Gẹnẹsis 32 - Edo Bible (E Baibol Ẹdo) Version 1996

E Jekọb Muegbe Ne Ọ Miẹn Isọ Aro

¹ Ugbẹn vbe Jekọb ghi khian vbe odẹ, avbe odibo Osanobua keghi do vba ẹre.

² Ugbẹn vbe ọ ghi bẹghe iran, ọ wẹẹ, “Agọ Osanobua ọna khin”; ọ kegha tie evba nii Mahanem.

³ E Jekọb keghi gie emwa ke odaro bu Isọ ne ọtiọnrẹn vbe Idọm.

⁴ Ọna tama iran ne iran kha vbenian: “Mẹ ne Jekọb, ne ọguọmwadia ruẹ ne ọ họn ẹmwẹ nuẹn do khama Isọ ne arowa mwẹ wẹẹ, ọghe Leban ọre I gha ye kevbe wẹẹ I ma ho ne I gha dee ọ te do sẹ ẹghẹ na.

⁵ I mwẹ ẹmila, ekẹtẹkẹtẹ, ohuan, ẹwe, kevbe eviẹn. Te I gie uhunmwu guẹ enọwanrẹn ne I ya gualọ aro ne ọ maa vbe obọ ruẹ.”

⁶ Ugbẹn vbe iran ne a gie ẹre uhunmwu ghi rre, iran wẹẹ, “Ma sẹ ehe ne Isọ ne ọtuẹn ye, rẹn sẹ odẹ nẹ nian ne ọ na bu ruẹ dee. Ọ viọ arhin uri eva ba egbe.”

⁷ Ohan keghi mu e Jekọb ẹsẹse, iro na han rẹn. Ọ keghi wa emwa ni guẹe, ohuan, kevbe ẹwe kevbe ekẹtẹkẹtẹ ye ihe eva.

⁸ “A deghẹ Isọ ghi rre do gu otu n okaro gbinna, ọkpa sẹtin lẹ fe.”

⁹ Ẹre Jekọb na na erhunmwu wẹẹ, “Osanobua Ebraham ne erhamwẹ odede kevbe ọghe Aizik ne erhamwẹ, u ghi danmwehọ mwẹ, wẹ ọ re ọ tama mwẹ Nọyaẹnmwa wẹẹ, ‘Ne I werriegbe gha rrie ẹvbo mwẹ ne I vbe bu avbe etẹn mwẹ, wẹẹ u gha ruẹe ne emwi hia gha ma mẹ.’

¹⁰ Mẹ ma sẹ ne a gha mwẹ itohan kevbe ẹmwẹ ọmwa yẹ ọmwa ne uwẹ mwẹ ghe mwẹ ghe, mẹ ne ọguọmwadia ruẹ. Vbe I fian Jọdan rra, mẹ mwẹ ọkpa kẹkan nọ, banbanna nian, mẹ vbe otu eva na ghi nọ.

¹¹ Lahọ, miẹn mwẹ fan vbe obọ ẹtin Isọ ne ọtẹn mwẹ. Afianma fian mwẹ we te ọ dee ra do gun mwẹ gbinna ne ọ wa fuẹn ima-an kevbe ikhuo kevbe emọ negiẹrẹ.

¹² Yerre vbene u yan hẹ wẹẹ, ‘I gha gie emwi hia gha ma nuẹn, I gha vbe viọ ivbi uniẹn ruẹn nuẹn, a i ra sẹtin ka iran. Iran gha bun vbe ekhae ni rre ọkpẹn okun.’ ”

^13-14 Ọ ghi gbe asọn nii nẹ vbe evba, ọ keghi viọ avbe emwi na gie Isọ ne ọtiọnrẹn vbe uwu emwi ne ọ mwẹ. Ẹwe amwẹ uri (200) deba ovbukhọ ugie, ohuan uri (200) deba ogho ugie.

¹⁵ Ekẹtẹkẹtẹ ọgban ne a minọ ẹnrẹn ewẹn iran kevbe ivbi iran, ẹmila iyeva ẹkhuia igbe, ẹsin amwẹ ugie kevbe ọwẹ igbe.

¹⁶ Ọ keghi viọ oghẹn ọkpọkpa ne eguọmwadia ẹre, ọ tama iran wẹẹ, “Wa ke odaro ni ima, wa ghi gha fian ẹkpo ye adesẹneva oghẹn ọkpa kevbe nọkpa ne ọ lelẹe.”

