Gẹnẹsis 39 - Edo Bible (E Baibol Ẹdo) Version 1996

E Josẹf Kevbe Amwẹ Pọtifa

¹ Avbe ivbi Ismẹl keghi mu e Josẹf gha rrie Igipt. E Pọtifa, ne ọ vbe re ọruemwi ọghe Fero zẹ vbe ọkaolotu iran ni khẹ odẹ vbe ẹguae, keghi gu emwa Ismẹl ni muẹn gha die Igipt dọe.

² E Nọyaẹnmwa keghi mudia ne Josẹf, ọ na ye emwi hia gha maa nẹẹn. Rẹn kegha rre owa arowa ẹre ne ọmwa Igipt nii.

³ Arowa ẹre keghi miẹn wẹ e Nọyaẹnmwa mudia ne Josẹf kevbe wẹ Nọyaẹnmwa gie emwi ne ọ ru hia gha dinna odẹ.

⁴ Ẹmwẹ Josẹf keghi wa gha yẹ Pọtifa kẹe kevbe vbene ọ ya winna nẹẹn hẹẹ. Rẹn keghi rhunmwuda ọnii mu owa ẹre kevbe emwi ne ọ mwẹ hia nẹẹn gha gbearoghe.

⁵ Ke ẹghẹ ni kpao Osanobua keghi fiangbe igiowa Pọtifa ne ọmwa Igipt rhunmwuda e Josẹf. Nọyaẹnmwa keghi fiangbẹe vbe owa kevbe odẹ.

⁶ E Pọtifa keghi viọ emwi ne ọ mwẹ ne Josẹf ne ọ gha gbearoghe. Ẹ i ghi vbe si osi ye emwi rhọkpa gberra evbare ne ọ re. E Josẹf keghi re ọmọ ne ọ zọ ẹse ne ọ vbe mose.

⁷ Ọ ma ghi he kpẹe, amwẹ arowa Josẹf kegha ye aro ta ọta vbe egbe ẹre. Okhuo nii keghi tama rẹn wẹẹ, “Do gunmwẹ lovbiẹ.”

⁸ Rẹn keghi he, ọ tama okhuo nii wẹẹ, “Arowa mwẹ i ghi vbe si osi ye emwikemwi ni rre owa na, rhunmwuda ighẹ I rre emwa. Ọ viọ emwi hia mẹ nẹ ne I gha gbearoghe.

⁹ Vbene irẹn mwẹ asẹ vbe owa na, erriọ mẹ vbe mwẹ, ọ ma he we mwẹ khian sẹ evba vbe egbe emwikemwi vbe ọ ghi gberra uwẹ ne amwẹ ọnrẹn. Vbia ghẹ ghi gu ru emwi dan vberriọ hẹ ne I ya fidọn ghe Osanobua?”

¹⁰ A gha rhe miẹn wẹ ẹdẹgbegbe ọre ọ ya tae ma e Josẹf, ọ ma zẹ yẹ ọre re ne ọ guẹe ru emwi.

¹¹ Sokpan, ọ ghi sẹ ẹdẹ ọkpa, ugbẹn vbe Josẹf ghi la uwu owa ne ọ ya winna iwinna rẹn, eguọmwadia rhọkpa ma vbe sikẹ evba,

¹² Okhuo nii keghi sobọ ye ọre ukpọn, ọ wẹẹ, “Gun mwẹ ru emwi.” Sokpan rẹn keghi sinmwi egbe ladian ore, vbe ne ọ na sẹ ẹwu ẹre rae ne okhuo nii.

¹³ Ugbẹn vbe okhuo nii ghi miẹn ighẹ ọ lẹ fi ore,

¹⁴ Ọ keghi tie ikpia ni rre owa ẹre wẹẹ, “Wa ghe o! Ọdafẹn mwẹ ọ re ọ mu ovbi e Hibru na ye owa, eban nian mẹ ọre ọ ghi yagha. Ọ bu mwẹ la ughugha ọ na wẹ ne I gie irẹn gun mwẹ ru emwi, ọ re I na rhie so zẹ vbe ne ẹho mwẹ sẹe.

¹⁵ Ugbẹn vbe ọ ghi miẹn wẹ I rhie so, ọ keghi sẹ ẹwu ẹre rae yọ mwẹ evba, ọ lẹ fua, ọ keghi lẹ ladian.”

¹⁶ Okhuo nii keghi da ukpọn nii yi rhinrin arowa ẹre e Josẹf te do sẹ owa.

¹⁷ Ọ ke vbe ta okha na ma rẹn wẹẹ, “U ma miẹn ọviẹn ne ovbi e Hihru ne u mu bu ima gha dee nii, ọ bu mwẹ la owa do gha yagha mwẹ.

¹⁸ Sokpan ugbẹn vbe i ghi rhie so, ọ keghi sẹ ukpọn rẹn rae ke mwẹ vbe evba.”

¹⁹ Ohu na mu arowa e Josẹf ẹsẹse.

²⁰ Ọ na wẹ ne a mu e Josẹf, ne a muẹn ye ehe ne a viọ avbe oleghan ọba yi, ọ na gha rre evba.

²¹ Sokpan e Nọyaẹnmwa keghi mudia ne Josẹf, ọ na vbe tohan rẹn sẹrriọ ne a na miẹn wẹ ẹmwẹ ọnrẹn kegha yẹ eseghan.

²² Ọ keghi mu e Josẹf ye ne ọ gbearoghe avbe oleghan nekpa hia. Rẹn ọ re ọ ghi gha re ne ọ ta emwi ne a gha ru vbe uwu eghan.

²³ Te eseghan ghi gha fi aroa vbe avbe emwi ne Josẹf gbearoghe, rhunmwuda Nọyaẹnmwa mudia ne Josẹf, ọ na giẹe gha miẹn arudinodẹ vbe emwi ne ọ ru hia.