Gẹnẹsis 27 - Edo Bible (E Baibol Ẹdo) Version 1996

Aizik Fiangbe Jekọb

¹ Aizik ghi khian ọmaẹn nẹ, ẹi ghi dẹghe. Ọ keghi gie ne a tie Isọ ovbi ẹre nokpia nọdiọn, ọ keghi tama rẹn wẹẹ, “Ovbi mwẹ!” Rẹn keghi wanniẹn wẹẹ, “Ghe mwẹ.”

² Aizik keghi khama rẹn wẹẹ, “U miẹn nian wẹẹ I khian ọmaẹn nẹ. I sẹtin wu vbe ọ ma he kpẹe ban,

³ banbanna na nian, viọ emwi ohuẹ ruẹ, uhanbọ kevbe ifẹnmwẹ gha rrie uwu oha ne u ya gbe aranmwẹ gunmwẹ.

⁴ U ghi le evbare ne ọ rhiẹnrhiẹn, egbe ne ọ yẹ mwẹ ne u mu gun mwẹ. I ghi rriọe, ẹkpo nii I ghi rhie afiangbe mwẹ ne okiekie nuẹn vbe I te wu.”

⁵ Ẹghẹ ne Aizik na gha gu Isọ ne ovbi ẹre guan, e Ribẹka kegha danmwehọ. Isọ ghi kpao gha rrie oha nẹ ne ọ ya gbe aranmwẹ gie erha ẹe.

⁶ E Ribẹka keghi tama Jekọb wẹẹ, “I họẹn vbe erha a tama Isọ wẹẹ,

⁷ ‘Mu emiowo gun mwẹ ne u le evbare mẹ. I ghi rriọe, ne I fiangbuẹ vbe sirra Nọyaẹnmwa vbe I te wu.’

⁸ Banbanna na nian ovbi mwẹ, u ghi họn ẹmwẹ mẹ ne u ru vbe ne I khare.

⁹ Gha rrie uwu oghẹn emwirri ne u ya hannọ ivbi ẹwe nọ tii eva viọ gunmwẹ. I ghi lẹe egbe evbare ne ọ rhiẹnrhiẹn erha a.

¹⁰ U ghi mu gie erha a ne ọ rriọe ne ọ fiangbuẹ vbene ọ te wu.”

¹¹ Sokpan Jekọb keghi tama iyẹe wẹẹ, “U rẹnrẹn ighẹ ọmwa ne ọ zọ eto vbe egbe ọre Isọ khin, vbene egbe mwẹ na rriẹ kpẹghẹ.

¹² U gha ghe erha mwẹ ghi ye obọ kan mwẹ, ọ ghi do rẹn ighẹ te I ra hiẹ irẹn mu ru, ẹghẹ ni, ihẹn ighi ra rhie gie egbe mwẹ ye ihe afiangbe.”

¹³ Iye ẹe keghi wanniẹn wẹẹ, “Ihẹn ne a rhirhi tie nuẹn, ovbi mwẹ, uhunmwu mwẹ ọ gha ye, ya ru vbene I tama ruẹn gha khian, ya viọ nene ẹwe gunmwẹ.”

¹⁴ Ẹre ọ na gele gha khian ya munọ ẹn viọ giẹe. Ọ keghi le evbare ne ọ yẹ erha ẹe.

¹⁵ Ẹre ọ na viọ ukpọn ni maa sẹ vbe ọghe Isọ, ne ọ viọ ye owa, ọ na viọ iran yọ e Jekọb.

¹⁶ Ọ keghi viọ ohian ẹwe ye ẹre obọ ke ehe ne eto i ye vbe ẹyaẹn rẹn.

¹⁷ Ọ keghi mu evbare ne ọ rhiẹnrhiẹn nii kevbe ebrẹd ne ọ le naẹn.

¹⁸ E Jekọb keghi bu erha ẹe, ọ wẹẹ, “Evbavba!” Rẹn wanniẹn wẹẹ, “Ghe mwẹ. De ne ọ khin vbe uwu ivbi mwẹ yi?”