¹⁷ Ọ keghi tama ọguọmwadia ne ọ ke odaro wẹẹ, “Isọ ne ọtẹn mwẹ gha vba ruẹ ọ na kha wẹẹ, ‘Gha ọre arowa ruẹ? Vbua rrie? Gha ọ yan emwirri ne u hẹ khian na?’

¹⁸ U ghi kha wẹẹ, ‘Ọghe Jekọb ne ọguọmwadia ruẹ nọ. Te ọ viọ iran gie Isọ ne arowa mwẹ zẹ vbe emwi ihaoko. Jekọb tobọ ẹre wa lele ima iyeke dee nian.’ ”

¹⁹ Ọ na vbe tama nogieva, nogieha kevbe iran hia ni lele nene oghẹn ohuan khian. “Enian wa gha tama Isọ vbe uwa gha miẹn ọẹn.

²⁰ Wa ghi kha wẹẹ, ‘Ẹmwata nọ, e Jekọb ne ọguọmwadia ruẹ wa lele ima iyeke dee.’ ” E Jekọb keghi rorẹe wẹẹ, “I gha ya avbe emwi ihaoko ne I viọ ke odaro na fu ẹre ẹko rre. I gha ghi do vba ẹre, u gha ghe, ọ gha yabọ mwẹ.”

²¹ Emwi ihaoko nii keghi ke odaro ne irẹn. Ọ keghi ye gbe asọn nii vbe agọ.

E Jekọb Vẹn Vbe Peniẹl

²² Vbe asọn ọkpa nii, e Jekọb keghi kpaegbe, ọ viọ amwẹ ọnrẹn eveva, avbe egbakhian eva ne ọ mwẹ, kevbe ivbiẹre owọrọ, ọ keghi fian ẹzẹ Jabọk gberra vbe ehe ne a na wa ẹre.

²³ Ọ ghi viọ iran gberra nẹ, ọ kevbe viọ emwi ne ọ mwẹ hia gberra.

²⁴ Ọ keghi kẹ irẹn ọkpa vbe odieke. Orhiọnkpa keghi do guẹe vẹn ẹdẹ te do gbe.

²⁵ Okpia nii ghi miẹn we obọ ẹre ra gba irẹn, ọ keghi gbe emwi ye Jekọb ugboloko ẹkun, ẹkun ẹnrẹn keghi lahin akhuẹn rre vbe ne iran na vẹn nii.

²⁶ Okpia nii keghi kha wẹẹ, “Sẹmwẹ rae I ghe te ẹdẹ ghi ra gbe.” Sokpan Jekọb wanniẹn wẹẹ, “I i suẹ rae vbe ẹ i re te u fiangbe mwẹ nẹ.”

²⁷ Ọmwa nii nọ rẹn wẹẹ, “Vba a tie eni ruẹn?” Rẹn wanniẹn wẹẹ, “E Jekọb.”

²⁸ Okpia nii keghi kha wẹẹ, “A i ghi ra tie eni ruẹn Jekọb ọvbehe. U gu Osanobua kevbe emwa nagbọn suan nẹ, obọ ruẹ keghi ke okhunmwu, rhunmwuda ọnii eni ruẹn ọ re ọ ghi gha re Izrẹl.”

²⁹ E Jekọb keghi kha wẹẹ, “Lahọ ta eni ruẹn ma mwẹ.” Sokpan rẹn wanniẹn wẹẹ, “Vbọzẹ ne u na nọ eni mwẹ?” Ẹre ọ ghi na fiangbe Jekọb.

³⁰ E Jekọb keghi kha wẹẹ, “I miẹn Osanobua vbe ghe aro mwẹ ghe aro ruẹ, I keghi ye rre agbọn.” Ẹre ọ na ghi gha tie eni evba nii Peniẹl.

³¹ Ovẹn keghi yan rre vba e Jekọb vbe ọ wa kpao vbe Peniẹl rre, ọ na ghi gha sukpẹ owẹ rhunmwuda ẹkun ẹnrẹn.

³² Ọnii ọ siẹe ne a na miẹn wẹ uhin do sẹ ẹdẹnẹrẹ na, uniẹn ivbi Izrẹl i rri inian ne ọ rre ugboloko ẹkun rhunmwuda inian ni ọre a na fi e Jekọb emwi.