Gẹnẹsis 33 - Edo Bible (E Baibol Ẹdo) Version 1996

E Jekọb Do Vba Isọ

¹ E Jekọb keghi bẹghe vbe Isọ dee kẹe kevbe arhin uri eva (400) ni lelẹe. Ọ keghi rhunmwuda ọnii gha ivbiẹre ne Lia, Rekiẹl kevbe egbakhian rẹn eva.

² Ọ keghi viọ iran kevbe ivbi iran ke odaro, Lia kevbe ivbi ẹre keghi lele iran, Rekiẹl kevbe Josẹf keghi ke odieke.

³ E Jekọb keghi ke odaro ne iran hia, ọ na mu ẹko rhuotọ igba ihinrọn vbe ọ te do sẹ ehe ne ọtiọnrẹn ye.

⁴ Sokpan Isọ keghi ya rhulẹ vba ẹre, ọ keghi viọ obọ kinnọ ẹre urhu, ọ siẹe kẹ egbe ọ na ye unu soso ẹre unu. Iran e eva kegha viẹ.

⁵ Isọ ghi ghe lẹga vbe ọ ghi miẹn avbe ikhuo kevbe emọ nii, ọ keghi nọ wẹẹ, “Gha ena khin ne u hẹ khian na?” Jekọb wanniẹn wẹẹ, “Emọ ne ọ yẹ Osanobua ne ọ ya ru mwẹ ẹse nọ, enọwanrẹn.”

⁶ Avbe egbakhian keghi rre, ke iran kevbe ivbi iran, iran kevbe mu ẹko rhuotọ.

⁷ Lia kevbe ivbi ẹre keghi rre, vbe okiekie ehia, Josẹf kevbe Rekiẹl keghi rre, iran na vbe mu ẹko rhuotọ.

⁸ Isọ keghi nọ rẹn wẹẹ, “Otu ne I ka vbe miẹn vbe odọ, de ne eni vbe khin vbọ, vba a yae kha?” E Jekọb wanniẹn wẹẹ, “Te I wẹ ne I yae gualọ aro ne ọ maa ọ wuẹ.”

⁹ Sokpan Isọ wanniẹn wẹẹ, “Ne imẹ mwẹ sẹe mẹ ọtẹn mwẹ, viọ ọwuẹ hin rre.”

¹⁰ E Jekọb keghi kha wẹẹ, “Ẹ i re erriọ, a deghẹ I miẹn aro nọmaa ọwuẹ, rhan obọ miẹn emwi ne I ya haoko guẹ. Ne I na bẹghe aro ruẹ na, ọ yevbe ne I bẹghe aro Osanobua vbe ẹghẹ na ne u na ye obọ ọse mu mwẹ.

¹¹ Lahọ, miẹn mwẹ emwi ne i ya guẹ na, Osanobua wa tohan mwẹ, ọ na viọ emwi ne I ho hia mẹ.” E Jekọb keghi kakabọ ye arhẹrhẹ gbagbae ye ọre egbe, ọ te do rhanbọ miẹn iran.

¹² Isọ keghi kha wẹẹ, “Gia mu egbe na a kpao. I gha ke odaro ne uwa.”

¹³ E Jekọb keghi wanniẹn wẹẹ, “Ẹn, u rẹnrẹn ighẹ avbe ibiẹka ma wegbe, ke avbe ohuan, ẹmila kevbe ivbi iran negiẹrẹ rre evba. A gha tua iran okhian gbe ehia gha wulo fo.

¹⁴ Lahọ u ghi hẹko gha khian khẹ ima ne I hẹko gha leluẹ dee, I gha tua owẹ ye okhian, zẹ vbene avbe ẹmila kevbe emọ negiẹrẹ gha sẹtin, ma te do vba ruẹ vbe Sẹa.”

¹⁵ Isọ keghi kha wẹẹ, “I ghi sẹ emwa mwẹ eso rae nuẹn khekherriọ.” Sokpan e Jekọb wanniẹn wẹẹ, “U ru ẹse gbe, sokpan, ghẹ gbokhuo, aro ne ọ maa ruẹn ọkpa ọre I gualọ.”

¹⁶ Ẹre Isọ ghi na suẹn okhian werriegbe gha rrie Sẹa ẹdẹnẹdẹrriọ.

¹⁷ Sokpan e Jekọb kegha rrie Sukọt ehe ne ọ na ya bọlọ owa ne egbe ẹre kevbe irhu ne avbe emwirri ẹre. Ọnii ọ siẹe ne a na tie evba nii Sukọt.

¹⁸ E Jekọb keghi sẹ Siẹkẹm vbe otọ Kenan hẹnnẹdẹn vbe ọ ghi dọlegbe ke Mẹsopotamia rre. Ọ keghi bu agọ ẹre ye uwu oha vbe odaro ẹvbo nii.

¹⁹ Igho esiliva iyisẹn ọre ọ ya gu ivbi uniẹn Hamọ ne erha Siẹkẹm dẹ asẹ otọ nii.

²⁰ Ọ keghi gbe aka ye evba, ọ keghi he ẹre eni El gie Osanobua Izrẹl.