Gẹnẹsis 34 - Edo Bible (E Baibol Ẹdo) Version 1996

Iran Mu E Dina Yagha

¹ E Dina ne ọmọ okhuo e Jekọb kevbe Lia keghi ya khian ẹlẹ tuẹ ikhuo e Kenan eso vbe ẹvbo nii ẹdẹ ọkpa.

² Ugbẹn vbe Siẹkẹm ne ovbi Hamọ ne ọmwa Hivi, ne ọre enogie otọe nii ghi bẹghe ẹre, ọ na siẹe ọ na ya ẹtin guẹ ẹe ru emwi ọdọ vbe amwẹ.

³ Sokpan ẹmwẹ ọmọ okhuo na keghi yẹ ọre, rhunmwuda ose ẹre, ọ keghi suẹn gha ho ne ọ wa rhie ẹre rọnmwẹ.

⁴ Ọ keghi ya nọ erha irẹn wẹẹ, “Rhie ọmọ na mẹ rhie rọnmwẹ.”

⁵ E Jekọb keghi họn wẹ iran yagha ovbi ẹre ne okhuo, sokpan, rhunmwuda ighẹ ivbiẹre rre uwu oha vbe ehe ne iran na gbearoghe ẹmila ẹre, ọ ma ru emwi rhọkpa iran te rre.

⁶ E Hamọ ne erha Siẹkẹm keghi ladian ya gu e Jekọb guan,

⁷ vbe uwu ẹghẹ ne ivbiẹre na ke uwu oha rre zẹẹ. Ugbẹn vbe iran họn ẹmwẹ na, udu iran si vbọ, ohu ke mu iran ẹsẹse wẹ Siẹkẹm ru emwi ohan vberriọ, ọ na fi unu gie ivbi Izrẹl hia vbekpa ne ọ na ya ẹtin gu ovbi e Jekọb ru emwi.

⁸ Hamọ, keghi khama iran wẹẹ, “E Siẹkẹm ne ovbi mwẹ ho ne ọ rhie ovbuẹ nokhuo rọnmwẹ; lahọ, wa giẹe rọnmwẹ ọẹn.

⁹ Wa gie ima viọ obọ gie egbe vbekpa orọnmwẹ, ma ghi viọ ivbi uwa rọnmwẹ, wa ghi vbe gha viọ ọghe ima rọnmwẹ.

¹⁰ Wa sẹtin gu ima yin ẹvbo ima na. Wa sẹtin di ehe ne ọ khọn ruẹn vbọ ya, wa ghi do ẹki vbene a i na mwẹ idobo, wa ghi vbe họọn emwi obọ uwa.”

¹¹ Ẹre Siẹkẹm na tama erha Dina kevbe etiọnrẹn wẹẹ, “Wa ghi ru ẹse na mẹ, emwi ne uwa a rhirhi nọ mwẹ re, I gha rhie ne uwa.

¹² Wa tama mwẹ emwi ne I gha rhie ne uwa, wa vbe fian inu igho ne ọ khọn uwa mẹ ne I gha mu ye egbe ẹre, I gha rhie emwi ne uwa a rhirhi gha ho ne uwa sokpan ne uwa gunmwẹ rhie ẹre rọnmwẹ.”

¹³ Ivbi e Jekọb keghi rhie ewanniẹn ne ọ gha gbe iran ekhọe ẹwaẹn rua ne Siẹkẹm kevbe Hamọ ne erha ẹe rhunmwuda te Siẹkẹm fa Dina ne ọtẹn iran an.

¹⁴ Iran keghi kha wẹẹ, “Ma i kue ne ọtẹn ima rọnmwẹ ọmwa nọ ma rhuẹ, efaa ọnii ra gha khin ima re.

¹⁵ Emwi ọkpa ne ọ gha ye ima kue yọ ọrọre ne uwa do gha ye vbene ima ye vbekpa ne uwa gha na gha rhuẹ ikpia uwa hia.