¹⁹ E Jekọb keghi wanniẹn wẹẹ, “Mẹ Isọ ne ovbuẹ nọdiọn nọ. I ru vbene u tama mwẹ nẹ. Lahọ kpaegbe tota ne u re vbe emiowo ne I mu guẹ ne u miẹn ehe na fiangbe mwẹ.”

²⁰ Aizik keghi kha wẹẹ, “Ovbi mwẹ, vbe u na rherhe miẹn ọẹn vberriọ yi?” E Jekọb wanniẹn wẹẹ, “E Nọyaẹnmwa Osanobua ruẹ ọre ọ gunmwẹ rherhe miẹn ọẹn.”

²¹ Aizik keghi tama Jekọb wẹẹ, “Lahọ sikẹ mwẹ ne I ye obọ kan ruẹn. Wẹ ọ gele re Isọ?”

²² E Jekọb keghi sikẹ erha ẹe, ọ keghi ya obọ ghe ẹre egbe, ọ na kha wẹẹ, “Urhu ruẹ ye vbe urhu Jekọb, sokpan obọ ruẹ yevbe ọghe Isọ.”

²³ Ọ ma sẹtin rẹn Jekọb.

²⁴ Sokpan ọ keghi nọọn rẹn wẹẹ, “Wẹ ọ gele re Isọ!” Rẹn keghi wanniẹn wẹẹ, “Mẹ nọ.”

²⁵ Aizik keghi kha wẹẹ, “Rhie gun mwẹ vbe emiowo ruẹ ne I rriọe ne I rhie afiangbe nuẹn.” E Jekọb keghi rhie ẹre giẹẹ, ọ kevbe mu ayọn giẹe da.

²⁶ Erha ẹe keghi tama rẹn wẹẹ, “Sikẹ mwẹ ovbi mwẹ ne u do ya unu soso mwẹ unu.”

²⁷ Ugbẹn vbe ọ ghi sikẹ ọre ne ọ do ya unu soso ẹre unu, Aizik keghi winhin ukpọn rẹn, ọ keghi fiangbẹe wẹẹ, “Uwinhinmwẹ ovbi mwẹ na yevbe ọghe otọe ne Nọyaẹnmwa fiangbe!

²⁸ Te Osanobua gha rhie evbu ẹrinmwi nuẹn, ne ọ ya ugbo ruẹ khian ne ọ ma emwiokọ! Te ọ gha rhie ọka kevbe ayọn nibun nuẹn!

²⁹ Te iyaẹvbo nibun gha khian eguọmwadia ruẹ, ne emwa gha hie uhunmwu rre nuẹn. Te u gha khian arowa avbe etuẹn, ne uniẹn ivbi iyuẹ gha vbokho uhunmwu rre nuẹn. Ihẹn ọghe iran ni rhovbiọọ afiangbe ọghe iran ni fiangbuẹ.”

Isọ Rinmwian Wẹ Ne Aizik fiangbe Irẹn

³⁰ Aizik ghi fiangbẹe nẹ, Jekọb keghi kpao vbe ọwarọkpa zẹẹ, Isọ ne ọtiọnrẹn keghi ke ọbafi rre.

³¹ Rẹn kevbe le evbare ne ọ rhiẹnrhiẹn mu gie erha ẹe. Ọ keghi kha wẹẹ, “Lahọ, evbavba, kpaegbe tota nu u re vbe evbare ne imẹ mu gue, ne u miẹn ehe na fiangbe mwẹ.”

³² Aizik keghi nọ rẹn wẹẹ, “Gha nọ yi?” Ọ keghi wanniẹn wẹẹ, “Isọ ne ovbuẹ nọdiọn nọ.”

