọn, ọmwa ne ọ rhirhi miẹn mwẹ ghi gbe mwẹ uan.”

¹⁵ Sokpan Nọyaẹnmwa ke wanniẹn ọre ẹmwẹ wẹẹ, “Ẹ i re erriọ. Ọmwaikọmwa ne ọ rhirhi gbe uẹ ua, uhunmwu arhin ihinrọn ọre a ra ya rria ẹre ikhi ẹre.” Nọyaẹnmwa ke rhunmwuda ọnii yi e Keni ama ne ọmwa ne ọ rhirhi miọẹn ghẹ gbẹe rua.

¹⁶ E Keni keghi kpao vbe ehe ne Nọyaẹnmwa ye rre, ọ ke ya di otọe ne a tie eni ẹnrẹn “Enọkpolugho” ya vbe asefẹn ahọ ọghe Idẹni.

Uniẹn e Keni

¹⁷ E Keni kevbe amwẹ ọnrẹn keghi biẹ ọmokpia ọkpa, iran na he ẹre Inọk. E Keni keghi bu ẹvbo ọkpa, ọna gha tie ẹre Inọk zẹ vbe eni ovbi ẹre.

¹⁸ Inọk kevbe biẹ ọmokpia ọkpa ne a vbe he ẹre Irad ne ọre erha Mehujael, ne ọ gha re erha Metusial ne erha Lamẹk.

¹⁹ E Lamẹk ke viọ ikhuo eva, a kegha tie ọkpa Ada ke ne ọkpa Zila.

²⁰ Ada keghi biẹ Jubal ne erha odede ọghe iran ni hẹ emwirri khian ke ni vbe gbe agọ dia.

²¹ A kegha tie eni ọtiọnrẹn Jubal ne ọre erha odede ọghe avbe iran ne ikpezikẹn hia ni kpe akpata ke ẹrere.

²² Ẹre Zila na biẹ ne a tie ẹre Tubalken ne ọre erha odede ọghe avbe igunẹrọnmwọ hia ni ye oze ke ematọn dunmwu emwi. Ọtiẹn Tubalken nokhuo kegha re Naama.

²³ E Lamẹk ke tama avbe amwẹ ọnrẹn wẹẹ, “Ada ke Zila, wa danmwehọ mwẹ, I gbe igbama ọkpa ua rhunmwuda ighẹ ọ fi mwẹ emwi,

²⁴ A deghẹ uhunmwu arhin ihinrọn ọre a ya ha osa vbe ọmwaikọmwa gha gbe Keni uan uhunmwu arhin ehairrọvbiyenẹ ọre a gha ya ha osa adeghẹ ọmwaikọmwa gbe mwẹ uan.”

Uniẹn e Sẹt

²⁵ Adam kevbe amwẹ ọnrẹn keghi dọlegbe biẹ ọmọ okpia ọkpa, okhuo nii keghi kha wẹẹ, “Osanobua vbe rhie ọmọ okpia ọvbehe yọ mwẹ ihe Ebẹl ne Keni gbe ua.” Rẹn keghi he ẹre Sẹt.

²⁶ Sẹt keghi biẹ ọmọ okpia ọkpa ne ọ he ẹre Ẹnọs. Ẹghẹ nii ọre emwa ke gha so eni Nọyaẹnmwa, iran ghi vbe gha gae.