Gẹnẹsis 38 - Edo Bible (E Baibol Ẹdo) Version 1996

E Juda kevbe Tama

¹ Ẹghẹ nii, e Juda keghi kpao sẹ avbe etiọnrẹn rae, ọ ke ya tota ke Hira ne ovbi ẹvbo ne a tie ẹre Adulam.

² E Juda keghi miẹn ọmọ okhuo ovbi Kenan ọkpa ne a tie erha ẹe Siua. Ọ keghi rhie ẹre rọnmwẹ.

³ Ọ keghi hanmwa, ọ keghi biẹ ọmọ okpia ọkpa, rẹn keghi he ẹre Eri.

⁴ Ọ kevbe dọlegbe hanmwa, ọ kevbe biẹ ọmọ okpia ọvbehe, ọ kevbe he ẹre Onan.

⁵ Ọ kevbe dọlegbe biẹ ọmọ okpia ọvbehe ọ na he ẹre Siẹla. Akzih ọre Juda gha ye vbe ẹghẹ ne okhuo na na biẹ Siẹla.

⁶ E Juda keghi rhie okhuo ne Eri ne ovbi ẹre nọdiọn, a kegha tie eni okhuo ni Tama.

⁷ Emwi dan ne Eri ru keghi sọnnọ Nọyaẹnmwa, ọre Nọyaẹnmwa na gbe ẹe rua.

⁸ Rhunmwuda ọnii, e Juda keghi tama ọtẹn Eri ighẹ Onan wẹẹ, “Ya gu amwẹ ne ọtuẹn wu sẹrae ruemwi. Ru e nọ khẹkuẹ vbọ, zẹ vbe ọtẹn ọdọ, ne ọtuẹn sẹtin gha mwẹ ivbi urho.”

⁹ Sokpan Onan rẹnrẹn wẹ ẹ i re irẹn ọre ọ ra yan emọ nii; rhunmwuda ọnii, ẹghẹ hia ne ọ ya miẹn amwẹ ọtiọnrẹn, ọ ghi mu eku ẹre ku otọ, ne ọtiọnrẹn ghẹ miẹn ehe na gha mwẹ urho.

¹⁰ Emwi ne ọ ru keghi sọnnọ Nọyaẹnmwa, E Nọyaẹnmwa na vbe gbe ẹe rua.

¹¹ Ẹre Juda ghi na khama Tama ne amwẹ ovbi ẹre wẹẹ, “Werriegbe gha rrie owa erha zẹ vbe okhuo ne ọ dẹgbẹ, e Siẹla ne ovbi mwẹ te wanrre.” Emwi ne ọ yae kha vberriọ ọrọre wẹ afianma fian ẹn wẹ a gha vbe gbe Siẹla rua zẹ vbene a gbele etiọnrẹn nikpia, ẹre Tama na werriegbe gha rrie owa erhae.

¹² Vbe ọ ma ghi kpẹe, amwẹ Juda keghi wu. Ugbẹn vbe Juda ghi khiẹ ọre fo nẹ, rẹn vbe ọsiọre ighẹ Hira ne ọmwa Adulam kegha rrie Timna vbe ehe ne a na gbe avbe ohuan ẹnrẹn eto.

¹³ Emwa eso keghi tama Tama wẹẹ, “Erha ọdafọn rrie ọghe Timna ne ọ ya gbẹn ohuan rẹn eto.”

¹⁴ Ẹre ọ na fi ukpọn ẹgbẹe ne ọ te yọ werriẹ, ọ keghi ye ukhiọnfọ gue aro, ọ na tota ye onurho Enaim ne ẹvbo ne a la gberra ye Timna. Rẹn rẹnrẹn wẹ Siẹla ne ovbi Juda ne okiekie wan nẹ ẹghẹ na, sokpan a ma ye rhie irẹn gie ẹe rhie rọnmwẹ.

¹⁵ Ugbẹn vbe Juda ghi miẹn ọẹn, rẹn ke te gha ro ighẹ ebabotu nọ, rhunmwuda ne ọ na rhie ugbaleto gue aro.

¹⁶ Rẹn keghi bu ẹre gha rrie ọkpẹn odẹ, ọ tama rẹn wẹẹ, “Larre, inu igho u miẹn ọmwa re yi?” (Ọ ma rẹn wẹ amwẹ ovbi ẹre nọ.) Rẹn ke nọ rẹn wẹẹ, “Vbu a ra rhie mẹ?”