³³ Aizik keghi suẹn gha guọ, egbe ẹre hia kegha mu rueghe zẹzẹzẹ, ọ keghi nọ wẹẹ, “De ọmwa ne ọ gbe emiowo mu gunmwẹ yi? Te I da rriọe fo vbe uwẹ la owa, I rhie afiangbe ọghe okiekie mwẹ nẹẹn nẹ, ọghọe khian gha nọ ẹdẹdẹmwẹdẹ.”

³⁴ Ugbẹn vbe Isọ ghi họn ẹmwẹ na, ọ keghi kpe urhu eve ua vbe orriara, ọ wẹẹ, “Vbe fiangbe mwẹ evbavba.”

³⁵ Aizik keghi wanniẹn wẹẹ, “Ọtuẹn rre nẹ do rẹrẹ mwẹ, ọ rhie afiangbe ruẹ rrie nẹ.”

³⁶ Isọ keghi kha wẹẹ, “Ukpogieva ne ọ he mu mwẹ ru ọna khin. A i dọn ighẹ e Jekọb a gele tie ẹre ọ miẹn mwẹ ukpo ọghe ọmọdiọn, banbanna nian, ọ vbe do rhie afiangbe mwẹ gha rrie. U ma ghi sẹ afiangbe rae khẹ mwẹ ra?”

³⁷ Aizik keghi wanniẹn wẹẹ, “I yae khian arowa a nẹ, I vbe ya etiọnrẹn hia khian eguọmwadia ẹnrẹn nẹ, I viọ avbe ọka kevbe ayọn naẹn nẹ. De emwi ne ọ ghi ye kẹe ne I gha ru nuẹn ovbi mwẹ!”

³⁸ Isọ keghi ye gha rinmwian erha ẹe, “Afiangbe ọkpa kẹkan wẹ mwẹ ra erha mwẹ? Vbe fiangbe imẹ evbavba!” ọ keghi kpe orhu eve ua.

³⁹ Aizik na ghi tama rẹn wẹẹ, “Evbu ọghe ẹrinmwi irrọọ nuẹn, otọ ne ọ maa emwiokọ i rrọ nuẹn.

⁴⁰ Abẹkpẹn ruẹn ọre u ra ya gha dẹgbẹ yi khian u ghi gha re ọguọmwadia ọtuẹn sokpan u ghẹ ghi fieghe uhunmwu u ghi kannọ obọ ẹre hin egbe ruẹ rre.”

⁴¹ Ẹko Jekọb kegha khọ Isọ rhunmwuda ne erha ẹe na rhie afiangbe ẹnrẹn nẹẹn, ọ na rorẹe wẹẹ, “Ẹghẹ ne a gha ya khiẹ uwu erha mwẹ sotọ fo nẹ, ọ gha gbe rra nẹ I ghi gbe Jekọb rua.”

⁴² Sokpan, Ribẹka keghi rẹn ehe ne Isọ ghae yi, ọ na gie na tie Jekọb, ọ tama rẹn wẹẹ, “Danmwehọ, Isọ ne ọtuẹn ho ne ọ rria ruẹ ikhi, ne ọ gbua.

⁴³ Banbanna na nian ovbi mwẹ, ru vbene I tama ruẹn. Mu egbe ne u lẹ bu e Leban ne ọtẹn mwẹ vbe Haran.

⁴⁴ U ghi tota kẹe la ẹghẹ eso ohu te do fo ọtuẹn vbe ekhọe, ọ ghi mianmian emwi ne u ru ẹre re.

⁴⁵ Ẹghẹ nii, I gha gie ọmwa bu ruẹ gha dee ne ọ do rhie ruẹ gha die owa. Vbọzẹ ne ivbi mwẹ eva gha na wu mwẹ ẹdẹ ọkpa?”

Aizik Rhie Jekọb Gie Leban

⁴⁶ Ribẹka keghi tama Aizik wẹẹ. “Egbe ikhuo eghọẹn ne Isọ viọre wọ mwẹ, ẹtin iran fo mwẹ. A i ghẹ miẹn wẹ te Jekọb ghi vbe rhie vbe ivbi e Hiti na, ọnii ọre I ghi na wu!”