¹⁶ Ẹghẹ nii, ma gha kue ne uwa rhie ivbi ima, ma ghi vbe gha rhie ọghe uwa. Ma ghi yin ehe ne uwa ye, ma hia ghi do gba gha re ọkpa.

¹⁷ Sokpan, deghẹ wa ma rhie ne ima tae, ne uwa rhuẹ, ma gha rhie ẹre ne ima kpao.”

¹⁸ Vbene iran tae na ke wa la Hamọ ke Siẹkẹm ne ovbi ẹre aro.

¹⁹ Ọvbokhan na ma vbe yae rhọ eghẹrẹ, ọ keghi wa gha ru vbene iran khare rhunmwuda ẹmwẹ ovbi e Jekọb nokhuo la ẹre aro. Okpia na ọre ọ vbe re ne ọ ru ọmwa kpataki sẹ vbe ẹgbẹe ọre.

²⁰ E Hamọ kevbe Siẹkẹm ne ovbi ẹre kegha rrie ehe ne a na do iko vbe ehe ne a la la ẹvbo nii iran keghi ya gu emwa ẹvbo nii ne iho iran guan wẹẹ,

²¹ “Emwa ni mwẹ ahoẹmwọmwa emwa na khin; gie iran gu ima yin ẹvbo na, ne iran vbe gha khian yo ehe ne ọkhọn iran; otọ na kpọlọ sẹ ne ọ gha vbe gua iran. Wa gie ima gha viọ ivbi iran nikhuo rọnmwẹ ne ima vbe gha viọ ọghe ima ne iran rọnmwẹ.

²² Sokpan emwi ne ọ gha ya iran yin ẹvbo ima ne ima gha re ọkpa ọrọre wẹ ne ima gha rhuẹ emọ ikpia ima zẹ vbene iran vbe rhuẹ.

²³ Emwirri iran, emwiewe iran kevbe ẹmila iran ghi do gha re ọghọmwa. Rhunmwuda ọnii, wa gie ima kue yọ ne iran gu ima yin ẹvbo.”

²⁴ Emwa ẹvbo ni hia keghi rhie iro ne Hamọ kevbe Siẹkẹm zẹẹ. Iran keghi rhuẹ ikpia ni rrọọ hia,

²⁵ ọ ghi rre ikpẹdẹ eha, vbene arhuẹ iran ma na he rrie, ivbi e Jekọb eva, e Simiọn kevbe Livai, etẹn Dina nikpia, na hẹ umozo iran, iran keghi la ore ẹvbo nii vbe ne ọmwaikọmwa i na vbe mu idandan, iran keghi gbele ikpia ni rrọọ hia a.

²⁶ Iran keghi gbele Hamọ kevbe Siẹkẹm ne ovbi ẹre, iran na rhie Dina hin owa Siẹkẹm rre, iran na kpao.

²⁷ Ivbie Jekọh nekpa na deyan iran ne a kuanrẹn nii, iran keghi viọ emwi hia ni mwẹ emwi ne ọ gia ya ru vbe ẹvbo nii, rhunmwuda wẹ, a fa ọtẹn iran an.

²⁸ Iran keghi viọ avbe ohuan, ẹmila, ekẹtẹkẹtẹ kevbe emwi ọvbehe hia ni rre owa kevbe odẹ.

²⁹ Iran keghi viọ ẹfe ni rrọọ hia. Iran na munọ ikhuo kevbe ibiẹka, iran na viọ emwi hia ni rre iran owa gha rrie.

³⁰ E Jekọb keghi khama Simiọn vbe Livai wẹẹ, “Wa si mwẹ fi uwu ẹmwẹ nẹ, banbanna nian, emwa ẹvbo na hia, emwa Kenan, Pẹriz, iran hia khọ ẹko mwẹ. Ikpia ne I mwẹ i bun; iran gha ku obọ gbe mu igbinna gunmwẹ, ke imẹ kevbe ẹgbẹe mwẹ hia, te iran ra miẹn ima uhunmwu.”

³¹ Sokpan iran wanniẹn wẹẹ, “Ma i ra kue ne a ru ọtẹn ima emwi oya.”