¹⁷ Rẹn keghi wanniẹn wẹẹ, “I gha mu ovbi ẹwe ke uwu oghẹn ẹwe mwẹ gue.” Okhuo nii keghi wanniẹn wẹẹ, “Ọ ma vberriọ a deghẹ u gha rhie emwi mẹ dayi u te mu nene ẹwe rre.”

¹⁸ Rẹn keghi nọ rẹn wẹẹ, “De emwi ne I gha rhie nuẹn dayi yi?” Okhuo nii wanniẹn wẹẹ, “Ẹgba iyama ruẹn kevbe okun ne a de ẹre yi, kevbe ọkpọ ne u rhie mwẹ.” Rẹn keghi viọ iran ne okhuo nii. Iran keghi miẹn egbe, okhuo nii na gha hanmwa.

¹⁹ E Tama keghi guakpao, ọ na gha rrie. Ọ keghi ban ukpọn ne ọ mu gue aro hin, ọ keghi dọlegbe viọ ukpọn ẹgbẹe ye egbe.

²⁰ E Juda keghi gie ọsiọre ke Adulam gha khian ne ọ ya miẹn emwi ne okhuo nii dayi viọ rre, sokpan ọ ma miẹn nene okhuo.

²¹ Ọ keghi nọ ikpia ni rre evba, “Ebabotu ne ọ rre ọkpẹn odẹ vbe Enaim vbo?” Iran wanniẹn tama rẹn wẹẹ, “Ebabotu ma he gha rre mwa ẹdẹ.”

²² Rẹn keghi dọlegbe bu e Juda gha dee, ọ wẹẹ, “I ma miẹn okhuo nii, ikpia ni rre evba khare ighẹ ebabotu ma he di evba ya ẹdẹ.”

²³ E Juda wanniẹn wẹẹ, “Gie ẹe da avbe emwi na yi, agbọn gha ta ima giẹ. I te mu ovbi ẹwe na giẹe nẹ wẹ ọ re ọ ma miọẹn.”

²⁴ Ọ ghi rre uki eha, emwa eso keghi do khama e Juda wẹẹ, “Tama ne amwẹ ovbuẹ miẹn okpia, ọ wa hanmwa nian.” E Juda keghi kha wẹẹ, “Wa siẹe ladian ore ne uwa ya giẹn ọnrẹn uan ne ọ wu.”

²⁵ Ugbẹn vbe a ghi siẹe ladian, ọ ke gie ne a khama erha ọdọ ẹre wẹẹ: “Ọmwa ne ọ yan avbe emwi na ọ re ọ na mwẹ ẹko. Ghe ẹre nu u miẹn ehe na rẹn ọmwa ne ọ yan ẹgba iyama na kevbe okun ne a de ẹnrẹn yi, ke ọkpọ na.”

²⁶ E Juda keghi ye iran rre, ọ na wẹẹ, “Ẹmwata ọre ọ tae, mẹ ọre ọ ba emwi ku ru. Te ọ te kei ne I rhie ẹre ne Siẹla ne ovbi mwẹ ne ọ rọnmwẹ ọẹn.” Ọ ma ghi dọlegbe guẹe ru emwi ọvbehe.

²⁷ Ẹghẹ ghi sẹ ne ọ gha ya biẹ, a keghi miẹn wẹ ivin eva nọ.

²⁸ Ugbẹn vbe emwi ubiẹmwẹ ghi ruẹe, ọkpa vbe uwu iran keghi si obọkpa ladian, okhuo ne ọ mu ẹre emwi ubiẹmwẹ keghi dae yi, ọ na de oru ne ọ baa muẹn, ọ na kha wẹ, “Ọna ọ re ọdiọn.”

²⁹ Sokpan ọ keghi si obọ werriegbe, a na ghi ka biẹ ọtiọnrẹn. Ẹre okhuo ne ọ mu ẹnrẹn emwi ubiẹmwẹ na kha wẹẹ, “Erriọ u ghi ya ye uhunmwu zẹ odẹ ladian!” A na ghi gha tie ẹnrẹn Pẹrẹs.

³⁰ A na ghi do biẹ ọtiọnrẹn, kẹe kevbe oru ne ọ baa nii vbe obọ ẹre. A keghi he ẹre Zẹra.